Јужна Кореја прв пат пријави оштетен брод во Ормускиот теснец

Јужнокорејски брод претрпе експлозија и пожар во Ормускиот теснец, соопшти Министерството за надворешни работи на земјата, што е прв случај на оштетување на нејзината трговска флота заглавена во регионот од почетокот на конфликтот на Блискиот Исток.

Нема пријавени жртви откако „експлозија и пожар се случиле на бродот управуван од Јужна Кореја ‘ХММ Наму’(HMM Namu), кој бил закотвен во води во близина на Обединетите Арапски Емирати“, се наведува во соопштението на Министерството за надворешни работи објавено во вторник.

Сеул одржа итен состанок, предводен од заменик-министерот за надворешни работи Ким Џина, која изрази „длабока загриженост“ и ја истакна потребата да се утврди причината за инцидентот и да се спречи негово повторување. Сеул е подготвен „во секое време да преземе брзи мерки за заштита на животите и безбедноста на корејските членови на екипажот“, се наведува во соопштението.

Јужнокорејската бродска компанија „ХММ“, која управува со средно големиот товарен брод, соопшти дека пожарот избувнал во машинскиот оддел и бил изгаснат од екипажот по четиричасовен напор, пренесе Јонхап, повикувајќи се на компанијата. Сите 24 членови на екипажот, вклучително и шест јужнокорејски државјани, се безбедни и без повреди.

Според извештајот на Јонхап, јужнокорејската влада добила разузнавачки информации дека бродот бил нападнат, но истрагата сè уште трае. „Сè уште не е потврдено дали станува збор за надворешен напад или експлозијата е предизвикана од внатрешен проблем на бродот“, изјавил претставник на „ХММ“, според Јонхап. Бродот ќе биде влечен до пристаништето во Дубаи, се додава.

По инцидентот, американскиот претседател Доналд Трамп изјави дека „можеби е време Јужна Кореја да се приклучи на мисијата“ во Ормускиот теснец, додавајќи во објава на Трут Соушал дека Иран испукал истрели кон „јужнокорејски товарен брод“.

Конфликтот на Блискиот Исток почна на крајот на февруари. Јужна Кореја — која увезува најголем дел од енергијата, вклучително и околу 70 отсто од суровата нафта преку Ормускиот теснец — е силно погодена од енергетскиот шок предизвикан од Иран.