Љубителите на автомобили од целиот свет и овој август се собраа на Неделата на автомобили во Монтереј, Калифорнија.
Оваа година повеќе од 20 производители на автомобили ги претставија своите најдобри напори за да привлечат елитни купувачи: концепти за електричен СУВ со врати што се отвораат наназад, суперавтомобили покриени со злато и со сложени рачно насликани слики од други автомобили се само некои од нив, известува Хана Елиот за „Блумберг“.
Иако традиционалните симболи на моќта, како коњските сили и вртежниот момент, сè уште се важни (пример А: „фискер ронин“ со 1.000 КС и „пининфарина Б95“ со 1.877 КС), најдобрите нови автомобили користат технологија наместо моќ, вели таа.
Повеќето достигнувања на новата технологија се фокусирани на користење електрична енергија, како во случајот со „ронин“. Цената на електричниот кабриолет од 385.000 долари доаѓа од контроверзната компанија најпозната по нејзиниот харизматичен и плоден претседател Хенрик Фискер. Ограничен на 999 возила, тој ветува невиден (и сè уште неверификуван) досег од 960 километри. Производството ќе започне во втората половина на 2025 година.
Хрватската компанија на Мате Римац претстави специјално издание на својот рекордно брз електричен хиперавтомобил „римац невера“ под името „тајм атак“. Цената на „невера“ е 2,1 милиони долари, а може да забрза од 0 до 100 км/ч. за 1,85 секунди; максималната брзина е 415 км/ч. Новиот модел слави низа брзински рекорди; се фали со 1.813 коњски сили и лимитирано издание од само 12 примероци, од кои сите се веќе распродадени.
„Ланзадор“ на „Ламборгини“ е концептуален модел на идно електрично возило, со четири седишта. Тоа ќе ја има разновидноста на „ламборгини урус“ и возни перформанси инспирирани од „ламборгини хуракан стерато“; исто така има и два електрични мотора, по еден за секоја оска, со што обезбедува погон на сите четири тркала.
Италијанскиот иноватор „Пининфарина“ го претстави „ПУРА вижн“, концептуален СУВ со врати во стилот на кочија (кои се отвораат наназад) и четири седишта, плус фрижидер за вино и централен екран на допир, кој може да се исклучи и да се скрие во контролната табла. „Пининфарина“ не објави процена за цената на возилото, бидејќи сè уште е во фаза на концепт, но идејата би можела да му стане блиска конкуренција на електричниот „коенигсег гемера“ со четири врати, вреден 1,8 милиони долари.
Брендот исто така го претстави целосно новиот „пининфарина Б95“, електричен автомобил со отворен покрив, вреден 4,8 милиони долари, кој комбинира класичен тркачки стил со нови технологии, како и „едиционе нино фарина“ со својот постоен „пининфарина батиста“ од 2,2 милиони долари за кој пишуваше „Блумберг“ во 2019 година.
Acura ZDX Type S | Acura
Во рангот на електрични возила што не се толку скапи како горенаведените модели, „Киа“ го претстави електричниот СУВ „киа ЕВ6“, со лимитирана верзија во темнозелена боја.
„Инфинити“ го претстави „инфинити кју-екс монограф концепт“, за кој компанијата вели дека е инспириран од нејзиното јапонско наследство и навестува визија за идниот стил. Овој импозантен СУВ има осветлување што личи на дигитални клавиши и панорамски покрив.
„БМВ i5 M60“, електрична лимузина, има проценета брзина од 411 км/ч. Тој им се придружува на СУВ iX и лимузината i4, меѓу другите, во серијата на целосно електрични возила на БМВ. СУВ „iX5 хајдроген“ на БМВ, пак, е базиран на „БМВ X5“ и претставен како концепт на саемот IAA во 2019 година.
„Мерцедес бенц“ ги претстави двата типа возила: електричниот СУВ „мајбах EQS“, како и „мајбах најт сериес“ и концептот „вижн уан-илевн“, модерна верзија на историскиот суперавтомобил „C111“. Исто така, го претстави новиот „мерцедес-AMG GT“, наследникот на моќната и стилска купе-лимузина што првпат почна да ја прави во 2015 година - сега со опција за четири седишта. Исто така, прикажано е специјалното издание на „мерцедес-AMG SL: 2024“, „мерцедес-AMG SL 63 мануфактур биг сур“, достапно само за американскиот пазар во ограничен број.
Посетителите во Монтереј имаа можност да го видат „астон мартин DB12 воланте“ од 2024 година, отворена верзија на исклучителниот „астон мартин DB12“, со твин-турбо V-8 мотор, кој развива 670 коњски сили и постигнува забрзување од 0 до 100 км/ч. за 3,6 секунди. Максималната брзина му е 325 км/ч. Почетната цена е околу 265.000 долари. Британскиот бренд исто така го прикажа и „валур“, специјално издание V-12 во боја на скапоцени камења, ограничено на 110 примероци.
Тука е и новото „порше 718 спајдер RS“, роудстер со среден мотор што произведува 493 коњски сили и 331 фунта-стапка вртежен момент, со предложена малопродажна цена од 162.150 долари кога ќе започне да се продава во пролетта 2024 година.
„Мекларен“ го претстави „мекларен 750S“ од 2024 година, полесна и помоќна верзија на моделот 720S. Цената за „купе 750S“ почнува од 331.740 долари; верзијата „спајдер“ почнува од 352.740 долари.
