Сузан Војчицки почина на 56-годишна возраст, по двегодишна борба со рак. Таа е поранешната извршна директорка на „Гугл“ и на платформата Јутјуб.
Смртта на социјалните мрежи ја објави нејзиниот сопруг Денис Тропер, а се обрати и Сундар Пичаи, извршен директор на „Алфабет“, матичната компанија на Јутјуб.
Оваа година, инаку, беше многу тешка за семејството. Во февруари од предозирање почина синот на Сузан и Денис, Марко (19). Една година претходно, Сузан објави дека планира да ја напушти компанијата за видеосодржини за да се фокусира на „семејни, здравствени и лични проекти“, беше објавено во тоа време. Ниту таа, ниту Јутјуб не објавија детали за нејзиното здравје.
Војчицки беше на чело на една од најпопуларните платформи на интернет од 2014 до 2023 година. Сузан е меѓу пионерите на интернетот, бидејќи уште во 1998 година, заедно со Сергеј Брин и Лери Пејџ, во својата гаража почна да работи на пребарувачот „Гугл“.
„Луѓето сакаат да гледаат други луѓе од целиот свет“, изјави Војчицки за „Њујорк Тајмс“ во 2014 година. „Тие ја сакаат својата телевизија и емисии, но исто така се заинтересирани да гледаат нови и различни креатори и нови, различни типови видеа.
Не само што беше визионер во својата област, туку имаше и слух за маркетинг. Штом дојде на чело на Јутјуб, таа се фокусираше на премиум рекламирање, како и на музика и детски апликации, благодарение на што беше постигната внатрешната цел на компанијата за една милијарда часови гледање дневно.
Подоцна, сепак, многу од овие планови се распаднаа поради влијанието на политиката и пропагандата заснована на националност и религија. По изборот на Доналд Трамп за претседател на САД во 2016 година, Јутјуб се соочуваше со постојани критики дека неговите алгоритми за препораки ги држат гледачите во т.н. „ехо комори“ и „ги хранеле со чисти лаги“.
Следеше бојкот од огласувачите, а американската влада ја тужеше компанијата во 2019 година за кршење на законите за приватност на децата на интернет.
Војчицки, после тоа, неколку години работеше на санирање на штетите, при што значително успеа да го врати угледот на Јутјуб, барем во основната дејност. Продажбата на реклами се зголеми повеќе од тројно од 2017 година на 29,2 милијарди долари во 2022 година.
.webp){kind=icon}
Во моментов нема коментари за веста. Биди прв да коментира...