Државата ќе ги проверува броилата поради високите сметки за струја

Бирото за метрологија да ја стави во функција софистицираната опрема за тестирање и верификација на броилата за електрична енергија, бара министерката за енергетика Сања Божиновска.

Министерството соопшти дека поради неажурност во претходните години таа останала неискористена и не била ставена во функција.

„Станува збор за машина – трофазен систем за мерење на електрична енергија и моќност, која повеќе од 7 години седи неупотребена во подрумските простории на Бирото. Со ставањето во употреба на оваа опрема, крајна цел е, освен верификација на мерилата, и да се испитува исправноста на мерилата по жалба на потрошувач“, стои во соопштението.

Во последниот период честите се поплаките на граѓаните дека сметки за струја се значително повисоки, а Марко Бислимоски, претседател на Регулаторната комисија за енергетика објасни дека причина за високите сметки не е цената на струјата туку тоа што броилата покажале повисока потрошувачка, односно во прашање е отчитувањето.

„Она што го направи универзалниот снабдувач е дека очигледно таму има предвидување на потрошувачката, има грешки и граѓаните со право се незадоволни. Годинава имаме 99 претставки, односно жалби за сметки за струја. Сега почнуваме да носиме одлуки и најголем дел од нив се позитивни за граѓаните, со што му се наложува на „ЕВН хоум“ да ги коригира сметките. Станува збор за ситуации каде што на граѓаните прво од ЕВН им рекле дека нивните сметки се во ред, па тие се обраќаат кај нас“ – објасни Бислимоски во телевизиско гостување.

Претседателот на РКЕ наведе дека технички е невозможно ЕВН да ги прегледува сите броила, па затоа се прави предвидување на потрошувачката. Тој посочи и дека универзалниот снабдувач потоа мора да ги прифати позитивните решенија и најчесто на потрошувачот му се компензира со пребивање од следните сметки.

Истовремено, министерката Божиновска при посетата на Бирото за метрологија изврши обиколка на опремата со цел да се утврди нејзината состојба. Даде насоки да се започне со сите потребни активности за нејзино итно активирање. Таа доби уверување од раководството на Бирото дека веднаш ќе се распише потребниот тендер за проверка на функционалноста, инсталација и пуштање во употреба на опремата, како и обука на вработените, по што ќе може да започне со проверки на броилата.

„Со оваа мерка, граѓаните ќе добијат можност за независна проверка на исправноста на своите броила, директно во државна институција. Ова ќе овозможи секој сомнеж за неправилно фактурирање да се провери со прецизни и официјални мерења, при што граѓаните ќе добијат јасен и недвосмислен одговор за состојбата на нивниот инструмент“, стои во соопштението.

Истовремено, ова ќе претставува дополнителен механизам на контрола врз компаниите кои ги инсталираат и одржуваат броилата, со што ќе се обезбеди поголема правичност во наплатата на потрошената енергија и ќе се намалат можностите за неправилности, наведе Министерството