Златото ја проби границата од 4.000 долари

Моменталната пазарна (спот) цена на златото за првпат ја надмина границата од 4.000 долари за унца, поттикната од загриженоста за состојбата на американската економија и можното блокирање на федералната влада, што ѝ даде нов импулс на веќе разгорената берзанска трка.

Зголемените геополитички тензии, како и континуираните купувања на злато од страна на централните банки, дополнително ја зголемија побарувачката за безбедно вложување.

Златото ги надмина акциите по принос во текот на 21 век

Bloomberg

Растот на цената на златото доби уште поголема динамика, бидејќи инвеститорите бараат заштита од можни пазарни шокови поради застојот во финансирањето на федералната влада во Вашингтон. Почетокот на циклусот на монетарно олабавување од страна на Федералните резерви исто така претставува поттик за златото, кое не носи камата. Како резултат на тоа, инвеститорите масовно вложуваат во фондови што се тргуваат на берза (ЕТФ), а златните ЕТФ-ови во септември забележале најголем месечен прилив во последните три години.

„Пробивањето на границата од 4.000 долари е резултат не само на страв туку и на прераспределба на капиталот“, изјави Чару Чанана, стратег во „Саксо капитал маркетс“ (Saxo Capital Markets Pte.)

„Со економските податоци во застој и намалувањето на каматните стапки на повидок, реалните приноси се намалуваат, додека акциите поврзани со вештачка интелигенција изгледаат преценето. Централните банки ја поставија основата за овој раст, но сега малите инвеститори и ETФ-овите ја движат следната фаза.“

Во средата цената на златото се искачи за 0,9 отсто – до 4.021,48 долари за унца, а во 12:19 часот по сингапурско време се тргуваше за 4.018,16 долари.

Скоковите во цената на златото традиционално го следат растот на економските и политичките тензии. Металот ја проби границата од 1.000 долари по глобалната финансиска криза, 2.000 долари за време на пандемијата на ковид, а 3.000 долари во март – кога трговските царини на администрацијата на Трамп ја потресоа светската економија.

Сега, благородниот метал ја надмина и границата од 4.000 долари во услови кога американскиот претседател Доналд Трамп ја засили конфронтацијата со Федералните резерви, вклучувајќи и закани кон претседателот Џером Пауел и обиди за смена на гувернерката Лиза Кук – најдиректниот тест досега за независноста на американската централна банка.

Инвеститорите масовно купуваат златни фондови (ЕТФ)
Вложувањата во септември пораснаа најмногу во последните повеќе од три години

Bloomberg

Американската централна банка, доколку попушти под политички притисок и почне да ги намалува каматните стапки, би можела да создаде идеални услови за раст на цената на златото. Благородниот метал традиционално служи како заштита од инфлација, но неговата привлечност обично опаѓа кога каматните стапки се високи, бидејќи тогаш обврзниците и готовинските вложувања носат поголем принос.

„Очекуваме цената на златото да го достигне врвот кога пазарите ќе бидат најзагрижени за независноста на американската централна банка“, наведуваат аналитичарите на „Меквари банка“ (Macquarie Bank Ltd.) во извештајот од 30 септември. „Но, доколку ослабената централна банка направи сериозни грешки во политиката, растот на златото би можел да биде уште посилен.“

Цената на златото е на пат кон својот најголем годишен раст од 1970-тите – период кога галопирачката инфлација и укинувањето на златниот стандард доведоа до петнаесеткратно зголемување на неговата вредност. Тогашниот претседател Ричард Никсон вршел силен притисок врз централната банка да ги намали каматите. Под водство на Артур Бернс, таа направила само „ограничени напори“ да ја зачува својата независност и, според понови извештаи, дозволила инфлацијата да излезе од контрола од политички причини.

„Причината поради која инвеститорите купуваат злато – и зошто треба да го купуваат – се неговите диверзификациски својства“, изјави Стивен Милер, советник за инвестициски стратегии во ГСФМ (GSFM).

„Тоа расположение сè уште е во рана фаза, но златото сè повеќе ќе биде прифатено како дел од внимателното и рационално инвестирање“, додаде тој, предвидувајќи дека цената може да достигне 4.500 долари за унца до средината на следната година.

Милијардерот Реј Далио во вторникот изјави дека златото е „секако“ посигурно прибежиште од доларот и дека тековниот раст потсетува на 1970-тите. Неговиот коментар, кој го даде како основач на инвестициската компанија „Бриџвотер асошиејтс“ (Bridgewater Associates), следуваше по изјавата на основачот на „Ситадел“ (Citadel), Кен Грифин, кој оцени дека растот на цената на златото ја одразува загриженоста околу иднината на американската валута.

„Пробивот на металот до границата од 4.000 долари го одразува не само засиленото барање за сигурни вложувања туку и растечката недоверба кон хартиените финансиски инструменти во услови на зголемени фискални ризици и геополитички тензии“, изјави аналитичарката Хебе Чен од „Вантиџ маркетс“ (Vantage Markets) во Мелбурн.

„По ваквото постојано и силно поскапување, можно е да следува кратка фаза на стабилизација“, додаде таа.

Централните банки исто така одиграа клучна улога во растот на цената на златото. По глобалната финансиска криза тие преминаа од нето-продавачи во нето-купувачи на благородниот метал. Темпото на купување се удвои по одлуката на САД и нивните сојузници во 2022 година да ги замрзнат девизните резерви на Русија поради целосната инвазија врз Украина. Тоа поттикна многу централни банки да го диверзифицираат портфолиото, а високата инфлација и шпекулациите дека американската влада би можела да биде понеповолна кон странските доверители дополнително ја зголемија привлечноста на златото за креаторите на монетарната политика.

Централните банки постојано купуваат злато по глобалната финансиска криза 

Bloomberg

Зголеменото купување злато од страна на централните банки претставува „структурна промена во начинот на управување со девизните резерви и не очекуваме скорашен пресврт на овој тренд“, напиша Лина Томас, стратег за стоки во „Голдман Сакс“ (Goldman Sachs Group Inc.), во извештај од септември.

„Нашето основно сценарио предвидува дека сегашниот тренд на акумулација од страна на официјалниот сектор ќе продолжи најмалку уште три години“, додаде таа.

„Голдман Сакс“ неделава ја зголеми својата проекција за цената на златото за декември 2026 година – на 4.900 долари за унца, од претходната 4.300 долари.

Од другите благородни метали, среброто порасна за 1,2 отсто, на 48,42 долари за унца, додека платината и паладиумот исто така бележат раст. Индексот Bloomberg Dollar Spot се зголеми за 0,2 отсто.