„Сакам убавината на природата да ја запрам за момент и да ја претворам во накит“, вели Јулија Барбун, дизајнерка на уникатни модни додатоци од епоксидна смола и живи цвеќиња. За оваа талентирана Русинка со македонска адреса, живиот свет не е само инспирација, туку и материјал што добива нова форма и значење.
Лаванда, глуварчиња и шишарки се дел од природните елементи кои ги претвора во прецизни, рачно изработени парчиња што носат органска естетика и силен авторски печат. Дури и корите од мандарини, лимони и јаболка, кои обично завршуваат во отпад, таа ги трансформира во концептуален накит.
„Со доаѓањето на пролетта започнувам да собирам цвеќиња што визуелно ме привлекуваат, најчесто според нивната боја и форма. Потоа ги селектирам затоа што не сите цветови се погодни за изработка на накит поради структурата и издржливоста. Сакам парчињата да бидат впечатливи и необични, па внимателно комбинирам бои од различни цветови, растенија и овошје, како сино цвеќе со кора од мандарина или зелено јаболко со цветни детали“, раскажува Барбун.
Прочитај повеќе
Луксузниот пазар повторно ќе има раст во 2026 година, проценува „Бејн“
По период на стагнација, пазарот на луксузни производи во 2026 година се очекува повторно да расте, поттикнат од кинеските потрошувачи и стабилизирањето на клучните брендови, проценува „Бејн“.
24.11.2025
„Тифани“ и „Картие“ водат битка против луксузните торби во војната за престиж
Накитот блеска со рекордна побарувачка и умерен раст на цените, но модните куќи подготвуваат нов бран колекции што би можел повторно да ја смени рамнотежата на луксузот.
22.11.2025
„Ван Клиф и Арпелс Алхамбра“ – талисман на среќата. Може ли повторно да заблеска?
Култната колекција „Алхамбра“ на „Ван Клиф и Арпелс“ добива суптилни нови форми и трансформации, со дизајни што се носат на повеќе начини и ја продолжуваат еволуцијата на легендарниот мотив.
14.11.2025
Во разговор за „Блумберг Адрија“, таа детално го објаснува процесот на изработка. Вели дека кората од овошјето е најлесна за работа, бидејќи само ситно се сечка и се остава да се исуши. За разлика од неа, цвеќињата се посложени бидејќи секое реагира поинаку при сушењето, па применува различни техники во зависност од видот на цветот и ефектот што сака да го постигне.
Јулија Барбун
Секоe нејзино парче носи конкретна порака, а имињата на колекциите најчесто се инспирирани од местата каде што ги собира цвеќињата.
„По посетата на Крушево и цвеќињата што ги собрав кај Македониумот, посакав таа збирка посебно да ја обележам и ја нареков ‘Крушевска колекција’. Оттогаш се роди идејата секоја наредна серија да има свое име или да биде поврзана со одредена локација. Така настанаа „Брајчинска колекција“, „Охридска лаванда“, „Мимози од пазарче“, па дури и „Цвеќињата на баба“ со цвеќиња собрани од дворот на баба ми во Русија“, открива Барбун.
Колекцијата „Македонска шума“ ѝ е особено драга бидејќи подолго време трагала по материјалите. Сака секое нејзино парче да има позадина и да се знае дека е македонски производ бидејќи, како што вели, само така луѓето пошироко ќе знаат какви убавини имаме во земјата.
Јулија Барбун
Процесот на изработка на едно парче трае од пет до максимум десет дена, во зависност од тоа дали цвеќињата се веќе собрани и дали ги има сите потребни материјали. Вели дека секоја фаза носи свој предизвик, особено сушењето, каде никогаш не знае точно како ќе изгледа цветот. Секое парче го обликува индивидуално, со внимание на детали и финална обработка за да биде и функционално и естетски убаво. При изработката користи епоксидна смола, сушени цвеќиња, кора од мандарина, јаболка, лимун, портокал, мов, диви јагоди, шишарки, а по потреба додава пигменти, мали додатоци како сјај, во однос на ефектот што сака да го постигне.
„Цвеќето, растенијата и материјалите ги комбинирам внимателно, понекогаш во неколку фази на залевање и сушење. Конечниот изглед го откривам дури кога ќе ја извадам изработката од калапот, што секогаш носи мала доза изненадување“, објаснува Барбун.
Одржливоста и рециклираните материјали особено го обликуваат идентитетот на нејзиниот бренд. Се труди максимално да користи природни и веќе постоечки материјали, не само во накитот туку и во целиот процес на изработка.
„Наместо пластични чаши, користам силиконски садови за мешање на епоксидот, со што значително го намалувам отпадот, а пакувањето е од хартија. На тој начин, моите производи носат не само естетска вредност, туку и свесна приказна за почит и грижа кон природата“, порачува таа.
Барбун има големи планови за развој на бизисот. Во наредниот период ќе се фокусира на онлајн продажбата и на развојот на социјалните мрежи со цел да допре до поширока публика.
„Се стремам брендот да се позиционира како препознатлив по својата автентичност, разноликост и јасен креативен идентитет. Секоја година воведувам по некој нов производ преку кој се обидувам да внесам уште повеќе уникатност во дизајните“, вели таа.
Јулија Барбун
ЕКОНОМИСТКА ШТО ДИЗАЈНИРА, НО И МОТИВИРА
Јулија Барбун е мултимедијален уметник со десетгодишно искуство. Освен што изработува накит, таа е дизајнер на рачно цртана облека, секаков вид аксесоари и патики. Позади себе има неколку самостојни изложби, учества на базари за рачна изработка и различни проекти. Основач е и на платформата „Инспирација и уметност“ (Inspiration & Art), прво студио за интуитивна уметност во Македонија.
Јулија Барбун
„По професија сум економист, израсната во спортско семејство, и долго време верував дека „не сум талентирана“ за креативни работи и сликање. Мојата приказна ми помогна да сфатам дека сите носиме внатрешни блокади, ограничувања и несигурности. Токму затоа денес ги водам работилниците за интуитивна уметност за кои не е потребно претходно искуство“, вели нашата соговорничка.
Часовите се одвиваат низ неколку етапи кои вклучуваат разговори, медитации, цртање и опуштена неформална анализа на сликите. Барбун верува дека секој човек е креативен и талентиран, само му е потребен мал поттик за да го открие тоа во себе.
.webp){kind=icon}
