Од пандемијата исплива стартап што нурна во убавините на Македонија

Повеќето македонски граѓани никогаш нема да го заборават периодот на пандемијата на ковид-19, кога поради мерките за спречување на ширењето на вирусот беа принудени да седат дома. Некои од нив бараа бегство од градските средини и можност за изолирање во места каде што сепак би можеле да се движат во природна средина и на чист воздух. Во тој период, непосредно пред екот на пандемијата, е основана платформата Кајак.мк, како агрегатор за туристички агенции, која веќе две години нуди алтернативното туристичко сместување, а една од нејзините главни карактеристики е што овозможува промоција на приватни вили и викендички во прекрасни места во Македонија, за кои голем дел од населението никогаш не чул.   

„Со кризата што го зафати туристичкиот сектор од пандемијата, менаџментот на Кајак.мк бараше начин како да им пркоси на затворените граници и да му овозможи на домашниот турист да го искористи слободното време шетајќи низ Македонија и истражувајќи ги убавините што ги има нашата земја. Со интензивната промоција на уникатните дестинации и сместувачки капацитети започна да се развива и расте платформата Кајак.мк. За време на пандемијата многу од дигиталните номади и луѓето што работат онлајн ја користеа платформата за да си обезбедат ’привремен’ дом надвор од градските средини и да ја ’преселат’ својата канцеларија во природа. Кајак.мк им помогна на многу луѓе со предлози за сместувања и предлози за активни викенд-прошетки да заборават на стресот што беше присутен кај секого од нас за време на ковид-периодот. Нашиот напорен труд и фактот да не се предадеме пред ковид-19, ја издигнаа платформата на нивото на кое е денес“, велат од Кајак.мк.

Вила во Михајлово / Извор: Кајак.мк

Оттаму велат дека платформата се базира на работата и интересот на сите локални жители и чинители, односно на секој поединец што има директна или индиректна поврзаност со туризмот во Македонија.

„Секој водич, планинар, домаќин на сместување, угостител, менаџер во туристичкиот или угостителскиот бизнис, секој локален жител што има интересна приказна или предание што значи туризам, за Кајак.мк е столб на платформата. Месното население се она што го сочинува светот на Кајак.мк, чија основна премиса е - бидете туристи на начинот на кој живее локалното население“, велат од платформата.

Од луксузни вили до екокуќи без струја

На платформата денес може да се најдат над 420 уникатни сместувања, над 90 гастрономски дестинации и над 50 атракции како предлози за активен викенд. Од луксузни вили, викендички, дрвени куќарки, отцепени вили во дивината, па до екокуќи без електрична енергија.

„Нашата мисија е да ги поттикнеме домаќините да ги отворат своите врати за светот на Кајак.мк и да им овозможат на патниците едно уникатно искуство за време на престојот. Досега можеме со гордост да кажеме дека сме задоволни од одзивот и интересот на домаќините во Македонија. Кајак.мк е прва платформа на која може да се најде сместување во села или на планински подрачја за кои досега повеќето немаат ни слушнато, а камоли да имаат можност да престојуваат. Успеавме да им овозможиме на луѓето со авантуристички дух да престојуваат во разни села низ Македонија и во региони што не се туристички атрактивни“, велат од платформата.

Тие се среќни да потенцираат дека актуализирале дестинации како Влаина Планина, Калин Камен, Ранковце, Круша, селата Сладуево, Вирово, Габрово, Радибуш, Стезовце, Крњево, Старо Нагоричане, Оморани, Дурачка Река, Станча, Ругинце и многу други села за кои голем број граѓани првпат слушаат.

„Може да се најдат сместувања низ цела Македонија, може да се најдат сместувања на локации што се достапни со возила до локации на кои мора да се пристигне пеш. Целта е да ги мотивираме луѓето да бидат што е можно повеќе активни во природа, да ги почитуваат селата и да го вреднуваат здравиот начин на живеење“, велат од Кајак.мк.

Пешачка патека во местото Круша / Извор: Кајак.мк

На прашањето кои се најмалку познати (неоткриени) места во Македонија каде што се нудат вили за изнајмување, од Кајак.мк велат дека последното место со кое се запознале, а за кое веќе знаат дека има вили, е селото Крњево.

„Ова селце се наоѓа во подножјето на Кожуф Планина, непосредно пред познатиот вински регион Барово, дестинација што сметаме дека ќе биде доста атрактивна во претстојната пролетна и летна сезона. Наедно, можеме да ја потенцираме и излетничката населба Круша, каде што Кајак.мк е сведок на првиот објект што се изнајмува за престојување. Еве, на пример, до Круша (сконцентрирана во густата шума на Кожуф Планина) можете да пристигнете исклучиво со теренско возило или, секако, пеш. Уникатната вила што се изнајмува на Круша, со сигурност ќе поттикне многу домашни туристи да се активираат и да пропешачат до самото сместување. Тука е и селото Долни Дисан, каде што од летото кое ни доаѓа ќе може да се престојува во прекрасен реновиран планински дом со нови простории. Сите овие наброени дестинации се познати за дел од читателите, но за повеќето се новост, која мора допрва да се истражува“, велат од платформата.

