Тест на „тојота ајго X хибрид“ - Градски штедливец кој не се плаши од автопат

Кога дојдовме да ја преземеме „тојота ајго Х ГР спорт хибрид“ (Toyota Aygo X GR Sport Hybrid), веднаш на стартот останавме импресионирани од бројката што нè дочека на возачкиот екран. Просечната потрошувачка на 100 километри изнесуваше 3,7 литри, што е неверојатно за тест-автомобил кој сигурно не бил поштеден од тешката новинарска нога на педалата за гас.

Bloomberg Adria

Втората работа што нè воодушеви се маневарските способности на градскиот адут на „Тојота“ на преполн паркинг. Со круг на вртење од само 9,4 метри лесно се извлековме од тесната ситуација и тргнавме на пат.

Да се вратиме на потрошувачката и „виновникот“ за неа. Станува збор за 1,5-литарски хибрид кој е преземен од поголемите „јарис“ (Yaris) и „јарис крос“ (Yaris Cross), а за да го вградат во компактните димензии на „ајго“ (Aygo), инженерите на „Тојота“ морале добро да се потрудат, па така предното растојание пораснало за дури 76 милиметри.

Bloomberg Adria

За среќа, тоа не ја нарушува естетиката на малиот кросовер кој е долг нешто малку над 3,7 метри. Напротив, би рекле дека изгледа подобро од кога било, а визуелниот впечаток дополнително го подигнуваат деталите од ГР Спорт (GR Sport) пакетот опрема. Нашиот тест-модел пристигна во двобојна црно-жолта варијанта која, заедно со малку „намуртениот“ изглед на предниот дел и маската со шара на пчелино саќе, му дава изглед на симпатичен стршлен. Или барем на лута пчела.

За да не навлегуваме понатаму во ентомолошки одредници, ќе кажеме само дека „најнабиениот“ пакет опрема подразбира и црни фелни од 18 инчи, а амортизерите и серво воланот се поставени за малку подинамично возење од обичниот модел.

Bloomberg Adria

Мотор кој не се срами ниту од автопат

„Aјго Х“ е поставен на модерната ТНГА-Б (TNGA-B) платформа на „Тојота“, а новиот хибриден погон со 116 коњски сили значително го променил карактерот на автомобилот во споредба со стариот еднолитарски мотор. Бројките на хартија нема да ве импресионираат - „ајго Х“ забрзува од 0 до 100 км/ч за 9,2 секунди, но во вака мало возило кое тежи 1.100 килограми, впечатокот во живо е многу подинамичен.

Во град најчесто ќе тргнувате и ќе се движите на струја, а кога малку посилно ќе го притиснете гасот, ќе се огласи трицилиндричниот мотор кој работи во синергија со електромоторот и литиум-јонската батерија со капацитет од 4,3 Ah.

Bloomberg Adria

При помали брзини не создава претерана бучава во кабината, но ако сериозно го притиснете при поголеми брзини, ќе го слушнете неговото ржење при високи вртежи, карактеристично за комбинацијата со е-ЦТВ (e-CVT) менувачот. „Aјго Х“ во ГР Спорт верзијата има дополнителни слоеви изолација, што до одреден степен ја намалува бучавата и го зголемува комфорот во кабината.

Со него тргнавме на море по автопат и можеме да кажеме дека нема од што да се срами. Максималната брзина достигнува до 180 км/ч, возењето со 130-140 км/ч е сосема подносливо во однос на бучавата и потрошувачката (5,5-6 литри), а „ајго“ во секој момент делува стабилно и сигурно. Ако претпочитате да го возите автомобилот до крајните граници, подгответе се дека брзо ќе мора да точите гориво бидејќи потрошувачката се искачува на околу седум литри, а резервоарот собира само 30 литри.

