Цената на златото паѓа четврти ден по ред

Златото го продолжи падот четврти ден по ред бидејќи пазарите ја апсорбираа веста дека американскиот трговски суд ја блокирал глобалната царинска агенда на претседателот Доналд Трамп.

Цената на златото денеска падна дури за 1,1 отсто, зголемувајќи ја со тоа загубата од два отсто во претходните три сесии, а причината е што Американскиот суд за меѓународна трговија ги оцени повеќето од царините на Трамп како нелегални, што дополнително го зајакна доларот. А посилниот долар го прави златото поскапо за повеќето купувачи.

Администрацијата на Трамп поднесе известување дека се жали на пресудата со која се суспендираат повеќето од нејзините царини. Врховниот суд на САД на крајот може да го има последниот збор во случајот со висок влог што би можел да влијае на трилиони долари во глобалната трговија.

Аналитичарите велат дека судската одлука, која му нанесува голем удар на еден од столбовите на економската агенда на републиканците, би можела да ја намали привлечноста на златото како засолниште.

„Веста од САД би можела да покаже значителен пад на златото во претстојните сесии бидејќи тргувањата со засолништа се повлекуваат“, рече Ник Твидејл, главен пазарен аналитичар во „АТ глобал маркетс“ (AT Global Markets) во Сиднеј, додавајќи дека цените би можеле дополнително да се олабават во тековната трговска сесија пред да најдат одредена поддршка.

Bloomberg

 

Од друга страна, силните технолошки заработки на „Енвидија“ вчера доведоа до забрзување на апетитот за ризик што се врати на Волстрит - исто така придонесоа за мечкино расположение во врска со златото. Позитивните резултати дојдоа откако бројките за довербата на потрошувачите во САД објавени во текот на неделата покажаа остро закрепнување поради оптимизмот за подобрување на односите на САД со некои од трговските партнери.

Одлуката на американскиот трговски суд е најновиот пресврт во неизвесноста на пазарот предизвикана од агресивната царинска агенда на Трамп, која ги натера инвеститорите да бараат безбедност во златото, кое е традиционално засолниште. Додека моментално се тргува по цени за околу 240 долари под рекордниот максимум поставен минатиот месец, благородниот метал сè уште е во пораст за повеќе од една четвртина годинава, исто така благодарение на купувањата од централните банки.

Спот-златото утрово во рамките на тргувањето во Сингапур се намали за 0,7 проценти, на 3.264,15 долари за унца. Индексот Bloomberg Dollar Spot се зголеми за 0,3 отсто. Среброто и платината паднаа, додека паладиумот се промени малку.