Кој не би сакал да има возило по нарачка со посебна модна и ароматична нота, особено кога производителот ветува дека тоа ќе биде едно и единствено возило од таков вид во светот? И додека за некои модели на луксузна облека или чанти треба да се чека неколку години, со компанија како „Ролс-Ројс“ (Rolls-Royce) е можно да се создаде уникатно возило во рекордно време, како што имав можност да се уверам оваа година при посетата на фабриката на „Ролс-Ројс“ во Гудвуд, Велика Британија, поточно одделот за специјални нарачки „Биспоук колектив“ (Bespoke Collective), кој се наоѓа на имотот што некогаш му припаѓал на лордот Марч, а денес на војводата од Ричмонд.
Во соработка со холандската дизајнерка од светот на високата мода Ирис ван Херпен и нејзиното ателје, во тек беше завршната фаза на изработка на уникатна персонализирана нарачка, чија точна цена е тајна, но се претпоставува дека е во опсег од десетици милиони евра.
„'Фантом синтопија' (Phantom Syntopia) е најамбициозниот, уникатен и автентично изработен 'фантом' што некогаш сме го создале и јасно потврдува дека 'Ролс-Ројс' е вистински луксузен бренд. Развојот на моделот се заснова на дваесетгодишни заеднички напори со најпознатите дизајнерски куќи во светот, уметници и јувелирници и на 'фантом' му дава позиција на празно сликарско платно со можност за персонализација по нарачка. Преку соработката со меѓународно реномираната дизајнерка Ирис ван Херпен, уште еднаш ги поместивме границите на иновациите, изработката и персонализацијата, не само за автомобил туку и во луксузниот сектор како целина“, вели Торстен Милер-Отвос, извршен директор на „Ролс-Ројс мотор карс“ (Rolls-Royce Motor Cars).
Новинарот на „Блумберг Адрија“, Дејан Давид Кемперл (лево), со дизајнерката Ирис ван Херпен на презентацијата на уникатниот модел на „Ролс-Ројс“ 2023. | Bloomberg Adria
„За ова специјално партнерство бев инспирирана од концептот на 'ткаење на водата' и чувството на движење го трансформирав во искуство на флуидност внатре во автомобилот. Сакав тоа да стане неспоредливо искуство, како кога сте обземени од силите на природата. Моќното возење што го овозможува 'фантом' инспирира тридимензионални бранови во внатрешноста на автомобилот, отелотворувајќи ја инвентивноста на природата. Кога се запознав со концептот на 'Биспоук колектив', сфатив дека светот на 'Ролс-Ројс' е многу сличен на светот на високата мода. Секое парче облека што го создавам е уникатно, направено по мера за моите клиенти, исто како што и секој 'ролс-ројс' е уникатен. Моите клиенти доаѓаат на проба во нашето ателје во Амстердам, исто како што 'Ролс-Ројс' ги кани клиентите во Гудвуд за време на процесот на дизајн и конструкција. Ова партнерство на многу начини е природна симбиоза“, изјави модната дизајнерка Ирис ван Херпен за време на претставувањето на моделот.
На основа на моделот „фантом екстендед“ (Phantom Extended), најдобрата основа за персонализација, ова е технички најкомплексната нарачка што некогаш ја реализирал „Биспоук колектив“. По четири години континуиран развој, ова исклучително уникатно дело беше завршено и го зазеде своето место во приватната колекција на колекционер и клиент чиј идентитет е тајна.
Контролна табла на „ролс-ројс фантом синтопија“ | Bloomberg Adria
Името „фантом синтопија“ доаѓа од револуционерната колекција на Ирис ван Херпен за 2018 година, дизајнирана врз основа на биомимикрија, каде што уметноста наоѓа инспирација во шарите и формите што се среќаваат во природата. Исто како што колекцијата вклучува серија скулптурирани парчиња облека што оживуваат во движење, „фантом синтопија“, со„прелевање на течноста“ како тематика, ја прикажува недопирливата етерична убавина на движењето на течноста преку цврсти материјали.
Внатрешноста на „фантом синтопија“ вклучува елементи направени во работилниците на „Ролс-Ројс“, со помош на водечките мајстори техничари и оние создадени во амстердамското ателје на Ирис ван Херпен.
