Турција бара исклучок од санкциите на САД за да продолжи да увезува руски гас

Турција е во преговори со САД за исклучок од санкциите што ќе ѝ овозможи на земјата да продолжи да ја користи руската банка „Газпромбанк“ (Gazprombank) за плаќање за увоз на природен гас.

„Без исклучок нема да можеме да ѝ платиме на Русија. А, ако не можеме да платиме, не можеме да ја купиме стоката“, изјави доцна синоќа пред новинарите министерот за енергетика Алпарслан Бајрактар.

Коментарите на Бајрактар ​​ги зголемуваат тензиите меѓу Вашингтон и преостанатите европски купувачи на руски гас поради минатонеделните санкции за „Газпромбанк“, која претходно избегна казни поврзани со инвазијата врз Украина поради нејзината клучна улога во олеснување на плаќањата за енергија.

„Ако нема изземање, тоа може да биде нешто многу големо за Турција“, рече министерот. Тој како преседан ги наведе претходните исклучоци од санкциите поврзани со Иран.

Русија е најголемиот снабдувач со гас на Турција, обезбедувајќи околу 42 отсто од ланскиот увоз, покажуваат податоците на регулаторот.

Руска делегација денеска одржа разговори во Анкара со официјални лица од различни турски министерства за наоѓање алтернативни начини на плаќање, информираат луѓе запознаени со ова прашање, барајќи анонимност бидејќи разговорите биле приватни.

Руската амбасада во Анкара одби да коментира. Турското министерство за надворешни работи не беше веднаш достапно за коментар. „Газпром“ и руското министерство за енергетика не одговорија на барањата за коментар.

Унгарија, која е уште еден голем увозник, го критикуваше потегот на САД против „Газпромбанк“, велејќи дека тоа ја загрозува енергетската безбедност. Министерот за надворешни работи Петер Сијарто, по минатонеделните разговори во Истанбул со регионалните министри за енергија, вклучувајќи го и Бајрактар, за „Блумберг“ изјави дека регионалните земји ќе најдат начин да продолжат со протокот на гас.

Иако Турција ја снабдува украинската војска со борбени беспилотни летала и артилериски гранати, Анкара не ја санкционира Русија поради конфликтот. Наместо тоа, претседателот Реџеп Таип Ердоган се обиде да посредува меѓу завојуваните страни за помирување и да го оживее договорот поддржан од Обединетите нации, сработен во 2022 година, со кој се овозможи извоз на украинско жито преку Црно Море.

Анкара и Москва сакаат да основаат центар за природен гас во Турција, вклучувајќи ја и можноста за инсталирање повеќе подморски гасоводи низ Црно Море. Освен гасот, Турција се потпира на Русија и за околу половина од увозот на сурова нафта, а двете земји моментално се во преговори и за нуклеарната централа „Росатом“ (Rosatom), која е во изградба.

Во моментов нема коментари за веста. Биди прв да коментира...

Остави коментар