Вила во Крњево / Извор: Кајак.мк

Цените зависат од повеќе фактори, се нуди и бесплатно сместување

Во однос на цените за изнајмување, од Кајак.мк велат дека иако многумина ќе речат дека цените зависат од атрактивноста на дестинацијата и годишното време, не треба да се изостави фактот дека тие зависат и од квалитетот на објектот и инвестицијата што е вложена.

„Ваков пример би потенцирале пространа и луксузна вила со базен што се наоѓа во некоја од руралните средини во Македонија, која како дестинација не е многу актуелна, но ако се земат предвид градбата и сето тоа што им се овозможува на гостите за време на престојот, по автоматизам се добива на цена“, велат од платформата.

Луксузна вила во Елешец / Извор: Кајак.мк

На платформата највисоки цени за сместување имаат вилата „Лејк хаус“ (Lake House) во Маврово и вилата „Бела“ во Елешец, а има и други објекти со слична цена. Што се однесува до најевтините сместувања, на Кајак.мк може да се најдат и бесплатни сместувања за луѓето авантуристи. Такви се еколошкото село Сонцогор, планинарскиот дом „Дедо Ило Јанчев“, дрвената куќарка во селото Спиково. Сите овие три сместувања се во фаза на развој или, пак, се изградени од домаќини чија цел била да создадат катче во кое ќе може самите да уживаат, но со текот на времето сфатиле дека чувствуваат потреба да им овозможат и на своите истомисленици да бидат нивни гости. Ние сме среќни што има луѓе што размислуваат вака и кои мотивираат нови локални жители да ги следат нивните постапки.

  Ентериер на луксузна вила / Извор: Кајак.мк

 

Кои се предностите на приватното сместување?

На прашањето кои се предностите од летување или зимување, односно престој во изнајмени приватни вили наместо хотелско сместување, од Кајак.мк велат дека на платформата може да се најдат и хотели.

„Поимот предност сите ние го дефинираме различно, затоа не би сакале да бидеме погрешно сфатени од читателите, бидејќи ова е чувствително прашање кога станува збор за престој. Од нашите анкети што ги спроведуваме, може да се заклучи само едно најважно: приватните вили најмногу се изнајмуваат за гостите да имаат целосна приватност. Многу гости сакаат да бидат апсолутно сами. Без никој околу нив. Секогаш кога ќе се спомене фактот дека гостите сакаат да бидат апсолутно сами, повеќето помислуваат на тоа дека гостите имаат цел да организираат гласни забави, но ние ќе кажеме дека оние што сакаат приватност повеќето се луѓе што го бараат вистинскиот одмор. Луѓе што во текот на работната недела се соочуваат со стрес, хаотичен сообраќај и слично, а со тоа бараат локација каде што ќе може да го слушаат звукот на природата и да ги наполнат своите батерии. Денес може да се најдат и хотели што се приспособуваат на ваквите потреби на луѓето, може да се најдат и хотели што ги дизајнираат своите соби во различни стилови, а исто така има и многу приватни вили што функционираат со изнајмување апартмани и во кои може да престојуваат повеќе гости истовремено“, велат од платформата.

Срдечен пречек од домаќините на вила во Оморани / Извор: Кајак.мк

Како втора причина за која некои од вилите имаат предност, оттаму го наведуваат фактот дека многу од гостите сакаат да разговараат со домаќините, односно многу од гостите сакаат да се запознаат со пределот во кој престојуваат, а како најдобар водич за тоа го избираат домаќинот, кој ќе им раскаже за минатото на местото, ќе ги прошета во околината и ќе им даде најдобар совет како да го искористат своето време низ прошетките.

„Многу од домаќините денес ги изненадуваат гостите со домашна храна, им приготвуваат ручек или, пак, им организираат часови по готвење традиционална локална храна. Овде мораме да потенцираме дека не секоја приватна вила го овозможува тоа, а исто така има веќе и мали хотели чиј менаџмент се приспособува на ваквите барања на гостите“, велат од Кајак.мк. 

Во однос на прашањето во кои периоди од годината има најголем интерес за изнајмување вили и во кои места, од Кајак.мк велат дека забележале оти најмал интерес за патување има во ноември и февруари.

„Тоа се месеци кога туризмот здивнува. Но не мора да значи дека ваквиот тренд е насекаде. Ако ги поделиме по годишни времиња, можеме со сигурност да кажеме дека преку летниот период повеќето патници пребаруваат сместувања што се наоѓаат покрај вода, почнувајќи од Охрид, Преспа, Дојран, реките низ Македонија, но сепак многу од патниците бараат и планински сместувања и селски предели каде што вилите имаат свои приватни базени за разладување. Денес најголем интерес има за планинските места, како Маврово, Попова Шапка, Пелистер, Пониква, Крушево, Берово и други дестинации каде што е присутна снежната покривка. Мораме да потенцираме дека годинава се соочуваме со можеби најлошата зимска сезона поради снегот што многу доцна ја зафати Македонија и топлото јануарско време“, велат од платформата.