Струјата нема да поскапи, ЕСМ со нов кредит ќе се бори со загубите

Нити една државна енергетска компанија нема да бара зголемување на цената на струјата за домаќинствата во следните шест месеци. Ова на брифинг пред новинарите во Министерството за енергетика попладнево го потврдија директорите на ЕСМ, МЕПСО и МЕМО.

Во моментов струјата за домаќинствата ЕСМ ја продава по цена од 62 евра за мегават час, а во првиот квартал производната цена изнесувала дури 98,9 евра за мегават час. Загубите, државната компанија ќе се обиде да ги намали со намалување на трошоците во работењето.

Сепак, директорот на компанијата Лазо Узунчев вели дека е постигнат извесен напредок во РЕК Битола каде во првиот квартал производствената цена паднала на 96 евра за мегават час, во споредба со ланските 127 евра. За дополнително намалување на производствената цена, а со тоа и на загубата на ЕСМ која лани достигна 123 милиони евра, Узунчев вели дека се потребни инвестиции.

„Производната цена е висока затоа што со години не е вложувано во производствените капацитетите, ниту во инфраструктурата, За да можеме во иднина да имаме повеќе средства за ревитализација на постројките и да имаме средства сами или со кофинансирање, имаме потреба од приходи и остварување на профит“, изјави тој.

Производство под плановите

Производство во првиот квартал е пониско за 35 отсто од планот на компанијата, но Узунчев смета дека до крајот на годината состојбата ќе се подобри и ЕСМ ќе произведе вишок кој ќе може да го продава по пазарни цени и ќе оствари добивка.

„И еден цент добивка ако оствариме, тоа ќе биде добро“, вели тој

Дотогаш, компанијата ќе продолжи да се задолжува за да обезбеди пари за одржување на ликвидноста. Многу брзо ќе биде потпишан договор за кредит со една домашна банка во висина од 30 милиони евра. Каматната стапка ќе се движи околу 3,5 отсто, според сегашните услови.

Многу надеж во хидропроизводствто

Узунчев вели дека хидропотенцијалот во моментов е на ниво од 48 отсто, а лани во септември, кога сегашниот менаџмент го презеде управувањето, изнесуваше само девет отсто.

Намерата на компанијата е до октомври хидропроизводствто да изнесува 50 отсто и на тој начин да се остварат заштеди. Цената на мегават час електрична енергија произведена во хидроелектраните е движи меѓу 22 и 27 евра за мегават час.

Кривични пријави против поранешни функционери

На крајот на минатиот месец ЕСМ поднесе кривична пријава до финансиската полиција против лицата кои биле дел од претходните два управни и надзорни одбори на компанијата, како и против високи функционери во поранешната влада, вклучително и претседавачот на Комисијата за економски систем за серија одлуки поврзани со закупувањето на капацитетите во гасниот терминал Александруполис, Грција.

„Согласно член 353 од кривичниот законик, тие несовесно постапувале и не ги штителе интересите на компанијата и на државата и досегашната штета изнесува над 5 милиони евра“, рече Узунчев.

Дали пријавите ќе бидат прифатени ќе биде познато во следниот период.

 

Во моментов нема коментари за веста. Биди прв да коментира...

Остави коментар