„Голдман Сакс“ ја зголеми прогнозата за цената на златото - очекува да достигне 3.100 долари

„Голдман Сакс“ (Goldman Sachs Group Inc.) ја зголеми својата прогноза за цената на златото за крајот на годината на 3.100 долари за унца поради купувањето од централните банки и приливите во фондовите со кои се тргува со злато на берзите. Таквиот потег го нагласува ентузијазмот на Волстрит во врска со благородниот метал.

Побарувачката од централната банка во просек може да изнесува 50 тони месечно, што е повеќе отколку што се очекуваше претходно, наведуваат аналитичарите Лина Томас и Даан Струјвен во анализата. Доколку продолжи неизвесноста околу економската политика, вклучувајќи ги и царините, златните прачки може да достигнат цена и од дури 3.300 долари за унца поради повисоките шпекулативни позиции, велат тие. Последната бројка имплицира годишна добивка од 26 проценти, според пресметките на „Блумберг“.

Bloomberg Mercury

 

Скапоцениот метал годинава континуирано расте, поставувајќи последователни рекорди во седумнеделна победничка серија. Одржливиот раст на суровината е поттикнат од зголемените купувања од централните банки, низата намалувања на каматните стапки од страна на американските Федерални резерви (Фед) и од неодамна зголемената загриженост на инвеститорите поради најавите на американскиот претседател Доналд Трамп за воведување царини.

„Ја повторуваме нашата препорака за тргување ‘одете по злато’. Гледаме значително зголемување на вредноста на златото, кое се смета за заштита поради потенцијалното зголемување на трговските тензии“, напишаа Томас и Струјвен. „Покрај тоа, стравовите од инфлација и фискалните ризици може да ги натераат централните банки, особено оние што имаат големи резерви, да купуваат повеќе злато“, додаваат тие.

Според аналитичарите, нагорната корекција на прогнозата, откако минатиот месец ја отфрлија прогнозата од 3.000 долари што ја посочија кон крајот на минатата година, следува по набавките од официјалниот сектор проценети на 108 тони во декември.

Ревидираната прогноза доаѓа паралелно со мноштво други оптимистички предвидувања од водечките банки. Меѓу нив, „Ситигруп“ (Citigroup Inc.) на почетокот од месецов соопшти дека очекува цените на златото да достигнат 3.000 долари за унца во рок од три месеци поради геополитичките тензии и трговските војни поттикнати од Трамп, кои ја зголемуваат побарувачката за благородниот метал.

Акумулацијата од страна на централните банки е главна тема на глобалниот пазар на злато во последните квартали. Во Азија, Народната банка на Кина во јануари ги зголеми своите имоти во злато, и тоа трет месец по ред. Други официјални поголеми купувачи се централните банки на Полска и Индија, според Светскиот совет за злато.

И уделите на ЕТФ-овите поддржани од злато се зголемија иако вкупната бројка останува далеку под рекордот постигнат во 2020 година, за време на пандемијата. Досега, во 2025 година, таквите средства се зголемија за околу еден отсто, покажува извештајот на „Блумберг“.

Цената на златото последно се тргуваше на ниво од околу 2.910 долари за унца, откако минатата недела постави рекорд и надмина 2.942 долара. Цените на благородниот метал се зголемија за околу 44 проценти во текот на изминатите 12 месеци, надминувајќи ја добивката од 18 отсто на глобалните акции.