Владата ќе му позајми нафта на град Скопје

Владата на денешната вонредна седница одлучи да позајми дела од државните нафтени резерви на градот Скопје со цел да се нормализира јавниот превоз.

Покрај ова, Бирото за јавни набавки донесе одлука со која се исполнети условите за спроведување на постапка со преговарање без објавување на оглас за да се скрати периодот за набавка на дериватот потребен на градот Скопје, објави МИА повикувајќи се на извори во Владата.

Со ова, како што се потенцира, Владата го затвора прашањето со настаната препрека во работењето на градското претпријатие за јавен сообраќај.

Веќе втор ден на улиците на Градот Скопје сообраќаат по триесетина автобуси кои користат метан. Поради недостиг на нафта возилата на ЈСП се паркирани во базите во Ѓорче Петров и Автокоманда.

Проблемот настана откако компанијата „Пуцко петрол“ престана да доставува гориво до базите на ЈСП поради неисплатени милиони долгови.

Ситуацијата се влоши и поради тоа што Бирото за јавни набавки минатата недела утврдило неправилности поврзани со новата јавна набавка. Бирото денеска соопшти дека набавката на нафта била оценета како неприфатлива и дало насоки за нејзино поништување.

Град Скопје обвини дека Бирото креира криза за гориво во ЈСП, со тоа што „за првпат од постоењето на претпријатието ја поништи редовната јавна набавка за гориво во ЈСП како смислено сценарио“.

За вечерва во 18 часот закажана е и вонредна седница на Советот на град Скопје.

Во моментов нема коментари за веста. Биди прв да коментира...

Остави коментар