Цената на златото паѓа - позитивните знаци на пазарите ја намалуваат побарувачката

Златото го продолжува својот пад откако вчера поевтини за повеќе од два отсто поради знаците дека ќе има помалку намалувања на каматните стапки од претходно очекуваните, а од друга страна намалувањето на трговските тензии меѓу САД и Кина ја намали и побарувачката за благородниот метал што важи за безбедно засолниште во неизвесен период.

Цената на златото утрово падна за повеќе од еден отсто, на околу 3.140 долари за унца, што е најниско ниво во повеќе од еден месец. Приносите на американските државни обврзници пораснаа поради очекувањата дека Федералните резерви (Фед) ќе ги намалат трошоците за позајмување подоцна отколку што се очекуваше поради подобрувањето на економските перспективи по трговското примирје меѓу САД и Кина. Повисоките приноси и стапки имаат тенденција да бидат негативни за златото што не носи камата.

Bloomberg Mercury

 

Напредокот во трговските преговори исто така додаде негативно влијание на благородниот метал, при што Кина ја суспендира забраната за извоз на предмети со воена и цивилна примена - веројатно вклучувајќи и некои ретки метали - за 28 американски компании. Детантот меѓу двете најголеми економии во светот ја намали привлечноста на златото како засолниште и доведе до нагло закрепнување на ризичните средства неделава.

Можно е да дојде до понатамошно олабавување на долгите позиции во златото, рече Кристофер Вонг, стратег за девизен пазар во „Оверси чајнис бенкинг“ (Oversea-Chinese Banking Corp). „Иако би требало да дојде до одредена поддршка на ниво од околу 3.050 до 3.150 долари за унца, сепак златото може да ризикува подлабоко повлекување кон ниво од 2.950 долари“, рече тој.

Златото сепак годинава е во длабок плус од речиси 20 проценти, со цени што во април достигнаа рекордно ниво од над 3.500 долари за унца. Инвеститорите стравуваа дека трговските тензии што произлегуваат од царините на Трамп би можеле да предизвикаат побрза инфлација и забавување на растот, па дури и рецесија.

Индексот Bloomberg Dollar Spot се намали. Среброто исто така се намалува, откако во претходната сесија падна за повеќе од два отсто. Паладиумот забележа благ пад, додека платината остана стабилна.