„Вивинг вотер старлајт хедлајнер“ (Weaving Water Starlight Headliner), технички најкомплексната верзија на покрив на „ролс-ројс“ некогаш создадена, е направена од беспрекорни парчиња кожа, селектирани од повеќе од 1.000 примероци. Прецизните симетрични резови откриваат сребрена текстура „течен метал“, изработен од најлонска ткаенина од колекцијата „Ембоусд саундс“ (Embossed Sounds) на Ирис ван Херпен, поради што покривот во внатрешноста на возилото се чини тридимензионален. Завршува со 162 цветни ливчиња, рачно зашиени од членовите на тимот на Ирис ван Херпен, процес што траел речиси 300 часа.
Покрај тоа, рачно се поставени и 1.000 фибероптички ѕвезди, кои со треперење создаваат чувство на движење. Само за изработка на тој елемент се потрошени вкупно 700 часа. Мотивот на „вода што тече“ постигнат со овие ливчиња се протега и до т.н. галерија, целата ширина на предната маска, а е применет и во дизајнот на други делови: контролната табла, патничките плочи, седиштата, но и на хаубата. Тој ефект врз хаубата е постигнат со комбинирање неколку слоја боја и лак, кои содржат различни количества стаклени честички. Прво, површината е покриена со црна боја измешана со 0,9 отсто стаклени честички. Потоа, вешти техничари го постигнаа мотивот на „водата“ со проѕирен слој измешан со 1,4 отсто сјајни честички - исклучително сложен процес што траел повеќе од три недели. Пред да започне со работа, тимот минал четири месеци усовршувајќи ја техниката и спровел девет теста пред да дојде до идеалното количество стаклени честички за да го постигне саканиот ефект.
За да создадат светкава надворешност, од „Биспоук колектив“ направиле уникатна боја - ликвид ноар (Liquid Noir). Под сончева светлина се откриваат виолетови, сини, магента и златни тонови, во зависност од аголот од кој гледате. За да се постигне таков ефект, најтемната, црната боја е покриена со слој што содржи рефлективен пигмент. За да се додаде суптилен елегантен сјај е развиена сосема нова техника за нанесување на пигментот на безбојната лакирана површина, што траело неколку месеци, вклучувајќи и повеќе од 3.000 часа тестирање.
Внатрешната страна од покривот на „ролс-ројс фантом синтопија“ | Bloomberg Adria
„Фантом синтопија“ го продолжува наследството на истражување за материјали со највисок квалитет. Ова уникатно возило му оддава почит на наследството на „Ролс-Ројс“ и потсетува на времето кога возачкото седиште беше обложено со издржлива кожа, а задните седишта со луксузни примамливи ткаенини. Така, предните седишта на моделот „фантом синтопија“ се обложени со кожа „меџик греј“, која има сјајна површина. Задните се покриени со ткаенина специјално произведена за овој модел, изработена од свилен материјал со карактеристичен дезен што потсетува на рефлексиите на површината на водата во текот на ноќта. Седиштата се тапацирани со техника на шиење што често се користи за изработка на фин мебел, каде што везот на ткаенината се нанесува на задната страна. На овој начин се создава впечаток на тридимензионалност, а истовремено се постигнува мазна, континуирана површина без видливи шевови - исто како рефлексиите на површината на водата.
Во согласност со иновативниот пристап на „фантом синтопија“, ова е првиот автомобил на „Ролс-Ројс“ што има и ексклузивно изработен мирис. Мирисот е создаден од експерт за парфеми - сега познат како „носот на колективот Биспоук“ - во тесна соработка со идните сопственици на возилото. Парфемот е дизајниран да создаде трајни спомени и да ги дополни другите мириси што доаѓаат од материјалите што се користат во автомобилот. Главната нота е кедрово дрво и како дел од концептот на автентичност во кој овој проект опстојува во секој дел, за изработка на парфемот е искористено кедрово дрво од регионот од каде што потекнува сопственикот на возилото. Основата на парфемот е исто така ирисот, со додаток на кожа, која конечно се меша со роза од Патагонија и нежна нота на лимон.
Шема што симболизира мотив на бранови во внатрешноста на автомобилот | Bloomberg Adria
Специјално развиен механизам за ослободување мирис е поставен во потпирачот за глава. Оваа патентирана технологија вклучува иновативни материјали, првично користени за медицински цели, за да се осигури дека мирисот се ослободува во соодветни дози за долготрајно и софистицирано сензуално искуство. Процесот на работа само на мирисот траел повеќе од две години, вклучувајќи ригорозни тестирања на многу високи и многу ниски температури за да се осигури дека аромата ги задржува своите карактеристики во сите услови.
Бидејќи соработката е производ на уникатна и персонализирана нарачка, „Ролс-Ројс“ се обврза дека истата таа нема да се повтори.
.webp){kind=icon}
