Танкерите почнаа да превезуваат сурова нафта наместо горива поради раст на цените за транспорт

Силниот раст на цените за превоз на сурова нафта поттикна бран танкери да се приклучат на профитабилната трговија, при што десетици брода го пренасочуваат својот фокус од превоз на горива кон транспорт на сурова нафта низ светските мориња.

Во првите четири дена од месецов, девет таканаречени танкери од типот „лонг рејнџ 2“ (LR2), најголемите бродови што вообичаено превезуваат горива како авиогориво и дизел, преминале на транспорт на сурова нафта, покажуваат податоците на платформата за следење  бродови „Сигнал оушн“ (Signal Ocean). Со тоа бројот на таканаречени премини од „чисти“ кон „валкани“ танкери од почетокот на годината достигна 35.

Танкерите ЛР2 брзаат кон профитабилната трговија со сурова нафта

Бројот на бродови што преминуваат на транспорт на сурова нафта нагло порасна во ноември

Bloomberg

Пренасочувањето што се случува во делови од светската флота на танкери е нов доказ за влијанието од зголеменото производство на нафта кај земјите извознички, како и за индиректните последици од построгите западни санкции кон Русија и Иран. ОПЕК+ ја зголеми понудата оваа година, како и производителите надвор од алијансата, што значи дека до купувачите треба да бидат испорачани  поголеми количества сурова нафта.

„Пренамената во ‘валкана’ флота беше неизбежна“, изјави Георгиос Сакелариу, аналитичар за пазарот на бродски превоз во компанијата „Сигнал маритајм“ (Signal Maritime), дел од истата групација како „Сигнал оушн“. „Она што претходно беше повеќе оперативна одлука на сопствениците на бродови, сега станува поширок пазарен тренд.“

Сакелариу го посочи потенцијалот за повисока заработка како главен мотив за промената, со оглед на зголемените тарифи за превоз на сурова нафта.

Пазарните приходи за големите танкери за сурова нафта неодамна достигнаа највисоко ниво во последните години. Тој скок, пак, им овозможи и на помалите бродови, како „афрамакс“, кои превезуваат сурова нафта и се слични по големина со танкерите ЛР2 – да наплатуваат значително повисоки цени. А еден ЛР2 што се пренамени во „валкан“ режим може да наплатува тарифи како „афрамакс“.

На почетокот на септември, танкерите ЛР2 кратко уживаа малку повисоки тарифи од „афрамакс“. Но два месеца подоцна, тие наплатуваат околу 65.500 долари дневно (покажуваат податоците на „Џефрис“),што е речиси 70 отсто повеќе од дневните тарифи што ги наплатуваат танкерите ЛР2.

Премијата на тарифите за „афрамакс“ нагло порасна во однос на танкерите ЛР2 

Дневните приходи на танкерите ЛР2 кратко беа повисоки во септември

Bloomberg

Пренамената на танкерите од превоз на сурова нафта во транспорт на преработени горива и обратно е вообичаена појава во индустријата, но не е без трошоци.

Кога танкерите се префрлаат од „валкана“ во „чиста“ категорија, сопствениците мора да платат за нови заштитни облоги во резервоарите за да можат бродовите повторно да превезуваат горива. А при обратниот процес – од „чиста“ во „валкана“ трговија – треба да се земе предвид дека претходните облоги веќе се оштетени, што претставува дополнителен трошок за сопствениците.