Богат понудувач потрошил рекордни 55 милиони дирхами (15 милиони долари) во Дубаи за уникатна регистерска табличка за автомобил, надминувајќи ја границата поставена во Обединетите Арапски Емирати (ОАЕ) пред повеќе од една деценија.
„Емиратс аукшн“ (Emirates Auction LLC) ја продаде регистарската табличка П 7 (P 7) - која на прв поглед изгледа исто како седумка со буквата П на страна - во саботата за време на хуманитарна аукција, соопшти компанијата.
Приходите од аукцијата се наменети за финансирање на глобалната иницијатива за помош во храна „Една милијарда оброци“ што ја започна шеикот Мохамед бин Рашид.
Во ОАЕ сè почести се добротворните аукции на кои се врши наддавање за ексклузивни регистарски таблички, кои ултрабогатите ги користат за да ги покажат својот статус и богатство. Последната аукција што собори рекорд беше одржана во Абу Даби во 2008 година, кога локалниот бизнисмен Саид Абдул Гафар Кури плати 52,2 милиони дирхами за регистерска табличка со број еден.
Идентитетот на победникот на аукцијата одржана викендов не е соопштен.
Ексклузивните регистарски таблички исто така достигнаа многу високи цени и надвор од Блискиот Исток: претходно годинава, поединец во Хонгконг купи регистарска табличка само со буквата Р (R) за 25,5 милиони хонгконшки долари (3,2 милиони американски).
Прочитајте повеќе: Во Хонгконг продадена регистарска табличка за три милиони долари
Дубаи со години е прибежиште каде што мегабогатите се фалат со своето богатство и уживаат во својот животен стил без даноци. Додека стравувањата од економски пад се зголемуваат во другите делови на светот, економијата на емиратот останува силна - особено со високите цени на нафтата од корист на нивните соседи и најважни клиенти. Приливот на богатство поттикна и раст на пазарот на недвижности.
Прочитајте повеќе: Нема крај на треската за брендирани станови во Дубаи
Дури и доселениците со просечни плати сега купуваат автомобили што од неодамна можат да си ги дозволат благодарение на пониските даночни стапки отколку што плаќале во нивните матични земји. Сепак, неодамнешниот пандемиски бум поттикна зголемени кирии, ставајќи поголем притисок врз граѓаните од средната класа.
Бизнисменот Балвиндер Синг Сани, познат и како Абу Сабах, купил табличка со ознака Д 5 (D 5) во 2016 година за 33 милиони дирхами. „Дубаи е град на злато“, рече тој во интервју во понеделникот. „Тоа е град на големи, доверливи и фини луѓе. Затоа секој сака да го покаже својот статус“.
.webp){kind=icon}
