Се зголемува капацитетот на ветерниот парк во Богданци

Ветерниот парк Богданци ќе добие уште четири турбини со што вкупната инсталирана моќност ќе се зголеми на околу 50 MW, обезбедувајќи дополнително годишно производство од 37 GWh.

Втората фаза на проектот за проширување на ветропаркот во Богданци е дел од пошироката стратегија на владата за зголемување на учеството на обновливите извори на енергија до 45 отсто од вкупното производство до 2030 година.

мермс

„Ветерните паркови не се само економски исплатливи, туку и еколошки одговорни. Тие се клучот кон одржлива иднина и економски раст кој не ги загрозува ресурсите на идните генерации“, истакна министерката за енергетика, рударство и минерални суровини Сања Божиновска при посетата на Паркот на ветерни електрани (ПВЕ) Богданци кој е прв ваков објект во земјава.

мермс

ПВЕ Богданци располага со 16 турбини, инсталираната моќност на секоја од турбините е 2.3 MW, висината на столбот изнесува 80 метри, а дијаметарот на елисата изнесува 93 метри.

„Турбините се производство на Сименс – Данска и се вбројуваат меѓу најдобрите во својата класа. Паркот, со своите 16 турбини, има инсталирана моќност од 36,8 MW и годишно произведува околу 100 GWh природно одржлива енергија, што е доволно за снабдување на околу 60.000 граѓани, намалувајќи ја зависноста од фосилните горива и придонесувајќи за намалување на емисиите на CO2“, рече Гоце Џамбазовски, помошник директор за обновливи извори во АД ЕСМ.

Ветерните паркови, како оној во Богданци, се клучни за намалување на емисиите на стакленички гасови и за борба против климатските промени. Тие обезбедуваат чиста енергија, намалувајќи ја зависноста од увоз на енергија и создавајќи нови работни места. Покрај економските придобивки, ветерните паркови придонесуваат за енергетска независност и стабилност, што е особено важно за земјите како Македонија.

Со изградбата на втората фаза, ПВЕ Богданци ќе стане уште поголем играч на македонскиот енергетски пазар, придонесувајќи за економски раст и зелена транзиција. Ова е јасен сигнал дека Македонија е посветена на одржливи економски решенија кои ги балансираат економските, социјалните и еколошките интереси, соопшти Министерството за енергетика, рударство и минерални суровини.