Возевме „тојота РАВ4 ГР спорт“ - со вакви хибриди, лесно е да се заборават дизелашите

Во триесетгодишната „кариера“, „тојота РАВ4“ (Toyota RAV4) стана еден од најпродаваните автомобили во светот, па најновата, шеста генерација пред себе има високи стандарди. Судејќи според нашето искуство, Јапонците и овој пат го погодиле рецептот за речиси идеален семеен теренец, иако се одлучиле на храбар исчекор и понудата ја базирале исклучиво на електрифицирани (хибридни и плагин хибридни) погони.

Ние една недела возевме „елитен“ модел со потпис на спортскиот оддел на „Тојота“ – „Газу рејсинг“ (Gazoo Racing) – „РАВ4 ГР спорт“ (RAV4 GR Sport). Како и кај „корола крос“ (Corolla Cross), која неодамна ја имавме на тест, ГР-пакетот на опрема визуелно го подигнува автомобилот на повисоко ниво, но носи и подобрувања во однос на механиката, подвозјето и управувањето, кои резултираат со нешто подинамичен карактер.

Bloomberg Adria

Што се однесува до надворешноста, новиот РАВ4 доаѓа со преден дел во таканаречена форма на чекан (hammerhead). Станува збор за многу „коцкест“ и робустен дизајн, кој потсетува на класични теренци како „ленд крузер“ (Land Cruiser). Предните светла се елегантно извлечени во форма на потковица, под хаубата доминира голема црна маска на ладилникот со структура на саќе, додека браниците, праговите и проширените рабови на крилата се изведени во црн сјај, заменувајќи ги стандардните хромирани елементи. Задниот дел исто така е добро погоден и целиот автомобил изгледа складно, и покрај габаритните димензии.

Bloomberg Adria

Тука се и црните алуминиумски фелни од 20 инчи, трагата на тркалата е проширена, а каросеријата е спуштена за 15 милиметри во однос на стандардниот модел. Црвената боја во комбинација со црните детали, покривот и крилата, му дава на новиот РАВ4 спортски и моќен впечаток, кој продолжува и во внатрешноста на возилото.

Внатрешност без многу шминка

Дизајнот на ентериерот исто така потсетува на полнокрвните теренци од пред околу триесет години. Дигиталните инструменти се добро вклопени со мноштво копчиња, пластиката низ целата кабина главно е тврда и дејствува издржливо.

Bloomberg Adria

Предните седишта со подобрена странична потпора се преслечени во комбинација од синтетичка кожа и материјал сличен на опточена кожа. Воланот со трокрак дизајн е преслечен со перфорирана кожа и го носи логото ГР, додека педалите за гас и сопирачка се изработени од алуминиум. Црвените контрастни шевови се протегаат по седиштата, воланот и рачката на менувачот.

И покрај тие детали, внатрешноста генерално не зрачи со луксуз, иако тоа би можело да се очекува со оглед на бараната цена. Во секој случај, ергономијата кај РАВ4 е без грешка. Воланот може добро да се намести по длабочина и висина, седиштата исто така (имаат и лумбална потпора), прегледноста е одлична во сите насоки, а особено напред, каде што подигнатите странични делови на хаубата јасно покажуваат колкави се димензиите на возилото.

Тука, се разбира, е и камерата од 360 степени со паркинг-сензори напред и назад, која го олеснува животот при градски маневри, и покрај габаритноста на возилото и должината од над 4,6 метри. На широката централна конзола, покрај менувачот и држачите за чаши, се наоѓа голема преграда за одлагање под централниот потпирач за рака, копчиња за избор на режимот на возење, два УСБ-Ц приклучоци (вкупно има пет во кабината) и безжичен полнач за мобилен телефон.

Bloomberg Adria

Климатизацијата е, како и самиот погон, хибридна. Некои од копчињата физички се извлечени под инфозабавниот систем, додека остатокот е на допир и се наоѓа во долниот дел од големиот екран со дијагонала од 12,9 инчи. Системот поддржува безжични епл кар плеј (Apple CarPlay) и андроид авто (Android Auto), а за доживувањето на звукот е задолжен аудиосистем „џеј-би-ел“ (JBL Premium) со осум звучници, кој сепак не нè воодушеви премногу.

Пред возачот има екран од 12,3 инчи, дополнет со солиден ХАД (head-up дисплеј), додека на воланот се копчињата за управување со радиото, повиците и адаптивниот темпомат. Токму тој темпомат мора посебно да го пофалиме бидејќи работи фантастично и многу помага при возењето. Практично го користевме цело време бидејќи не е нападен, туку повеќе сугестивен и функционира во синергија со возачот. Се разбира, подготвен е и целосно да ги преземе командите, што ни беше големо олеснување во неизбежните летни метежи на автопатот.

