Цената на литиумот во слободен пад

Цената на литиумот го продолжи речиси едномесечниот циклус на опаѓање со што падот од почетокот на годинава достигна дури 75 проценти. Се очекува вредноста на металот непходен за батериите за електрични возила да продолжи да паѓа и во наредната година.

Кинеските цени на литиум карбонат, полуобработена форма на металот, паднаа за 2,3 проценти денеска и се намалени за 20 проценти досега овој месец. Последниот пат кога објавија дневна добивка беше на 25 октомври. Цената на сподуменот – минерал кој се ископува во Австралија и чија главна состојка е литиумот е повеќе од преполовена во 2023 година. 

Презаситеноста на понудата ги намали цените во 2023 година, откако тие се зголемија во претходните неколку години. Глобалниот пазар на литиум нема да има дефицит до 2028 година, според прогнозите на индустриската консултантска компанија „Бенчмарк минерал интелиџенс“ (Benchmark Mineral Intelligence). Зголемените каматни стапки, исто така, доведуваат до неизвесност околу глобалната побарувачка за електрични возила, при што некои производители на автомобили ги преиспитуваат своите стратегии.

„Со зголемувањето на понудата на литиум следната година, веројатно ќе видиме дополнително паѓање на цените“, рече Алан Реј Рестауро, аналитичар во „Блумберг НЕФ“ (BloombergNEF). „На страната на побарувачката, некои регионални разлики во продажбата на ЕВ го влечат надолу расположението низ индустријата“.

„Ес-Кју-Ем“ (SQM), светскиот број два производител на литиум, ги предупреди инвеститорите минатата недела дека трендот на намалување на цените може да продолжи до крајот на годината. „Албимерл“ (Albemarle Corp.), најголемиот ископувач, претходно овој месец соопшти дека некои производители почнале да ги зауздуваат операциите бидејќи цените паѓаат под економијата на реинвестирање.