Нафтата се упати кон трет по ред неделен пад, што би претставувало најдолга низа загуби оваа година, бидејќи загриженоста од забавување и превирањата во американскиот банкарски сектор ги поттикна инвеститорите да бегаат од ризикот.
ВТИ утрово се искачи повисоко, до 69 долари за барел, поточно се тргува со раст од 0,5 проценти и изнесува точно 68,87 долари, но американскиот репер за сурова нафта сè уште е повлечен за околу 10 проценти оваа недела по четиридневното пропаѓање и сега нафтата брент чини 72,82 долари за барел.
Неделна промена на цената на нафтата ВТИ / Bloomberg
Тргувањето беше обележано со кратко, но драматично паѓање рано во четвртокот, кога цените во текот на денот паднаа до најниското ниво од 2021 година. Суровата нафта е погодена од зголемената загриженост дека американската економија е на пат да западне во рецесија, што потенцијално ќе ѝ штети на потрошувачката на енергија, исто како што инвеститорите следат знаци на континуирана нестабилност меѓу регионалните кредитори. Покрај тоа, главниот извозник и лидер на Организацијата на земји извознички на нафта и нејзините сојузници (ОПЕК+), Саудиска Арабија, ги намали цените во Азија.
Оваа година нафтата падна за 14 проценти дури и по одлуката на ОПЕК+ да го намали производството од овој месец. Повлекувањето на цената дојде и покрај знаците на сила на физичкиот пазар на нафта, што сугерира дека распродажбата може да биде прекумерна. Во таа насока, главниот извршен директор на „Шел“ (Shell Plc), Ваел Саван, рече дека оваа недела пазарот е всушност доста тесен.
„Иако расположението е негативно во моментов, пазарот е тесен и нашиот биланс сè уште покажува дека пазарот ќе биде во дефицит во текот на втората половина од годината, што би требало да ги зголеми цените“, рече Ворен Патерсон, раководител за стратегија со стоки во ИНГ (ING Groep NV).
На Блискиот Исток, Ирак рече дека допрва треба да склучи договор со Анкара што ќе овозможи обновување на извозот на ирачка нафта преку Турција за речиси половина милион барели дневно. Судирот меѓу Багдад и регионалната влада на Курдистан ги запре испораките од пристаништето Џејхан од крајот на март.
.webp){kind=icon}
