Русија го укина условот за плаќање гас преку санкционираната банка

Претседателот Владимир Путин ја промени процедурата за плаќање од странските купувачи на руски гас, намалувајќи ја со тоа загриженоста дека американските санкции наметнати врз „Газпромбанк“ (Gazprombank) ќе доведат до запирање на испораките за Европа.

Во декретот потпишан вчеравечер, Путин го укина условот за плаќање на рускиот природен гас директно преку „Газпромбанк“. Неколку часа подоцна банката појасни дека останува единствената овластена банка за плаќања за гас од странски купувачи, но дека повеќе нема да помага при конверзија на валутите во рубли.

Ваквата промена ќе им овозможи на странските купувачи на руски гас да користат сметки во други банки за да ги претворат девизните плаќања во рубли и потоа да ги префрлат парите на „Газпромбанк“. Плаќањата преку трети страни претходно не беа можни, а сега тоа ќе им овозможи на увозниците од Централна Европа да ги намират сметките и покрај ограничувањата.

И покрај тоа, плаќањата сè уште се премногу сложени бидејќи купувачите ќе треба да најдат банки што се подготвени и способни да разменат валути во рубли и да ги олеснат трансферите до „Газпромбанк“.

Администрацијата на американскиот претседател Џо Бајден минатиот месец воведе санкции за руската банка како резултат на интензивирањето на напорите да ја казни Москва за војната во Украина. Тој потег го зголеми ризикот од прекин на проток на гас во Европа од Русија, што го вклучи алармот за енергетска безбедност. Од 2022 година Путин бара плаќањата кон гасниот гигант „Газпром“ (Gazprom PJSC) да се вршат во рубли директно преку сметките во „Газпромбанк“.

Во меѓувреме Турција сè уште бара изземање од американските санкции за „Газпромбанк“, изјави утрово тамошниот министер за енергетика Алпарслан Бајрактар.

Пред овие најнови случувања Европа веќе се подготвуваше за потенцијален крај на дотокот на рускиот гас преку Украина бидејќи транзитниот договор меѓу Москва и Киев истекува на крајот на годината и сė уште нема алтернатива на повидок. Тоа би затворило уште една од двете преостанати траси на гасоводот до Европа, со што ќе стане уште поранлива на скоковите во побарувачката.