Го тестиравме новото „Рено клио“ - нуди многу за прифатлива цена

На плеќите на новата, шеста генерација „Рено клио“ има големи очекувања, бидејќи неговите претходници ја подигнаа летвичката многу високо. Само минатата година во Европа беа продадени над 200 илјади примероци, а од првата генерација која се појави во 1990 година, глобално се продадени повеќе од 17 милиони автомобили.

Bloomberg Adria

Кога автомобилските компании настапуваат со освежен модел со таква репутација, обично играат на сигурно, но во „Рено“ беа многу похрабри. Дизајнот на новото „клио“ е радикално променет во однос на претходната генерација, тука е и новата моторизација, а ние детално тестиравме како сето тоа заедно функционира на патиштата.

Да почнеме од најочигледното - надворешниот изглед. Доволно е да се каже дека многу луѓе нè прашаа кој е тој автомобил, иако добро ги познаваат постарите генерации на нашите патишта. Во однос на претходниците, сè е поинакво. Автомобилот е зголемен во сите насоки, па со својата големина веќе чука на вратата на ц-сегментот, но габаритите не се единствениот показател за зрелоста на новото „клио“. Далеку од тоа.

Bloomberg Adria

Нам ни се допадна новиот изглед, а според комплиментите што ги доби за време на неделата во која го тестиравме, изгледа дека генерално е добро погоден.

За да не користиме флоскули за остри линии, елегантни странични силуети и слично, најдобро е сами да погледнете на фотографиите и да процените дали визуелно ви се допаѓа.

Новите линии дополнително ги истакнува зелената боја, која на почеток ни изгледаше малку нападна, но брзо ни прерасна во омилена и всушност му стои многу добро.

Bloomberg Adria

Домашна атмосфера во ентериерот

Дизајнерските промени се видливи и во внатрешноста на автомобилот. Иако управувачот и инструмент таблата практично се идентични со поновата електрична гама на „Рено“  (петката и четворката), што е многу добра работа бидејќи ергономски и функционално е сè добро погодено, има и многу новитети. Комбинацијата од ткаенина со интересен дезен и пластика е добро усогласена со амбиенталното осветлување, па „клио“ одвнатре изгледа значително посериозно од претходникот.

Bloomberg Adria

Она што е најважно - штом седнете зад воланот, се чувствувате како дома. Сè е логично распоредено, сите поважни команди се лесно достапни преку физички копчиња, па практично сè можете да „сфатите“ уште за време на првото возење, без потреба од консултации со кориснички прирачник или Јутјуб. Тоа е потценет раритет кај модерните автомобили и затоа мораме да упатиме пофалби до „Рено“.

Ретровизори на копчиња, прозорци на копчиња, клима на копчиња, избор на режим на возење на копчиња, адаптивен темпомат на копчиња. Сè што ќе користите во возење ви е на дофат на рака, а особено ќе го пофалиме „волшебното“ копче од левата страна на воланот кое по два клика ги гаси сите иритантни безбедносни аларми и предупредувања. Го сакаме ова копче и го сакаме „Рено“ поради тоа, а на другите производители им порачуваме да се угледаат на нив.

Bloomberg Adria

Ако сепак ви затреба инфотејнмент, без проблем ќе се снајдете бидејќи во него чука срцето на „Гугл“. Има вградено „Гугл мапс“ , па можете да навигирате со вистински податоци за сообраќајот без поврзување на мобилен телефон, тука е и продавницата за симнување апликации. Во суштина, сè проверено функционира, а имате и гласовен асистент ако сте чудак кој сака да разговара со неживи работи. Ние само го испробавме (работи уредно), но немавме никаква потреба од него бидејќи за сè што ни требаше имавме - погодивте - копчиња.

Покрај екранот на инфотејнментот тука е и возачкиот дисплеј, исто така со дијагонала од 10 инчи, преку кој можете да ги видите сите важни показатели за возењето, а можете на него да ја префрлите и навигацијата.

Bloomberg Adria

Удобен и (релативно) практичен

Во секој случај, дигиталната ергономија е одлична, а ни физичката не заостанува многу. Воланот на „клио“ е доволно прилагодлив во длабочина и висина за да можете удобно да се сместите во комфорни и убаво дизајнирани седишта. Знаевме да возиме и по пет часа во континуитет и навистина немаме никакви забелешки за удобноста.

