Нафтата благо расте, трговците ги проценуваат шансите за нуклеарен договор со Иран

Цената на нафтата порасна додека инвеститорите ги одмеруваа шансите за нуклеарен договор со Иран, откако американскиот претседател Доналд Трамп изјави дека претпочита дипломатско решение, но предупреди на последици доколку не биде постигнат договор.

Брентот се искачи кон 72 долари за барел, откако во понеделникот затвори со мал пад, додека вест тексас (ВТИ) беше близу 67 долари. Во објава на социјалните мрежи, Трамп порача дека непостигнувањето договор би било „многу лошо“ за Иран и ги отфрли наводите дека Пентагон е загрижен дека продолжена воена интервенција би можела да биде тешка.

Преговорите за нуклеарен договор треба да продолжат в четврток во Женева, при што се очекува специјалниот пратеник на Трамп, Стив Виткоф, и зетот на Трамп, Џеред Кушнер, повторно да се сретнат со иранскиот министер за надворешни работи Абас Арагчи.

Нафтата расте пред разговорите меѓу САД и Иран за нуклеарен договор
Трамп повторно истакнува дека претпочита договор

Bloomberg

Загриженоста за последиците од можен американски напад врз Иран придонесе цената на нафтата да расте оваа година, и покрај очекувањата за глобален вишок на понуда. Американските воени сили се концентрираа на Блискиот Исток, а Стејт департментот во понеделникот нареди евакуација на несуштинскиот персонал од Амбасадата на САД во Бејрут.

„Пазарите на нафта се во состојба на исчекување, додека се чекаат нови информации за ситуацијата со Иран, при што постои значителна доза скептицизам кон каква било реторика за деескалација“, изјави Саул Кавоник, енергетски аналитичар во „МСТ Марки“ (MST Marquee). Според него, американското воено засилување додало ризична премија од околу 10 долари по барел на цените.

Секое можно нарушување на поморскиот сообраќај низ Ормускиот Теснец од страна на Техеран останува главен фокус на пазарот на нафта доколку САД се одлучат за воен удар. Танкерите што превезуваат сурова нафта и течен природен гас секојдневно минуваат низ тесниот морски премин за да испорачуваат товари до купувачи низ светот.

Неодамнешното затворање на делови од Ормускиот Теснец поради ирански воени вежби придонесе за раст на цените за изнајмување нафтени супертанкери. Годишното изнајмување многу голем танкер за сурова нафта сега во просек чини повеќе од 92.000 долари дневно, според „Кларксон рисрч“ (Clarkson Research Services Ltd.), што е највисоко ниво во податоците што датираат од 1988 година.