Култни филмски автомобили распродадени на аукција за 2,4 милиона евра

Во светот на колекционерските автомобили, аукциите секогаш привлекуваат внимание, а особено кога ги комбинираат гламурот на Холивуд и можноста за сериозен финансиски потфат. Тоа се покажа и на онлајн продажбата на култни филмски автомобили и мотоцикли што беше организирана од аукциската куќа „Бонамс“ (Bonhams), со промет од 2,4 милиони евра.

Понудата беше импресивна и разновидна, вклучувајќи 50 автомобили што одиграа клучни улоги во холивудските блокбастери, франшизи и европски хитови, како и 19 дополнителни филмски меморабилии. Меѓународните колекционери особено се интересираа за оригиналните возила користени во филмовите „Луѓе во црно“ (Men in Black), „Враќање во иднината“ (Back to the Future), „Робокап“ (Robocop) и „Истерувачи на духови“ (Ghostbusters), како и висококвалитетни реплики од „Бетмен“ и серијалот за легендарниот Џејмс Бонд. Целата колекција потекнува од музејот „Муви карс централ“ (Movie Cars Central), посветен на поп-културата и сместен во близината на Париз, а заинтересираните можеа да ги купат понудените автомобили без минимална почетна цена (no reserve), што им даде можност на многу колекционери да влезат во игра без висок стартен капитал.

Dodge Charger 1970, уште еден од легендарните модели од култната франшиза „Брзи и бесни“, кој го возеше Вин Дизел во улогата на Доминик Торето, продаден за 190.400 евра  Bonhams

Меѓу најзабележителните понуди беа и девет возила од серијалот „Брзи и бесни“ (Fast & Furious). Еден од најпознатите модерни филмски „актери“, „мицубиши лансер ево VII“ од 2001 година, кој го возеше актерот Пол Вокер во вториот дел на оваа акциска франшиза (2 Fast 2 Furious, 2003), беше продаден за 291.200 евра. Во филмот се појавува дури 15 минути, а по снимањето беше користен за промоции и во 2007 година беше извезен во Норвешка. Неговиот оригинален браник подоцна беше пронајден во Лос Анџелес и вратен, со што автомобилот беше доведен во целосно автентична состојба како во филмот. Покрај овој „дијамант“, продадени беа и култни машини од седмото продолжение на филмот (Fast & Furious 7): „доџ чарџер“ од 1970 година за 190.400 евра, неговиот теренски модел од истата година за 134.400 евра, како и „фаст атак баги“ (fast attack buggy) од 2015 година за 24.640 евра.

Ford Mustang Mach 1 од 1969 година, кој го возеше Киану Ривс во „Џон Вик“, достигна цена од 123.300 евра  Bonhams

Еден друг модел што се врежа во меморијата на љубителите на акциски филмови – легендарниот „форд мустанг мах 1“ (Ford Mustang Mach 1) од 1969 година, кој го возеше Киану Ривс во „Џон Вик“ (John Wick) – во оваа пригода беше продаден за 123.200 евра. Станува збор за оригинал модифициран за каскадерски сцени, па не чуди што сеѐ уште се присутни траги од снимањето. Во описот на автомобилот се наведува и дека пред повторната употреба бара основен сервис, како и инсталирање  нови елементи и нагодување на предната оска изместена од удар за време на снимањето.

Chevrolet Chevelle Malibu од 1973 година со кој се фотографираше Рајан Гослинг за филмот „Drive“ продаден за 61.600 евра Bonhams

На ноемвриската аукција, поголема цена од почетната процена постигнаа и симболите на француската автомобилска култура, славени на големото платно и надвор од него, „пежо 406“ (peugeot 406) и „пежо 407“ од филмот „Такси“ (Taxi). Така, „пежо 406 В6“ од вториот дел на франшизата достигна 95.200 евра, надминувајќи го очекуваниот опсег од 60.000 до 80.000 евра, додека репликата на моделот „пежо 407 В6“ од петтиот дел беше продадена за 53.760 евра, повеќе од трипати над очекуваното.

Dodge Charger од седмото продолжение на „Брзи и бесни“ продаден за 190.400 евра  Bonhams

Во осврт кон аукцијата и постигнатите резултати, Лоик Маски од аукциската куќа „Бонамс“ изјави дека се задоволни што можеле да ја претстават оваа исклучителна колекција пред љубителите на автомобили, мотоцикли и поп-култура и дека продажбата привлекла големо внимание од страна на колекционери и филмски ентузијасти од повеќе континенти. Тој истакна дека токму комбинацијата на автентични филмски и современи автомобилски икони, понудени без минимална цена, ја претворила аукцијата во вистински блокбастер и дека некои модели наскоро ќе најдат место во музејските поставки низ Европа.

Gene Winfield Police Cruiser од филмот „Враќање во иднината 2“ достигна цена од 67.200 евра Bonhams

Топ 10 највредни автомобили на аукцијата

Овие филмски икони и колекционерски модели привлекоа најголемо внимание кај купувачите:

Mitsubishi Lancer Evolution VII 2001 – 291.200 евра
Dodge Charger 1970 – 190.400 евра
Dodge Charger General Lee 1968 – 145.600 евра
Dodge Charger Off Road 1970 – 134.400 евра
Ford Mustang Mach 1 1969 – 123.200 евра
Nissan Skyline R34 GTT 2001 – 112.000 евра
Warner Brothers Batmobile 1992 – 106.400 евра
Peugeot 406 V6 1999 – 95.200 евра
Plymouth Barracuda Chassis 1972 – 84.000 евра
Gene Winfield Police Cruiser 1989 – 67.200 евра