Дали вашата гардероба навестува ВИ-балон или опасност?

Не е само Мајкл Бери тој што ја споредува вештачката интелигенција со балонот дот-ком (dot-com), ниту се дистописки извештаите што посочуваат дека технологијата може да предизвика масовна невработеност, па дури ниту „Беркшир Хатавеј“ (Berkshire Hathaway Inc.), која собира рекордно количество готовина: и модата исто така сигнализира економска опасност.

По неколку години естетска доминација, 1990-тите конечно му го отстапуваат местото на вториот бран на носталгија: 1980-тите. За трговците, тоа поместување е неопходно и многу добредојдено. Свежиот изглед помага во поттикнување на купувањето: помислете на постпандемискиот премин од тесни на широки фармерки. Но за пошироката економија таа промена можеби е помалку пожелна. Осумдесеттите години од минатиот век, од кои најновите стилови црпат инспирација, беа период на вишок, ослободување на „животинските инстинкти“, кои доведоа до падот на берзата во 1987 година.

На некој начин, естетската смена е неизбежна. Модата обично се бунтува против доминантната норма, а 1990-тите беа засилени од сè: од Бијонсе и нејзиниот албум „Renaissance“ од 2022 година, кој во голема мера е инспириран од хаус-музиката, до турнејата на новото обединување на бендот „Оејзис“ минатата година, која доведе до скок на продажбата на шеширите бакет.

Токму кога деценијата требаше да избледи, се појави ТВ-серијата „Љубовна приказна“ (Love Story: John F Kennedy Jr. & Carolyn Bessette). Но се покажа дека елегантниот минималистички стил на Бесет од 1990-тите бил завршница, а не нов ривајвл.

Во декември пребарувањата за „1980-тите на американскиот Пинтерест убедливо ги надминаа 1990-тите и оттогаш остануваат на високо ниво, и покрај популарноста на споменатата серија. Платформата го идентификуваше „гламорати“ (Glamoratti) како клучен тренд за 2026 година по скокот на пребарувањата што вклучуваат луксуз во стилот на 1980-тите, златна белезица и впечатлив ремен.

„Валентино“ и контрастни бои на скапоцени камења Daniele Venturelli/Getty Images Europe

„Сен Лорен“ (Saint Laurent) го предводи трендот, со креативниот директор Ентони Васарело, кој веќе неколку сезони на пистата испраќа кроени костими со нагласени рамена и тесни здолништа во контрастни бои на скапоцени камења. Тоа има ефект. Куќата во сопственост на „Керинг“ (Kering SA) го зазеде првото место на кварталната Лист (Lyst), листа на најпопуларни модни брендови во втората половина од минатата година.

Првата и единствена колекција на Дарио Витале за „Версаче“ (Versace), сега во сопственост на „Прада“ (Prada SpA), и придружната кампања со слика на толпа луѓе во примарни бои - референца на раните реклами од 1980-тите на куќата - ја продолжија темата. Дури и Алеснадро Мишел, кој ги направи 1970-тите препознатливи во брендот „Гучи“ (Gucci) на „Керинг“, вклучи елементи од таа деценија, како точки, сатенски фустани и салонки, во своите најнови колекции за „Валентино“ (Valentino).

Таквите стилови почнуваат да се пренесуваат и во масовната мода, според истражувачката компанија ЕДИТЕД (EDITED). Облеката со скулптурални рамена е во прв план. Бројот на горни делови со подлошки за рамена на сајтовите во САД и Велика Британија оваа година пораснал за 188 отсто во однос на 2025 година.

 

Продавниците исто така нудат хеланки со ленти под стапалата, прикажани на пистата на „Клои“ (Chloé), како и парчиња со висока јака, пеплум и набори. Палетите на бои исто така го одразуваат периодот, со виолетова, кобалтно сина, домат црвена и портокалова, според ЕДИТЕД.

Заживувањето на ерата „алчноста е пожелна“ не е ограничено само на женската мода. Машката мода доживува враќање на 1980-тите и кроевите, што одразува пошироко враќање на формалното облекување, кое Хелен Броклбанк, извршна директорка на британската луксузна асоцијација „Валпол“ (Walpole), вели дека помага во растот на нарачките на СР (Savile Row). Масовниот пазар следи: ЕДИТЕД откри дека бројот на дворедни сакоа на сајтовите во САД и Велика Британија пораснал 28 отсто во последниот квартал од 2025 година.

Костумите во стилот на „Мајами вајс“ (Miami Vice) исто така се во мода, со пребарување стари модели на „Армани“ на платформата Депоп (Depop) што пораснале 50 отсто во последниот месец. „Армани“ ја користи шансата преку повторно издавање парчиња од периодот 1979-1994. Трговците исто така бележат голема побарувачка за плетени поло-маици и мокасини од велур.

Враќањето на максимализмот од 1980-тите е одговор на естетиката олд мани (old money), која доминираше последните три години. Значајно е тоа што тантелата и живите бои ги надградуваат пукнатините во трендот на тивок луксуз, како микротрендот моб вајф (Mob Wife - црвен кармин и големи бунди), кој кратко беше популарен на социјалните мрежи на почетокот од 2024 година.

Покојната прва сопруга на Трамп, Ивана Трамп, беше олицетворение на гламурот од 1980-тите Depositphotos

Поп-културата исто така игра улога. Серијата „Чудни нешта“ (Stranger Things), еден од првите феномени што ја вратија ерата во фокусот на јавноста, можеби заврши, но не пред да ги зголеми пребарувањата на Депоп за инспирација од 1980-тите за повеќе од 800 отсто во моментите кога беше емитувана последната сезона кон крајот на 2025 година. ТВ-адаптацијата на романот на Џили Купер од 1988 година „Ривали“ (Rivals) се враќа следниот месец, ветувајќи уште големи фризури и фустани со балон-здолништа.

Можеби деценијата на декаденција повторно е во прв план затоа што се совпаѓа со денешната политика и економија.

Претседателот на САД, Доналд Трамп, чиј поглед на светот е вкоренет во 1980-тите, ги прифаќа моќта и парите - како и костуми со нагласени рамена. Жените од МАГА имаат сопствена униформа, не многу далеку од претераниот гламур на таа ера.

Мојата колешка Кетрин Ен Едвардс тврди дека денешната економија личи на онаа што ѝ претходеше на глобалната финансиска криза во 2007–2008 година. А со берзата на рекордни нивоа, постојат и паралели со еуфоријата од средината на 1980-тите што му претходеше на падот во 1987 година, врвот на американската криза на штедилниците (Savings and Loan) и, како што деценијата завршуваше, рецесија.

Со оглед на бројот на референци кон 1980-тите во машката и женската мода на неодамнешните ревии, реално е да се очекува дека трендот на моќно облекување (power dressing) ќе продолжи да расте. Во иднина наследникот на Витале во „Версаче“, Питер Милер, ќе ја претстави својата прва колекција на почетокот од следната година. А 1980-тите беа златна ера за брендот, па и тоа би можело дополнително да го поттикне трендот.

Тоа би им дало на трговците доволно време да навлезат во овој гламурозен изглед, како и на инвеститорите да размислат за потенцијално помалку гламурозни последици за своите портфолија.