text size
Минатата година, „Бентли“ (Bentley) објави дека ќе започне со специјална линија од само 18 автомобили. Наречени „батур“ (Batur), секој од нив ќе користи шасија од „континентал ГТ спид“ (Continental GT Speed) и ќе излезе од зградата на „Бентли мулинер“ (Bentley Mulliner) со нова каросерија, внатрешност дизајнирана по нарачка, според желбите на купувачот, како и мотор подобрен со надградби на перформансите. За таквата ексклузивност, „Бентли“ постави почетна цена од 1,65 милион фунти (2,11 милиона долари).
Значи, кога пристигнав во седиштето на производителот на автомобили во Кру, Англија, за да го возам „батур“, требаше да прашам што се добива за тие пари. Секако, автомобилот е повеќе од само естетски детали или дополнителна моќност во однос на „континентал“.
Bentley
Како што е редот, тој нуди повеќе. Шестлитарскиот твин-турбомотор W-12 на „батур“ тековно е најмоќна верзија на препознатливиот мотор на „Бентли“, со 740 КС и осумбрзински менувач со двојна спојка и масивни карбон-керамички сопирачки. Има нов систем за довод и турбополнење, усогласен со ажурирана калибрација на моторот и нова калибрација на менувачот што помага да се испорача таа моќност; новодизајнираните компресори за турбополнење ја подобруваат енергетската ефикасност, а воздушните канали за 33 отсто поголеми од оние на „континентал“ го подобруваат управувањето со топлината.
Потоа, тука е внатрешноста, која може да се пофали со ексклузивни елементи за „батур“, како што е новиот систем за звук „Наим“ (Naim) и костумизација на речиси секој квадратен сантиметар од кабината, од отворите за воздух до компонентите околу прозорците и рамките на вратите, контролната табла и конецот со кој е зашиена кожата околу седиштата.
„Батур“ е најекстремното „бентли“ што е направено. Дури тежи 110 фунти помалку од 5.029 фунти тешкиот „ГТ спид“. Се движи со грациозност за која повеќето производители на автомобили можат само да сонуваат. Но, сите знаеме дека неговата длабока привлечност не лежи во начинот на кој вози. Таа најмногу е поврзана со фактот дека во овој автомобил се чувствувате како вистински тајкун.
Редок примерок
„Бентли“ дебитира со „батур“ во август 2022 година, по две години развој за време на пандемијата на ковид-19. Не е тајна дека во тој временски период, додека многумина од нас учеа да печат леб или правеа маратони со познатите ТВ-серии, побогатите почнаа да собираат играчки, особено часовници, накит и автомобили. „Батур“ е одговорот на „Бентли“ на тоа барање. „Можевме да продадеме двојно повеќе од она што го направивме“, вели Бен Линде, водач на специјалниот проект во „Мулинер“.
„Тоа е ексклузивноста“, вели Џонатан Смедли, портпарол на „Бентли“ во Кру. „Луѓето што ги купуваат овие автомобили чувствуваат дека вредноста е оправдана“.
Го возев „батур“ 30 минути низ Чешир по пат со две ленти, доволно тесен за да ми зачука срцето секогаш кога минував покрај друг автомобил. Тоа не е многу време, но ми даде одлична претстава за моќта на автомобилот.
Бескрајната низа кружни текови во Англија ги стави на тест управувањето на „батур“ на четири тркала и прецизното векторирање на вртежниот момент; постојано чувствував и леснотија и спортски карактер додека се движев по руралните патишта под силниот летен дожд. „Батур“ вози со жестокост, искалена од рамнотежа и контрола. Неговата воздушна суспензија и електричната контрола против превртување го одржуваа убаво - избалансиран и контролиран - додека „шишав“ покрај полињата што му благодареа на дождот. Ми се допаѓаат големите силни сопирачки, кои го приземјуваат автомобилот веднаш штом ќе затреба. Уживав во богатиот звук од звучниците што „Наим“ ги создаде специјално за овој автомобил; Карла Бруни, зарем не? Максималната брзина е 209 милји на час (336 километри на час).
Внатрешноста е пространа, со седишта за двajцa и истиoт одличен систем за информации и забава што се наоѓа во „континентал“, како што е ротирачкиот дисплеј сместен во контролната табла што нуди кристално јасна навигација, звук и удобна графика. „Епл кар плеј“ (Apple CarPlay), вградениот ви-фи хотспот и безжичното полнење се стандардни. Како и хедап-дисплејот и камерата за ноќно гледање, приспособливиот темпомат и асистентот за избор на лента, плус дополнителни системи за предупредување и избегнување судир доколку ги сакате. Во автомобилот што го возев, рачно зашиените седишта во тиркизна и сива боја се шират како врат на кобра од двете страни на моите рамена; сивите двојни шевови по должината на рамењата се совпаѓаат со дизајнот на предната решетка. Карбонски елементи ја покриваат контролната табла; отворите и другите копчиња во стил на оргула се направени од титаниум. Секој потпирач за глава е украсен со големото крилесто лого на „Бентли“ во сива боја и врамено со детали од слонова коска. (Нема задни седишта, само мала платформа за чанта или патна торба.)
