Вкупните увезени количества на нафтени деривати во Македонија лани изнесувале 1.313.693 тони, што е за 2,6 проценти помалку во однос на увезените количества на нафтени деривати во 2023 година (1.349.391 тони), покажуваат податоците од годишниот извештај за 2024. на Регулаторната комисија за енергетика, водни услуги и услуги за управување со комунален отпад. Анализиравме кои се најголемите играчи на нафтениот пазар во земјава.
„ОКТА“ убедливо најголем увозник
Најголем увозник во 2024 година е „ОКТА Рафинерија на нафта“ АД Скопје којашто учествува со 73,1 проценти, потоа следува „Супертрејд“ со 10,3 проценти, „Лукоил Македонија“со 8 проценти, „ОМ Петрол“ со два процента, „ЕКС ФИС“ ( два процента), „Црна Река Петрол“ (1,1 процент), „Макпетрол“ АД Скопје (0,9 проценти) и останатите трговци со повеќе од три проценти учество во вкупниот увоз на нафтени деривати во 2024 година.
Прочитај повеќе
Нафтата поевтинува втор ден откако Иран сигнализира отвореност кон нуклеарниот договор
Цената на нафтата падна втор ден по ред откако беше објавен извештајот дека Иран е подготвен да се откаже од нуклеарно оружје во договор со САД во замена за олеснување на санкциите.
15.05.2025
ББА прогноза: Стабилни резултати на „МОЛ Група“ во првиот квартал
Поволните цени на природниот гас и зачуваната побарувачка во потрошувачкиот сегмент се клучни фактори што ја поддржуваат ЕБИТДА на ниво на групацијата.
08.05.2025
ОПЕК+ се согласи за ново зголемување на понудата на нафта
Клучните земји предводени од Саудиска Арабија и Русија се согласија да додадат 411.000 барели дневно следниот месец.
04.05.2025
Во 2024 година најмногу е увезено дизел гориво, односно 67,66 проценти од вкупниот увоз, потоа следуваат моторните бензини со 13,29 проценти, млазното гориво со 7,58 проценти, мазутот со 5,84 проценти, пропан-бутанот (ТНГ) со 4,07 проценти и екстра лесното гориво (ЕЛ-1) со 1,57 проценти. Значителен е порастот во увозот на млазното гориво од 32,75 проценти, споредено со 2023 година, исто така и кај бензините има зголемување на увезените количества во 2024 година за 8,63 проценти и увозот на дизел горивата во 2024 година е зголемен за 0,54 проценти споредено со претходната година. Значително намалување има во увозот на мазутот во 2024 година од 49,71 проценти, намалување од 9,95 проценти се забележува кај екстра лесното гориво (ЕЛ-1) и кај течниот нафтен гас (ТНГ) од 1,48 проценти, споредено со 2023 година.
Најмногу увезуваме од Грција
Во текот на 2024 година, трговците на големо со сурова нафта, нафтени деривати, биогорива и горива за транспорт, го вршеле увозот на нафтените деривати во од 11 држави, при што најмногу нафтени деривати биле увезени од соседните држави, и тоа од Грција 85,98 проценти, потоа од Бугарија 10,49 проценти, Албанија 2,27 проценти, Србија 0,96 проценти, Црна Гора 0,15 проценти, Романија 0,09 проценти и мал процент на увоз од други земји.
Набавката и продажбата на нафтените деривати во Македонија, во текот на 2024 година, активно ја вршеле 18 правни субјекти лиценцирани за трговија на големо со сурова нафта, нафтени деривати, биогорива и горива за транспорт.
Во 2024 година, пораст во потрошувачката има кај млазното гориво за 58,95 проценти, кај бензините за 7,83 проценти и кај дизелот за 4,09 проценти. Пад во потрошувачката во 2024 година, споредно со претходната година, има кај мазутот за 51,80 проценти, кај екстра лесното масло (ЕЛ1) за 16,48 проценти, кај потрошувачката на биодизел за 5,81 проценти и кај течниот нафтен гас (ТНГ) за 3,53 проценти.
Во потрошувачката на нафтените деривати на домашниот пазар во 2024 година доминираат дизел горивата со 73,95 проценти, безоловните бензини со учество од 11,37 проценти, мазутот со 7,01 проценти и течниот нафтен гас со 5,29 проценти. Потоа следуваат екстра лесното масло (ЕЛ-1) со 2,14 проценти, биогоривото со 0,16 проценти и млазното гориво со 0,09 проценти.
„Макпетрол“ доминира на пазарот на мало
Во Македонија активно работат околу 389 бензински пумпни станици. И покрај фактот што денес значително е променета сопственичката структура во малопродажниот сектор, „Макпетрол“ АД Скопје поседува најголем број на бензински станици и тоа 127. Потоа следуваат „Лукоил Македонија“ со 40 бензински станици, „ОКТА Бренд“ со 27 бензински станици, додека преостанатите околу 195 бензински станици се во сопственост на повеќе други домашни претпријатија.
На пазарот на мало доминантно учество има „Макпетрол“ со 44,41 проценти удел на пазарот, по што следуваат „Лукоил“ со 15,73 проценти, „Дади Оил“ со 12,86 проценти, „Супертрејд“ со 9,65 проценти, „Црна Река Петрол“ со 4,75 проценти, „Детоил“ со 3,13 проценти, „Омпетрол“ со 2,75 проценти, „Пуцко Петрол“ со 2,31 проценти, „Јавор шпед“ со 1,62 проценти, додека уделот на сите останати шест трговци на големо кои имале продажби преку бензински станици изнесува 2,80 проценти.
Во остварените продажби на нафтени деривати на крајни купувачи од страна на трговците на големо најголем удел од 24,06 проценти има „Супертрејд“, по што следат „ОKTA“ со 13,42 проценти и „Макпетрол“ со 11,43 проценти.
Во вкупната продажба на нафтени деривати на домашниот пазар по трговци во 2024 година во која се вклучени продажбите преку бензински станици и продажбите на крајни купувачи најголем удел има „Макпетрол“ со 32,48 проценти, по што следуваат „Супертрејд“ со 14,86 проценти и „Дади Оил“ со 11,49 проценти.
.webp){kind=icon}
Во моментов нема коментари за веста. Биди прв да коментира...