Нафтата поскапува, доларот слабее

Цената на нафтата порасна втор ден по ред, откако ослабениот долар ја зголеми привлечноста на суровините што се пресметуваат во таа валута, а геополитичките тензии ги ограничија шансите за зголемување на понудата од Русија и Иран.

Брент нафтата се тргуваше близу 65 долари за барел во понеделникот, додека ВТИ (West Texas Intermediate) беше околу 63 долари. Индексот на доларот заврши на најниско ниво од јули 2023 година пред малку да се стабилизира, додека банките на Волстрит ги зајакнаа своите прогнози дека американската валута дополнително ќе ослабне.

Bloomberg

На геополитички план, Русија и Украина завршија втора рунда преговори во Истанбул кои не доведоа до поголемо приближување за крај на војната. Во меѓувреме, претседателот Доналд Трамп изјави дека САД нема да дозволат збогатување на ураниум како дел од каков било договор со Иран, додека Техеран бара гаранции дека евентуалниот договор ќе вклучува укинување на санкциите.

Цената на Брент се зголеми до 4,7 отсто во понеделникот, откако ОПЕК+ во саботата ја зголеми понудата според очекувањата, што ги ублажи стравувањата од поголемо зголемување и доведе до повлекување на претходно поставените „мечкини“ обложувања. И покрај тоа, нафтата е сè уште во пад од околу 13 отсто оваа година, откако групата производители се откажа од претходната стратегија за одбрана на високите цени преку намалување на производството и поради загриженоста дека трговските војни ќе ја намалат побарувачката.

„Растот на нафтата е класичен пример за тоа како најлошите стравувања не се остваруваат“, изјави Чару Чанана, главен инвестициски стратег во „Саксо Маркетс“ (Saxo Markets Pte). „Мешаните сигнали од ОПЕК, заедно со зголемените геополитички тензии и сезонската побарувачка за гориво, предизвикаа нагло покривање на кратките позиции, додека ослабениот долар исто така придонесе за растот“, додаде таа.

Во меѓувреме, шумските пожари во Алберта, Канада, го запреа производството на скоро 350.000 барели дневно сурова нафта, што е околу 7 отсто од вкупното производство на земјата, бидејќи големиот пожар близу источната граница на провинцијата претставува закана за операциите во нафтените полиња.