.webp){kind=icon}
Македонците претпочитаат сопствени домови, Германците изнајмени
Луѓето на Балканот и во Источна Европа претпочитаат да живеат во сопствени домови за разлика од населението во Западна Европа, кое почесто се решава за изнајмени живеалишта. Според податоците на „Евростат“, 85,9 проценти од жителите на Македонија живеат во сопствени домови. Рекордери се Косово и Албанија, каде што околу 97 проценти од луѓето имаат свои, а не изнајмени живеалишта. Во Романија тој процент е 95,7, во Србија, Црна Гора и Хрватска околу 90, во Бугарија 85 и во Грција 73,3 проценти.
Германија (49,1 отсто) и Швајцарија (42,2 отсто) имаат далеку најниска стапка на сопственост на домови во Европа. Тие се единствените земји каде што сопствениците на куќи се помалобројни од оние што живеат во изнајмени домови.
Стапките на сопственост на домови во Европа се под влијание на различни фактори, вклучувајќи ги достапноста на станови со пристапни цени, распространетоста на социјалните станови и демографската структура на населението.
„Луфтханза“ почна со редовни летови на релацијата Франкфурт - Скопје
Германската авиокомпанија „Луфтханза“ вчера официјално влезе на македонскиот авијациски пазар со промовирањето на новата редовна авиолинија од Франкфурт до Скопје и обратно, соопшти „ТАВ Македонија“.
Германската авиокомпанија сега го поврзува македонскиот главен град со главниот аеродром во Франкфурт, нудејќи летови седум дена неделно (во некои денови и по два лета дневно).
„Франкфуртскиот аеродром е главниот аеродром во градот Франкфурт и е главното воздухопловно пристаниште за ’Луфтханза’ и еден од најважните аеродроми за трансфери во Европа, што ги поврзува патниците со повеќе од 300 дестинации во светот. Дневната фреквенција на овие летови е одлична можност за нашите патници што често патуваат во Германија, како и за патниците што би го искористиле аеродромот во Франкфурт како аеродром за трансфер за да стигнат до Северна Америка или други далечни дестинации на другите континенти“, изјави Метин Батак, генерален директор на „ТАВ Македонија“.
На берзите...
Акциите на утринското тргување во Азија главно се во пад бидејќи трговците очекуваат голем број економски податоци што може да помогнат да се прогнозираат следните чекори на монетарните власти во однос на политиката за каматните стапки.
Индексот S&P 500 утрово падна за 0,3 проценти, исто колку и технолошкиот индекс Nasdaq 100. Поголемите азиски берзански индекси се движат во негативната зона со загуба до 0,6 отсто, а единствена светла точка е јапонскиот индекс, кој е со раст од 0,2 отсто.
Цената на нафтата утрово продолжи да паѓа во рамките на тргувањето во Азија, откако минатата недела загуби речиси шест проценти од вредноста бидејќи изгледите за глобалната побарувачка останаа под знак прашалник, а азиските пазари на гориво нудат предупредувачки знаци за намалување на маржите за рафинирање. ВТИ за испорака во јуни падна за еден отсто, на 77,08 долари за барел, а за исто толкав процент падна и нафтата брент, со тоа што таа сега се тргува по цена од 80,86 долари за барел.
Вредноста на еврото во однос на американскиот долар утрово е сосема малку променета и овие две валути се тргуваат по курс од 1,0981 долар за евро. Златото, пак, падна за 0,1 отсто и сега унца чини 1.980,53 долари.
На криптопазарот расположението на инвеститорите е позитивно, па најголемите токени ја зголемија својата вредност за 0,8 проценти. Со тоа вредноста на биткоинот сега е 27.727,73 долари, а етерот се тргува по цена од 1.864,22 долари.
Денеска читајте...
Најновата анализа на аналитичкиот тим на „Блумберг Адрија“ покажува дека ќе се прошири фискалниот дефицит во регионот Адрија. Jавните финансии лани беа потпомогнати од засилен даночен прилив откако општото економско закрепнување и високата инфлација ги зголемија приходите од данокот на додадена вредност и од данокот на доход, констатираат од нашиот аналитички тим во новата регионална анализа објавена на „Блумберг Адрија инсајт“
Во однос на очекувањата за 2023 година, тие укажуваат дека нагорните изненадувања кај инфлацијата се позитивен сигнал за даночните приливи, особено во земјите со високи стапки на ДДВ или генерално силен придонес на ДДВ во вкупните буџетски приходи.
Цените растат - колку ќе потрошите за одмор годинава?
Инфлацијата ги направи потрошувачите попретпазливи, па сега сакаат да заштедат дури и на годишниот одмор. MЛИВ, неделното истражување на читателите на „Блумберг њуз“, неодамна покажа дека потенцијалните туристи не сакаат да платат повеќе од 500 долари за ноќевање во хотел и не се заинтересирани за дополнителни трошоци за позелени или полуксузни опции. Истражувањето беше направено на 465 испитаници, од кои нешто повеќе од половина се од САД и Канада, а четвртина од Европа.
И ние во македонската редакција на „Блумберг Адрија“ направивме слична анкета. На Линкдин прашавме колку пари најмногу би потрошиле за ноќевање за време на летниот одмор. Ни одговорија 177 читатели. Најголем дел од нив рекоа дека би потрошиле меѓу 20 и 50 евра, следни се тие што би дале до 100 евра за ноќевање за време на следниот одмор.
