Русија уверува дека не мора да испраќа гас само преку Украина

Русија е подготвена да го продолжи извозот на гас во Европа преку неколку рути, со оглед на тоа што годинава истекува важноста на договорот за транзит на енергентот преку Украина, рече рускиот вицепремиер Александар Новак.

„Останува на властите во Киев и на Европската Унија да се договорат за иднината на транспортот на гас. Ние секогаш велевме дека сме подготвени да продолжиме да снабдуваме гас и преку други рути, не само преку постојната врска преку Украина“, рече Новак во денешното интервју за државниот ТВ-канал „Русија 24“ (Rossiya 24).

Тоа што се наближува крајот на испораките преку Украина предизвикува значителна загриженост за државите како Словачка, кои за да ја задоволат побарувачката во голема мера се потпираат на „Газпром“ (Gazprom PJSC), и покрај тоа што голем дел од Европа се одвикнува од рускиот гас. Украинскиот претседател Володимир Зеленски посочи дека неговата земја нема да транзитира гас од руско потекло доколку не добие уверување дека Кремљ нема да има финансиска корист од тоа додека трае војната.

Прогнозите за поголемиот дел од Европа се дека доаѓа постудено време, што веројатно ќе ја зголеми побарувачката за гас додека паралелно со забрзано темпо се трошат резервите. Тесниот пазар претставува предизвик за трговците да обезбедат доволно гас за следната година додека се обидуваат да обезбедат снабдување со течен природен гас од Азија преку море.

Русија испраќа гас во Европа преку различни рути. Покрај Украина, горивото се транспортира и преку кракот на гасоводот Турски тек што минува низ Црно Море. Секоја од двете рути во моментов испорачува околу 15 милијарди кубни метри годишно. Резервите се испраќаат и во танкери како ЛНГ. Според вицепремиерот Новак, вкупниот извоз на гас во Европа надмина 50 милијарди кубни метри во периодот од јануари до ноември годинава.

Во септември претседателот Владимир Путин рече дека Русија може да продолжи со испораките на гас за Европа преку последната преостаната врска од контроверзниот гасовод Северен тек преку Балтичко Море.

„И покрај политичкиот притисок, рускиот гас е и ценовно и логистички попривлечен за регионалните купувачи“, рече Новак.