Сè е направено со квалитет и грижа, кои произлегуваат од рачната изработка и рачното вградување; видов како персоналот инсталира дел од централната конзола. Со мазното возење („Бентли“ ја надгради шасијата за да овозможи автомобилот да се справи со дополнителната моќност) и раскошната удобност внатре, „батур“ е нешто што можете да го возите секој ден, цел ден - без разлика дали во град или на автопат - без да се заморувате. Тоа е секојдневен автомобил за 0,001 отсто од населението.
Притаен тигар, скриено „бентли“
Има многу за восхит во физичките привлечности на автомобилот. Големите фарови изгледаат како крила и се најубавите што сум ги видела. Се чини дека решетката се бранува, со десетици ситни, нежно заоблени триаголници наредени на начин да доловат одраз на планина над езеро, исто како кај езерото Батур во Бали, Индонезија.
Bentley
Одзади, „батур“ изгледа помало и потенко од „континентал“. Една линија се протега од врвот на хаубата по должината на каросеријата до Ц-столбовите, издолжувајќи го целиот автомобил. Неговиот целосен став е сличен на мачка, со став на моќ визуелно натегната кон неговиот грб како да е подготвен за напад. Тој стил е како ќе изгледа следната генерација на спортски автомобили на „Бентли“. Додека стоев на дождот и размислував за тие уникатни фарови, се чувствував како да ја гледам иднината, барем малку.
Видов доволно во „Мулинер“ за да знам дека повеќемесечниот процес на склопување мој сопствен „батур“ би бил дел од општата забава што произлегува од поседувањето ваков автомобил. Некои клиенти веројатно ќе ги сметаат неделите по последната испорака како антиклиматични, во споредба со возбудата околу развојот на автомобилот.
Експертите на „Мулинер“ во фабриката разговараат со секој клиент за дури 56 милијарди можни комбинации на бои, украси и материјали. Таа бројка достигнува практично неограничен број на комбинации бидејќи „Бентли“ може да ја заврши секоја површина и компонента на „батур“ во која било боја, графика и материјал што клиентот може да ги замисли - освен материјали како што се ленот, кој не е доволно цврст за да го издржи абењето на кое се изложени автомобилските седишта, или видови дрво и кожа за кое е незаконски или неетички да се користат.
Bentley
Можете да го посетите вашиот автомобил додека се склопува, особено ако сакате да се дружите со луѓето што ги виткаат браниците и шијат масивни седишта направени од седум (во просек) беспрекорни италијански говедски кожи. Повеќе од половина од клиентите го направиле тоа. За некои, тоа е сеопфатна можност за повратни информации, вели Пол Вилијамс, технички директор на „Мулинер и моторспорт“ во „Бентли“.
Bentley
Кога го посетив објектот, складот беше полн со дрва: англиски даб, хавајски багрем, калифорниско црвено дрво, орев, дрво од Мисисипи обработено со течен килибар. Имаше десетици машини за шиење со 24 калеми од конец нанижани како виножита. Може да имате контролни копчиња од 18-каратно жолто злато што се тестираат на топлина за да се осигури дека се практични за секојдневна употреба. (за да се избегнат бели дамки од кремот за сончање, на пример.) Целото злато што се користи во автомобилите се рециклира од стар накит, се меле во фин прав, а потоа со помош на 3Д-печатач се преработува во нов облик. „Батурот“ што го возев има преден сплитер, странични прегради и дифузер на задниот браник направен од нов одржлив композит, кој користи природни влакна како лен наместо јаглеродни влакна - кои сега веќе се како заглавени во 2021 година. На него е врежана звучната нота на неговиот мотор во контролната табла, како линиите на монитор за срце.
Bentley
Сите модели на „батур“ се резервирани; во првата година компанијата има право на првенство на купување од секој сопственик што сака да продаде. Возев еден од двата автомобила што компанијата ги разви за тестирање.
Bentley
„Батур“ не е легално да се вози по јавните патишта во САД, бидејќи нема американски увозен сертификат. Сепак, купувачите можат да го возат под традиционалниот статус „Прикажи и покажи“ (Show & Display), што му овозможува на автомобилот легално да се вози до 4.000 километри годишно. (Овој статус е добропознато ослободување за увезени автомобили со ниска продукција и висока вредност.) Ограничувањето не влијаеше многу на купувачите: шест автомобили веќе се резервирани за во САД.
Сигурно ќе ги препознаете кога ќе ги видите.
.webp){kind=icon}
