САД може да ја замени Русија за снабдување на ЕУ со течен природен гас

Претседателката на Европската комисија, Урсула фон дер Лајен, има идеја за намалување на потрошувачката на рускиот течен природен гас во блокот: да се увезе повеќе од Америка. Тоа е меѓу темите за коишто разговараше за време на неодамнешниот телефонски разговор со новоизбраниот американски претседател Доналд Трамп.

„Течниот природен гас е една од темите што ги допревме. Сè уште добиваме многу течен природен гас од Русија. И зошто да не го замениме со американски, кој е поевтин и ги намалува нашите цени на енергијата“, рече Фон дер Лајен.

САД веќе се најголемиот снабдувач на течен природен гас во Европа, но увозот од Русија останува цврсто на второто место. Официјалните претставници на ЕУ бараат начини да ја ограничат улогата на Москва додека се одвива војната во Украина, иако рускиот гасовод и течниот природен гас во голема мера се надвор од опсегот на санкциите.

Од 2020 година САД е најголемиот снабдувач на течен природен гас во ЕУ, но Русија цврсто го држи второто место Bloomberg Mercury

 

Фон дер Лајен внимателно истакна дека во разговорот со Трамп не навлегле во премногу детали за природниот гас. „Тоа е нешто за што може да влеземе во дискусија“, рече таа.

Оваа година Западна Европа досега веќе купи повеќе течен природен гас од Русија отколку во цела 2023 година, покажуваат податоците за следење на бродови на „Блумберг“.

Додека западните санкции ја доведуваат во прашање најновата руска фабрика за извоз на течен природен гас, „Арктик ЛНГ 2“ (Arctic LNG 2), никакви ограничувања не се применуваат за испораките од оперативната централа „Јамал ЛНГ“ (Yamal LNG). Испораките првенствено се насочени кон Франција, Шпанија и Белгија. Тоа делумно се должи на долгорочните договори за снабдување.