„Масерати“ премиерно го претстави „масерати MCXтрим“. Направен само за тркачка патека, тој е базиран на постојниот спортски автомобил „масерати MC20 V-6“ од 212.000 долари, но нуди дополнителни технички спецификации и 730 коњски сили. Направен е само во 62 примерока.
Maserati MCXtrema | Maserati
Како таков, тој е наменет за возачи што не прават компромиси во поглед на перформансите, софистицираноста на дизајнот и луксузот, т.е. создаден е за верните колекционери на „масерати“, кои сакаат да доживеат незаборавно возачко искуство на возбудливи патеки.
Овој нов производ е партнерство помеѓу дизајнерскиот центар и инженерскиот тим на „Масерати“, кои создадоа тркачки автомобил способен да го пренесе наследството на познатиот „масерати MC12“ во светот на натпреварувањата, но и да го инспирира идното тркачко производство на брендот „Масерати“.
Извршниот директор на „Масерати“, Давиде Грасо, истакнува дека новиот „масерати MCXтрим“ е создаден со цел да понуди ексклузивен производ што може да постави нова парадигма за тркачките автомобили.
„Проектот им е посветен на внимателно одбрани клиенти, кои ставаат акцент на импресивните детали - од иновативен дизајн до исклучителни перформанси. ’MCXтрим’ го поседува спортскиот дух карактеристичен за ДНК на ’Масерати’, кој со своите непоколебливи перформанси и врвно производство се истакнува во светот на луксузните автомобили“.
„Хенеси“ ја претстави револуционерната верзија на „веном F5“ за патишта, „веном F5 револушн роудстер“, лимитирана верзија на својот хиперавтомобил од 2,1 милиони долари. Овие автомобили користат 6,6-литарски V-8 мотор со двоен турбополнач, а се тврди дека развиваат 1.817 коњски сили.
Данскиот бренд „Зенво аутомотив“ имаше глобално јавно претставување на „зенво аутомотив аурора“, за која се вели дека има забрзување од 0 до 96 км/ч. за 2,3 секунди и максимална брзина од над 480 км/ч. Овој суперавтомобил од 2.590.000 евра доаѓа во две различни варијанти и е придвижуван од комбиниран 6,6-литарски V-12 мотор со четири турбополначи и електричен мотор, кои заедно развиваат вкупно 1.850 коњски сили. Може да помине 35 километри користејќи електрична енергија. Производството ќе започне во 2025 година.
Од друга страна, „Форд“ го претстави „форд мустанг GTD“ од 300.000 долари, со V-8 мотор со 800 коњски сили, кој ќе започне да се испорачува кон крајот на 2024 година.
„Цингер вијаклс“ го откри „блекбрд“, најновата итерација на својот 3Д-отпечатен модел „21C“, хиперавтомобил од 2 милиони долари. Автомобилот со 1.350 коњски сили на компанијата со седиште во Лос Анџелес им оддава почит на иновациите и шпионскиот авион „SR-71 блекбрд“.
Ретки примероци по специјално барање
Оваа група на автомобили се издвојува по својата екстремна реткост и/или способност да им ги исполнува посебните желби на клиентите.
„Бугати“ е на чело на таа група. Тој претстави уникатен автомобил направен по специјално барање. „Бугати кајрон суперспорт голден ера“ ја слави историјата на француската марка, со уметнички дела на историски модели на „Бугати“ насликани на неговите страни, вклучувајќи ги и „тип 41 ројал“ од 1920-тите и „тип 57 SC атлантик“, кој често се смета за еден од најубавите автомобили што се некогаш дизајнирани. Направен од посебниот тим „Сур мезур“ на „Бугати“, овој автомобил со 16 цилиндри му беше лично предаден на неговиот нов сопственик во Монтереј. Компанијата не го откри името на лицето, но филијалата што ја обработи трансакцијата беше „Бугати Гринвич“.
Новиот „дроптејл“ на „Ролс-ројс“ е возило направено по нарачка, слично на моделите „V-12 боаттејл“ од 2021 година и „свептејл“ од 2017 година. Чини над 30 милиони долари. Има V-12 мотор, седишта за двајца и дизајн на заоблена решетка, што досега не е видено на возило од „Ројс-ројс“. Направен е само во четири примероци. Брендот го прикажа и неописливиот „ролс-ројс спектар“, своето прво целосно електрично возило.
„Ферари“ се грижи за своите високоплатежни клиенти со специјални автомобили инспирирани од тркачката патека. „Ферари SF90 XX“ е првиот патнички автомобил во ексклузивната програма XX на „Ферари“, која на одреден број клиенти им нуди екстремни автомобили наменети за употреба исклучиво на патека. При нормално возење има 786 коњски сили, но со новата функција на засилување за електричните мотори, вкупната моќност на системот е 1.016 коњски сили. „Ферари“ вели дека овој автомобил има време на забрзување 0-100 км/ч. за 2,3 секунди, што е за 0,2 секунди побрзо од „SF90“. „Ферари XX спајдер“ е отворена верзија на истиот модел во лимитирано издание.
Дури и „Лендровер“ учествуваше во создавањето ретки примероци. Специјалната верзија „рејнџровер SV кармел едишн“ за 2024 година е слична на „рејнџровер SV кармел едишн“ од 2023 година, кој беше ограничен само на 17 возила и чинеше 345.000 долари. Но оваа верзија е уште поскапа и поретка: создаден исклучиво за северноамериканскиот пазар, најновиот„кармел едишн“ доаѓа само како варијанта со долга оска и чини 370.000 долари. Направени се само седум парчиња.
.webp){kind=icon}
Во моментов нема коментари за веста. Биди прв да коментира...