.webp){kind=icon}
Цената на нафтата се искачи на највисоко ниво од ноември минатата година откако лидерите на ОПЕК +, Саудиска Арабија и Русија објавија дека ќе ги продолжат ограничувањата во снабдувањето до крајот на годината, затегнувајќи го глобалниот пазар.
Вест Тексас Интермедиат (West Texas Intermediate) се тргуваше близу 87 долари за барел по вчерашните најави за ограничувањата, што доведе до добивка од 1,3 проценти. Иако трговците очекуваа намалување на обемот во снабдувањето, времетраењето беше неочекувано.
Стратегијата од Ријад и Москва ќе помогне да се исцрпат залихите дополнително, што ќе изврши нагорен притисок врз цените. Јазот помеѓу двата најблиски декемвриски договори на ВТИ се искачи на највисоко ниво од средината на 2022 година.
Bloomberg
Нафтата нагло порасна овој квартал откако Организацијата на земји извознички на нафта и нејзините сојузници договорија намалување на понудата во целата групација, кои потоа беа дополнети со дополнителни, доброволни намалувања. Ограничувањата на производството доаѓаат во период во кој Меѓународната агенција за енергија проценува дека глобалната потрошувачка на сурова нафта урива рекорди.
„Понатамошни ограничувања во снабдувањето со нафта ќе влијаат врз раст на цените“, соопшти „АНЗ Груп Холдингс“ (ANZ Group Holdings Ltd). Според прогнозата на компанијата и нејзиниот аналитичар Аделаид Тимбрел „пазарот најверојатно ќе забележи значителни намалувања на залихите како резултат на ограничувањата на производството“.
Групацијата „Голдман Сакс“ (Goldman Sachs Inc.) соопшти дека потезите на ОПЕК + донесоа нагорни ризици за изгледите за цените. Аналитичарите на банката истакнаа неколку сценарија, вклучително и она во кое цената на нафтата од типот Брент ќе се зголеми на над 100 долари за барел, иако тие нагласија дека тоа не е базичен приказ.
Растот на нафтата носи ризик бидејќи може да поттикне нов бран инфлација ширум светот бидејќи ги зголемува цените, вклучително и за горивата како што се бензинот и дизелот. Тоа би можело да ја искомплицира задачата со која се соочуваат централните банкари во момент кога се обидуваат да одлучат дали ги подигнале каматните стапки на доволно високо ниво за да го ограничат темпото на зголемување на цените.