Можеме евентуално да се пожалиме што горниот дел од пластиката на вратите е тврд, па не е најудобен ако сакате да го потпрете лактот за време на возење, иако е на идеална висина за тоа.

Напред имате два УСБ-Ц приклучоци, преградите во вратите собираат големи шишиња, совозачкиот преградник е со пристојна големина, а со доплата (200 евра) можете да добиете и безжичен полнач за мобилен. Практичноста е на висина на задачата, но на задните седишта ситуацијата е доста аскетска. Нема потпирач за раце, нема УСБ приклучоци (достапен е само 12V), а најважно - нема премногу простор. За деца има доволно место, но за возрасни (над 180 см) ќе биде прилично клаустрофобично ако седат зад патници со слична висина.

Bloomberg Adria

Исофикс приклучоците се лесно достапни, но кога (со леснотија) ќе поставите детско седиште, доста е тешко да се закопча појасот бидејќи седиштето е тесно, па тоа е една од ретките потенцијални секојдневни иритации ако имате мало дете.

Багажникот е доста голем, со капацитет од речиси 400 литри, а под подот се крие резервна гума со полна големина (доплата од 200 евра).

Bloomberg Adria

Жив мотор, премеко квачило

Нашиот тест-автомобил дојде со бензинец 1,2 (TCe 115 EDC) со 115 коњски сили, што за „клио“ е повеќе од адекватно. До „стотка“ забрзува за околу десет секунди, има доволно сила и за автопат (максимална брзина 180 km/h), а спарен е со рачен шестстепен менувач.

Троцилиндарецот сака да се врти, а дури и кога ќе го „стиснете“ не се дере премногу, а кабината на „клио“ е генерално добро изолирана од бучава, така што ќе го слушнете само кога навистина ќе нагазите на гаста. Внатре е пријатно и тивко до околу 130 km/h, додека на поголеми брзини бучавата од ветерот станува прилично гласна.

Bloomberg Adria

Најмалку ни се допадна менувачот, односно спојката која има долг од и ни требаше време да научиме каде точно се „одвојува“, а и по неколку дена знаевме да згрешиме при префрлување во втора брзина. Баждарена е за мирни возачи или оние кои штотуку ја започнуваат својата возачка кариера, што можеби и не е лошо со оглед на градското педигре на автомобилот.

Освен тој детал, „клио“ е одличен во возење, убаво се „држи“ на патот, суспензијата е добро подесена за апсорбирање на дупки и нерамнини, а сепак не се навалува премногу во свиоци. Автомобилот е стабилен, на големи брзини делува „како засаден“ и остава впечаток на класа поголем автомобил по чувството на автопат. Генерално влева доверба и се гледа дека во „Рено“ знаат што прават.

Bloomberg Adria

Што се однесува до потрошувачката, за илјада километри што ги направивме за време на тестот изнесуваше 7,4 литри на сто километри, но тука треба да се земе предвид дека најголемиот дел од времето возевме без да го штедиме моторот. Напротив, остро градско старт-стоп возење и туркање до максимум на автопат практично сочинуваа над 80 отсто од нашето дружење, а во овие дваесетина проценти по локални патишта, со малку помирно притискање на гасот, просекот брзо ни падна на околу шест литри. Сосема пристојно, а може и пониско ако се потрудите.

Bloomberg Adria

Успешно „созревање“

Да сумираме: „клио“ физички порасна во сите насоки, но и по возни карактеристики и квалитет делува многу позрело од автомобил од Б- сегментот. Интересна надворешност, убав ентериер и солиден мотор гарантираат дека и новата генерација ќе се продава добро. Единствено што можеме да му забележиме е премеката спојка која го нарушува уживањето во возењето и недостигот на простор за возрасни на задните седишта.

Bloomberg Adria

Колку сето тоа чини, се прашувате? Под 22 илјади евра, поточно 21.990 евра, а како нашиот модел од дополнителна опрема имаше резервно тркало и пакет за безбедност и паркирање, цената му се искачи на 22.690 евра.

Со оглед на сè што добивате и во споредба со конкуренцијата, би рекле – многу привлечно.

Bloomberg Adria

За крај ќе најавиме дека за десетина дена ќе го тестираме „клио“ во хибридна верзија со автоматски менувач и ќе ви донесеме детали, а наскоро, покрај бензинецот и хибридот, на нашиот пазар треба да пристигне и мотор кој комбинира бензин и плин.