.webp){kind=icon}
Планот на чилеанската влада да бара контролен удел во сите идни проекти за литиум ќе ги одврати инвестициите и ќе ризикува да ја закочи транзицијата на чиста енергија, смета канадскиот милијардер за рударство Роберт Фридланд.
„Најавата, која во петокот доведе до пад на цените на акциите на чилеанските компании за литиум, ќе биде многу голем предизвик за меѓународниот капитал и го отежнува инвестирањето во Чиле. Парите се како кукавица, бегаат на првиот знак на неволја“, рече во интервју претседателот на „Иванхо мајнс“ (Ivanhoe Mines Ltd).
Побарувачката за литиум, која е основна состојка во батериите на електричните возила, ќе се зголемува во наредните децении бидејќи производителите на автомобили се оддалечуваат од моделите на бензин и дизел. Чиле е втор најголем производител на метал во светот, а претседателот Габриел Борик бара поголема улога на државата во овој сектор, истовремено обидувајќи се да изгради домашна преработувачка индустрија и да ја заштити животната средина. Политиката има некои сличности со тоа што претседателот Јоко Видодо се обидува да го направи со никелот во Индонезија.
„Потегот на Сантијаго ќе ја поткопа репутацијата на Чиле како едно од побезбедните места за странските инвеститори во Латинска Америка и ќе значи национализација на секторот за литиум во земјата. Тоа веројатно ќе ја врати владата многу назад, отфрлајќи компании како 'Рио Тинто' и 'Тек' да влезат таму и да инвестираат. Според мојата процена, тоа нема да заврши добро“, рече Фридланд, додавајќи дека владите се неефикасни рудари и е многу поефикасно да го охрабрат приватниот сектор да инвестира, инаку непромислените националистички политики ризикуваат да ја попречат транзицијата кон чиста енергија.
Новата политика на Сантијаго доаѓа откако предложените зголемувања на надоместокот за рударство во Чиле, социјалните немири во Перу и заканата од зголемување на даноците во Панама ги одложија проектите за производство на бакар во тие земји и ги исплашија инвеститорите. Бакарот, исто како и литиумот, е основна состојка во примената на чистата енергија, а Чиле и Перу се двата најголеми производители на тие метали во светот.
