Падот на продажбата на возила ја однесе трговијата во минус, но прометот од храна расте

Вкупниот промет во трговијата на големо и мало во декември 2024 година бележи пад од 8,5 проценти во однос на истиот месец 2023 година. Според податоците од Државниот завод за статистика, падот на тргувањето со возилата е клучна причина за минусот во целиот сектор бидејќи ако се исклучи оваа ставка, трговијата и на големо и на мало остварила позитивен резултат. Не сметајќи го тргувањето со возила и мотоцикли, растот на прометот во трговијата на големо на годишно ниво изнесува 5,5 проценти, додека кај трговијата на мало е 6,6 отсто.

 

 

Гледано подетално во трговијата на мало, пад има единствено кај прометот остварен од автомобилски горива и тој е намален за еден отсто. Сите други ставки бележат раст. Најмногу е зголемен прометот со непрехранбени продукти (освен гориво), дури за 11,4 отсто. Трговијата на мало што ја исклучува трговијата со гориво е зголемена за 8,5 отсто, а прометот направен од храна, пијалаци и тутун во декември 2024 бележи раст од 5,8 проценти во однос на истиот месец 2023 година.

Ден на бојкот на маркетите во целиот регион Адрија

Откако минатиот петок Хрватска беше пионерот што ја започна герила-акцијата за бојкот на големите синџири на маркети поради високите цени пред сė на основните прехранбени производи, денеска се приклучија и другите држави од регионот Адрија, каде што потрошувачите, според првичниот впечаток, го следат хрватскиот пример. Големите маркети се бојкотираат во Македонија, Србија, Црна Гора, Босна и Херцеговина и во Хрватска.

Организаторите во единствената земја од посочените што е членка на Европската Унија (ЕУ) како повод за бојкотот го наведоа фактот дека Хрватска е меѓу земјите од ЕУ со најголем раст на цените на храната. Имено, најголем раст на цените на прехранбените производи има во Кипар (7,8 проценти), Летонија (5,0 проценти), па Хрватска (4,7 проценти).

Според последните податоци од Државниот завод за статистика, кои се однесуваат на декември 2024 година, цената на храната во Македонија на годишно ниво бележи раст од 5,1 отсто. Тоа ја сместува земјава на врвот во Европа во однос на поскапувањето на храната. Оттука произлегува револтот кај потрошувачите, кои очекуваа дека по низата кризи, почнувајќи од пандемијата на ковид, преку енергетската и потоа инфлаторната криза, сега ќе дојде до одредена надолна корекција на цените на производите. Но, во реалноста тие никогаш не се намалија откако веќе достигнаа досега невидени нивоа.

Впечатокот досега е дека фреквенцијата на луѓе во големите маркети во Македонија е видливо намалена, иако состојбата е далеку од тоа дека маркетите се празни. Во земјава организацијата е неформална, односно граѓаните самоиницијативно повикуваа на бојкот преку социјалните мрежи под паролата „Попусто попусти за исти цени“. Целта на бојкотот не е потрошувачите да се снабдат со потребните производи од маркетите претходниот ден, туку сė што е неопходно да се купи од малите продавници или од пазарите.

Во Хрватска почна нова рунда на бојкоти организирани поради поскапувањето. Од вчера почна бојкот на конкретни производи, поточно „кока кола“ и други негазирани и газирани пијалаци, денеска се бојкотира општата потрошувачка, а до следниот четврток револтот ќе се изразува против три големи трговски синџири, „Лидл“, „Еуроспин“ и ДМ. Потоа следната недела на тапет ќе бидат други маркети. Иницијативата доаѓа откако на потрошувачите им се смачи од неразумно високите цени, а дополнителна фрустрација предизвикува тоа што многу производи во земјата каде што се произведуваат се продаваат по повисоки цени отколку во други земји. Бојкотот во Хрватска минатата недела речиси го преполови прометот на големите маркети.

Граѓаните на Босна и Херцеговина денеска ги бојкотираат продавниците, бензинските пумпи и рестораните. Нашите колеги оттаму јавуваат дека иако е забележливо намалувањето на бројот на клиенти во трговските центри, во кафулињата нема значителна разлика и многумина излегоа на првото утринско кафе.

Речиси половина од минималните месечни трошоци на едно семејство се за храна

„Блумберг Адрија“ вчера ги анализираше причините за т.н. војна меѓу потрошувачите и трговците. Бојкотот доби поддршка како од Организацијата на потрошувачи на Македонија така и од дел од синдикалните здруженија, но и од политичките партии и дел од функционерите.

 

 

Според пресметката на ССМ, вредноста на синдикалната минимална кошница во јануари 2025 година изнесува 63.252 денари и споредено со истиот месец лани, кога изнесуваше 57.163 денари, е зголемена за 6.089 денари, односно за 10,65 отсто.

Особено е значајно да се напомене дека половина од месечните трошоци отпаѓаат на храна и образование. Поточно, 36,7 проценти од минималните месечни трошоци (23.198 денари) отпаѓаат на храна и пијалаци, додека 11,1 отсто или 7.004 денари се потребни за образование.

Ако се земе предвид дека минималната плата во земјава е 22.567 денари, а просечната 41.999 денари, како и фактот дека поголем дел работници земаат потпросечна плата, повеќе од јасно е дека комотен живот во Македонија претставува вистински предизвик.

 

Во моментов нема коментари за веста. Биди прв да коментира...

Остави коментар