СДСМ поднесе закон за укинување на ДДВ за храната и за намалување на ДДВ за струјата од 18 на 5 отсто

Пратеничката група на СДСМ и коалицијата до Собранието денеска поднесе предлог-закон за изменување и дополнување на Законот за ДДВ, со кој бара намалување на данокот за електричната енергија од 18 на пет проценти и укинување на ДДВ за основните прехранбени производи, односно негово намалување од пет проценти на нула проценти. 

Како што информира на денешната прес-конференција пратеникот на СДСМ Фатмир Битиќи, со овие предлог-измени бараат системска реализацијата на две од седумте економски мерки на СДСМ.

„Намалувањето на ДДВ за електричната енергија ќе значи 13 проценти пониски сметки, односно поевтина струја за над 600 илјади домаќинства. За сметка од 3.000 денари, граѓаните ќе заштедат околу 400 денари – износ што, наместо да оди во државниот буџет, ќе остане во семејните буџети. Додека, пак, укинувањето на ДДВ за основните прехранбени производи ќе донесе до поевтинување на храната, односно намалување на цените на основните прехранбени производи за пет проценти“, рече тој.

Битиќи нагласи дека и покрај тоа што со месеци Владата ветува мерки за намалување на цените, гледаме, како што рече, целосен дебакл на владините политики.

„Таканаречените антикризни празнични кошнички доживеаја фијаско. Најавеното замрзнување на маржите сè уште не е донесено! Додека Владата да реагира за цените на храната, граѓаните почнаа да плаќаат и повеќе за струја. Се формира Министерство за енергетика, но минатата година тоа реализира само 50 проценти од планираните капитални инвестиции. Домашното производство на енергија не расте, што нè прави уште позависни од скап увоз. Во ноември планираниот увоз на струја од соседните земји беше нула гигават-часа, но реално беа увезени 351,3 гигават. Истото тоа се повтори во декември, кога планираниот увоз повторно беше нула, а се увезоа 425,7 гигавати“, рече тој.

Со поднесувањето на овој предлог-закон по скратена постапка, како што истакна Битиќи, започнуваме процес за системска реализација на мерките што директно ќе го олеснат финансискиот товар на граѓаните.

„Ако ВМРО-ДПМНЕ навистина се грижи за животниот стандард, ќе го поддржи овој предлог. Секое одолжување значи нов удар врз семејните буџети. Секој глас ‘за’ ќе биде глас за реални, опипливи решенија“, рече пратеникот Битиќи.

 

Во моментов нема коментари за веста. Биди прв да коментира...

Остави коментар