Земјите од Европската Унија постигнаа договор за ограничување на цената на природниот гас на 180 евра, со што ставија крај на политичката расправа, која траеше повеќе месеци. Расправата се водеше за тоа дали да се интервенира во енергетската криза, која носи ризик да го турне регионот во рецесија.
Таканаречениот механизам за корекција на пазарот на гас, дизајниран да спречи екстремни промени на цените, ќе се применува од 15 февруари. Конечната сума е значително помала од претходниот предлог на Европската комисија, која не ќе можеше да ги спречи скоковите на цените што го погодија регионот во почетокот на годинава, бидејќи Русија го ограничи снабдувањето со гас по почетокот на војната во Украина.
Новиот лимит ќе стапи во сила само доколку разликата во цената во однос на светските цени на течниот природен гас биде поголема од 35 евра. Цените би требало да останат над плафонот три дена за да се активира механизмот.
Официјалните лица побараа договор пред да започне студеното зимско време, што ја зголемува побарувачката за гас и електрична енергија. Зголемените трошоци за енергија придонесоа за двоцифрена инфлација на целиот континент. Со студеното време што ја погоди Европа овој месец, владите се под зголемен притисок да дејствуваат или да ризикуваат реакција.
Иако референтните европски цени на гасот паднаа во последните месеци на околу 100 евра за мегават-час, тие сепак се значително над просекот за овој период од годината. Креаторите на политиките и аналитичарите, исто така, очекуваат високите цени да останат и во наредната година, бидејќи бараат алтернативи за руските испораки.
Договорот го решава она што беше еден од најголемите спорови на ЕУ за енергетската политика од почетокот на кризата. Групата земји, предводени од Германија, најголемата економија во блокот, како и Холандија и Данска, повикаа на внимателен пристап за да се избегне преголема интервенција на пазарот. Во меѓувреме, фракција меѓу Белгија, Италија, Грција и Полска се залагаше за поагресивни средства за ограничување на цените.
Комисијата претходно објави дека целта на алатката не е вештачки да ги одредува цените, туку да спречи екстремни скокови. Германија и некои други земји изразија загриженост дека ограничувањето на цените во Европа може да го направи регионот помалку привлечен за трговците на глобално ниво, бидејќи блокот бара алтернативи за руските набавки.
Договорот, исто така, отклучува поширок пакет за итни случаи за да се ограничи нестабилноста на пазарот и да се отвори патот за заеднички набавки на гас, кои се ставени во мирување поради расколот околу ограничувањето на цената.
.webp){kind=icon}