Bloomberg Adria

Внатрешност: Дигитализација со ВИ асистенција од Џеминај

Внатре во кабината веднаш е видливо дека станува збор за посебен пакет опрема. Возачот и совозачот ги пречекуваат едноделни спортски седишта со интегрирани потпирачи за глава, преслечени во комбинација од синтетичка кожа, кожа и ткаенина, со втиснати ГР логоа. Воланот исто така е преслечен со кожа и носи ГР ознака.

Bloomberg Adria

Пред возачот се наоѓа нов 7-инчен дигитален инструментален екран, додека со централниот дел доминира брзиот 10,5-инчен мултимедијален екран на кој можете безжично да ги поврзете „епл кар плеј“ (Apple CarPlay) и „андроид ауто“ (Android Auto). Голема новина во мултимедијата е и интеграцијата со Џеминај (Gemini AI) системот за вештачка интелигенција. Преку гласовни команди возачот може да комуницира со автомобилот како со личен асистент, да бара препораки за ресторани или да се информира за времето.

Покрај автоматскиот менувач е сместен безжичен полнач за мобилни телефони, а веднаш над него се два УСБ приклучоци, 12-волтен приклучок и две копчиња за греење на седиштата. Командите за двозонската автоматска клима се извлечени под инфозабавниот систем, на физички копчиња, и генерално би рекле дека „Тојота“ добро го балансира дигиталното и аналогното.

Bloomberg Adria

За врвен звук во кабината се грижи одличниот Џеј-би-ел (JBL) аудио-систем со пет звучници и сабвуфер во багажникот. Што се однесува до ергономијата, главната забелешка ни е што нема централен потпирач за рака, а бидејќи горниот дел од вратата е оставен во лим, ниту таму немате каде да го одморите лактот.

Bloomberg Adria

Од друга страна, мораме да ги пофалиме одличните, големи ретровизори поради кои воопшто нема да ви недостасува системот за надзор на мртвиот агол. Прегледноста е нешто полоша наназад и странично поради малите прозорци кои се отвораат како „пеперутка“. Тука ќе ви помогнат сензорите и камерата, иако нејзината резолуција е на ниво на мобилните телефони од доцните 2000-ти години.

Седиштата се комфорни, воланот се подесува само по висина, а не и по длабочина, но и покрај тоа ќе можете убаво и удобно да се сместите.

 

Компромиси на А-сегментот

Додека напред нуди изненадувачка просторност, на задната клупа на „ајго X“ јасно се гледаат ограничувањата на класата. Пристапот преку малите задни врати бара снаодливост, а хронично ќе недостасува простор за покрупните патници. Ако малку се стегнете, колената и главите на возрасните ќе издржат пократки релации, но во принцип задната клупа е наменета само за деца.

Bloomberg Adria

Што се однесува до багажникот, има капацитет од 231 литар. Скромно, но проверено доволно за викенд патување на помало семејство со неколку куфери. Со преклопување на задните потпирачи (поделени во однос 50:50), расте до максимални 829 литри.

Bloomberg Adria

Кога станува збор за АДАС (ADAS) системите, „Тојота“ не штедела. Адаптивниот темпомат работи добро, а тука се и напредните системи за спречување судири (автономно сопирање во итни ситуации со препознавање пешаци и велосипедисти), активна помош при одржување и напуштање на возната лента, систем за запирање во итни ситуации и автоматско управување со долгите светла.

На тестирањата на Еуро НЦАП (Euro NCAP), „ајго X“ освои 4 ѕвезди (со 78 отсто заштита за возрасни и деца) според новите, построги критериуми за оценување.

Bloomberg Adria

Цената на нашиот тест-модел се искачи до 25.830 евра поради богатата опрема, но основниот модел Х-плеј (X-Play) со истиот мотор моментално може да се добие по акциска цена од 19.900 евра, што го прави „ајго X“ многу привлечна градска опција.

(Цените треба да се проверат кај официјалните застапници бидејќи се менуваат во зависност од пазарот.)