Bloomberg Adria

Другите системи за помош при возењето работат добро, иако знаат да бидат малку здодевни со постојаното ѕвонење, но може да се исклучат. Особено е ригорозна камерата што ги следи будноста и концентрацијата на возачот – штом ќе ја свртите главата подолго од една секунда, гласно ве предупредува.

При возењето најмногу ни пречеше тоа што на возачкиот дисплеј постојано ни се појавуваше известување дека системот за препознавање сообраќајни знаци не работи и дека треба да се консултираме со упатствата, како и дека течноста за миење на ветробранското стакло е при крај. Не можевме ниту да вклучиме Гугл мапс (Google Maps) на централниот екран, иако мобилниот уред беше уредно поврзан за повици. Сето тоа се дреболии што се решаваат со едно ажурирање на системот, па затоа не им придадовме преголемо значење.

 

Она што е многу поважно и што не може да го поправи никакво ОТА-ажурирање (over-the-air update) се пространоста, комфорот и возните карактеристики на автомобилот. За среќа, во сите три сегменти РАВ4 блеска.

Простор за патниците има во изобилство, и за главата и за нозете, назад дури ни тројца високи патници нема премногу да си пречат, а детското седиште се поставува многу лесно. Во зависност од моторот (класичен хибрид или плагин хибрид со батерија), зафатнината на багажникот се движи од 446 до 520 литри, со можност за проширување со преклопување на задните седишта на речиси 1.700 литри.

Bloomberg Adria

Суверен во возењето

Под хаубата на нашиот тест-модел ГР имаше самополнечки хибрид (HEV), односно комбинација од 2,5-литарски четирицилиндричен бензински мотор и електромотор со e-CVT менувач, кои развиваат вкупно 194 КС. Забрзувањето од 0 до 100 км/ч е за помалку од осум секунди, со максимална брзина од речиси 190 км/ч. Погонот на сите тркала се остварува преку дополнителен електромотор на задната оска (AWD-i).

Верзијата „газу“ на РАВ4 значи дека се вградени поцврсти пружини, модифицирани амортизери и засилена задна оска за поголема торзиска крутост. Воланот исто така е малку подиректен отколку кај обичните модели, а автомобилот е опремен и со систем за дозирање на сопирањето за што помалку да се навалува во свиоците.

Bloomberg Adria

Што значи сето тоа при возењето? „РАВ4 ГР спорт“ е навистина нешто подинамичен, но не е спортски автомобил. Иако и звучната изолација е нешто подобрена, комбинацијата од бензински мотор и менувач e-CVT значи дека во кабината и понатаму ќе продира бучава кога ќе го притиснете моторот до високи вртежи, но кога ќе ја стабилизирате брзината и ќе почнете да крстосувате, тогаш „тојота“ доаѓа до израз. Кабината се потопува во релативна тишина, која при големи брзини на автопат повеќе ќе ја нарушуваат бучавата од ветерот и гумите отколку моторот.

Автомобилот е стабилен, предвидлив, доволно моќен и агилен за претекнувања, а покрај сето тоа и удобен, така што долгите патувања воопшто не се стресни. Напротив, со РАВ4 без проблем ќе голтате стотици километри на автопат, заборавајќи кога сте го наполниле резервоарот, бидејќи потрошувачката тешко може да се „натера“ над осум литри дури и кога погонскиот склоп го „притискате“ до крајните граници. Колку малку троши, доволно зборува податокот дека просечната потрошувачка на возило, кое автомобилските новинари секоја недела воопшто не го штедат, изнесувала само 5,2 литри на 100 км. Импресивно и доволно за да ги заборавите дизелашите и обичните бензинци, кои повеќе не се во понудата.

Bloomberg Adria

Заклучок и цена

Да ја сумираме приказната за „тојота РАВ4 ГР спорт“ – можеме да кажеме дека го оправда своето педигре на врвен семеен теренец чиј најголем адут е сестраноста. Можеби по ништо поединечно не се истакнува, но целокупниот пакет е навистина на високо ниво и одлично заокружен. Го издаваат некои дреболии, како инфозабавниот систем, односно главно пластичната внатрешност, но реално гледано – ако барате сигурен, удобен, штедлив и простран автомобил за семејство со повеќе членови, би требало да биде при самиот врв на вашата листа за тест-возење.

На раскошната ГР спорт-опрема може да ѝ се забележи и цената, која се искачува нешто над 57.000 евра, но почетните модели започнуваат од значително поприфатливи 45.000 евра. Како и кај сестринската „корола крос“, се гледа дека „Тојота“ има доволно искуство и знаење да направи автомобил што брзо ќе ви се вовлече под кожа и лесно ќе се навикнете на животот со него. Така е и со РАВ4, од кој се збогувавме со тешко срце.

- Автомобилот е тестиран на хрватскиот пазар, па цените може да се разликуваат во зависност од локалниот пазар и дистрибутерот.