Запалени сигнални кабли го затворија РЕК Битола

Запалени сигнални кабли се причина за исклучувањето на РЕК Битола утрово. Со тоа, од осум часот вон функција се сите три блока на централата. Битола 1 и 2 се исклучени поради заштита, а Битола 3 беше исклучен претходно.

ЕСМ соопшти дека причините за исклучувањето на термоелектраната дополнително ќе се утврдуваат направените анализи од стручните екипи на битолската термоелектрана покажале дека причина за исклучувањето.

„Термоелектраната „Битола 2“ утрово во 8:22 часот поради активирана заштита е исклучена од функција. Шест минути подоцна, од електроенергетската мрежа е исклучен и термоблокот „Битола 1“ поради активирање на заштитата на трансформаторот за сопствени потреби. Благодарение на навременото активирање на заштитата, не е предизвикана штета врз ТЕ Битола 1“, соопшти ЕСМ.

Во моментов течат операции за повторно вклучување на ТЕ Битола 1 во електроенергетската мрежа и се очекува тоа да се случи во текот на денот. „Веднаш по синхронизацијата на ТЕ Битола 1 во електроенергетскиот систем, во текот на денот ќе почнат операции за вклучување на ТЕ Битола 3, кој согласно планот за производство изминатите денови не беше во функција“, се наведува во соопштението од компанијата.

Зошто се толку чести дефектите во РЕК Битола?

Министерката за енергетика и минерални суровини, Сања Божиновска за честите дефекти вината ја префрла кај претходната власт. Ремонти не биле правени на време, а во зимскиот период не може да се прават.

„Немало ремонти, се користел јаглен со лош квалитет, се користеле адитиви, многу нешта не биле во ред. Ние не можеме за шест месеци се да средиме“, рече таа.

Претходната власт не ги плаќале ниту долговите кон ЕВН за субвенциите што ги користеа граѓаните во периодот на енергетската криза.

„Во овој основ за една година направен е долг од 60 милиони евра за кој неодамна ЕВН испрати фактура во Министертсвто“, рече Божиновска.

„Но јас ветувам дека ќе се работи сериозно. Ќе правиме и нови енергетски капацитети затоа што не можеме да се надеваме дека постоечките ќе нè служат уште 30 – 40 години. Свесни сме дека со „фиќо“ не можеме да возиме на автопат во Германија“, вели Божиновска.

„Чебрен“ да биде државен проект

Еден од клучните нови капацитети е централата Чебрен за која досега пропаднаа 14 тендери. Ни оваа влада не се откажува од изградбата на хидроцентралата, но според Божиновска, се разгледува можноста државата да биде доминантен сопственик на истата.

Министерката за енергетика Сања Божиновска рече дека на овој проект во моментов работат еминентни професори од различни области. За него постојат повеќе проекти кои се правени во периодот од 1960 до 2022 година, затоа нова студија нема да се прави, ќе се искористат постојните, без да се прави нова физибилити студија за да се заштеди време.

Таа вели дека има заинтересирани странски инвеститори и дека веќе со нив се разговара, но дека целта на државата е „Чебрен“ да биде државен проект.

„Ние сакаме тоа да биде државен проект, меѓутоа ќе видиме колку пари е тоа. Тоа се сериозни средства, но секако, ќе гледаме државата да биде доминантен сопственик. Треба да видиме колку ќе изнесува целиот проект и ќе направиме планови како понатаму да се финансира. Сигурно ќе биде над 600 милиони евра, или 700 милиони, а може да достигне и до една милијарда евра. За Македонија тоа се многу пари, но ако се земе предвид дека треба да бидеме енергетски независни, треба да инвестираме во тоа. Особено, ако се земе предвид дека во последните три години сме дале 340 милиони евра за увоз на струја“, истакна министерката.

Во моментов нема коментари за веста. Биди прв да коментира...

Остави коментар