Цените растат - колку ќе потрошите за одмор годинава?

Инфлацијата ги направи потрошувачите попретпазливи, па сега сакаат да заштедат дури и на годишниот одмор. MЛИВ, неделното истражување на читателите на „Блумберг њуз“, неодамна покажа дека потенцијалните туристи не сакаат да платат повеќе од 500 долари за ноќевање во хотел и не се заинтересирани за дополнителни трошоци за позелени или полуксузни опции. Истражувањето беше направено на 465 испитаници, од кои нешто повеќе од половина се од САД и Канада, а четвртина од Европа.

Блумберг 

Ова можеби го одразува намалувањето на довербата на потрошувачите или поплаките дека надуените цени не се усогласени со пропорционално зголемување на квалитетот на услугите, констатира „Блумберг“.

И ние во македонската редакција на „Блумберг Адрија“ направивме слична анкета. На Линкдин прашавме колку пари најмногу би потрошиле за ноќевање за време на летниот одмор. Ни одговорија 177 читатели. Најголем дел од нив рекоа дека би потрошиле меѓу 20 и 50 евра, следни се тие што би дале до 100 евра за ноќевање за време на следниот одмор.

 

 

По спроведувањето на анкетата, побаравме сместување за сума од 20 до 50 евра за ноќ, во согласност со барањата на нашите читатели. И не е дека не најдовме, ама некако не се совпадна со тоа што очекувавме и со тоа што сме навикнати.

Грција годинава е за 10 отсто поскапа, Турција и Египет и 30 отсто

Пребарувајќи на Букинг, најпрво се фокусиравме на Грција и баравме сместување од 20 до 50 евра за ноќевање. Најдовме скромно сместување на Касандра и Ситонија, двата крака на  Халкидики во јуни, и не најдовме ништо за јули и август. Во Пиерија, под Олимп, или во туристичките места како Паралија, Олимпик бич, Лептокарија сместување по овие цени ќе има цело лето.

Според цените на Букинг, до 50 евра по ноќ може да се најде сместување и во Албанија, каде што оваа година има поскапување од десетина отсто. Такво сместување има и во Црна Гора, но подалеку од плажа, а го има исто така во текот на целото лето.

Прашавме и во агенциите како се движат цените на аранжманите за ова лето. Генерално, цените секаде се покачени.

„Аранжманите за Египет се поскапени за 10-15 отсто, за Турција - Анталија е поскапа за 20 отсто, Бодрум и повеќе. Овој раст на цените е очекуван и кај хотелското сместување, но особено кај авионските билети. Од грчките туристички места, ние го продаваме само Халкидики и таму цените во однос на лани бележат најмал раст. Покачени се околу 10 отсто, а тоа најверојатно се должи на тоа што закупуваме само сместување, без авионски превоз, поради близината“, вели во изјава за „Блумберг Адрија“ Харис Меџедовиќ, менаџер за продажба во туристичката агенција „Фибула“.

И покрај повисоките цени, клиентите сакаат „ол инкулзив“ одмор во Турција и во Египет. За аранжманите интерес има уште од декември, кога беа пуштени за рани резервации.

Харис Меџедовиќ

Македонскиот туризам ќе има фантастична година

Сместување во рамките на буџетот од 20 до 50 евра за ноќевање може да се најде во земјава. Влатко Сулев, претседател на Националната асоцијација за дојдовен туризам (НАИТМ), во изјава за „Блумберг Адрија“ вели дека ноќевање со појадок во скопските хотели чини од 35 до 40 евра, а во Охрид просечно околу 30 евра.

Цените во однос на лани се зголемени за десетина отсто, и тоа не само во Скопје и Охрид туку и во дестинациите за селски туризам, во винскиот регион, секаде...

Многу поголем проблем, според Сулев, се цените на угостителските услуги, кои поради скапата храна се многу зголемени.

„Но и покрај тоа, земјава може да се надева на фантастична година. Тоа се должи на фактот што во регионот е многу поскапо. Во Србија цените се многу поскапи отколку кај нас, а Црна Гора веќе се профилира како земја што точно знае какви туристи сака, да не речам полека се претвора во нова Хрватска“, вели Сулев.

Влатко Сулев

Тоа, според него, е едната причина зошто Македонија годинава ќе има корист. Другата причина е Албанија, која во светски рамки е избрана за втора најбрзорастечка туристичка дестинација и прва во Европа.

„Земјава ќе биде понесена од тој бран. Туристите што ќе одат во Албанија, во најголем дел ќе ја посетат и земјава, особено Охрид, поради близината. Затоа сметам дека оваа година ќе биде подобра од претпандемиската 2019 година, ако не според бројот на туристи, тогаш според финансискиот прилив што ќе биде остварен“, вели Сулев.

Лани во земјава беа регистрирани 969.277 туристи, а финансискиот ефекти изнесуваше 480 милиони долари.