Мега дивиденда на „Шанел“ им носи на сопствениците заработка од 21 милијарда долари

Милијардерското семејство кое стои зад „Шанел“ (Chanel Ltd.) е на пат да инкасира најмалку 21 милијарда долари преку исплати на дивиденди од последната деценија - огромна финансиска добивка во момент кога нивниот бренд продолжува да просперира и покрај кризата што погодува дел од конкурентите во луксузната индустрија.

Холдинг-компанијата на семејството Вертхајмер со седиште на Кајманските Острови, преку која го контролираат „Шанел“, треба да прими 5,8 милијарди долари дивиденди за 2025 година, од кои повеќе од половина ќе бидат исплатени веќе оваа година, според документи поднесени во Обединетото Кралство. Тоа доаѓа покрај приближно 15,1 милијарда долари дивиденди што семејството ги акумулирало од 2017 година.

Огромните дивиденди им помогнаа на браќата Алан Вертхајмер и Жерар Вертхајмер, денес во седмата деценија од животот, да станат дел од кругот на најбогатите семејни династии во светот. Компанијата ја наследиле од нивниот дедо, еден од првичните деловни партнери на креаторката Габриел Коко Шанел. Продажбата на брендот, познат по ватираните чанти со преклоп чија цена достигнува 10.500 евра и твид колекциите, минатата година растела побрзо од пазарниот лидер ЛВМХ (LVMH), сопственик на „Кристијан Диор“ (Christian Dior Couture).

Браќата Вертхајмер Getty Images

Алан (77) и Жерар (75) заедно располагаат со богатство проценето на околу 85 милијарди долари, според Bloomberg Billionaires Index. Се смета дека поседуваат еднакви удели во „Шанел“ преку офшор холдинг-компанијата МИ (Mousse Investments Ltd.), која е поврзана со њујоршкиот семеен инвестициски фонд МП (Mousse Partners), еден од најголемите и најдискретни семејни фондови во светот, со кој управува нивниот полубрат Чарлс Хајлброн.

Браќата се познати по тоа што ги избегнуваат медиумите и се многу таинствени. „Шанел“, како приватна компанија, финансиските резултати ги објавува само еднаш годишно, а нив најчесто ги претставуваат извршни директори кои не се членови на семејството. Алан Вертхајмер денес е глобален извршен претседател на „Шанел“, додека Жерар повеќе не е наведен како директор на компанијата.

Француската компанија во вторникот минатата недела објави дека приходите во 2025 година пораснале 1,8 отсто на споредлива основа и достигнале 19,3 милијарди долари. Резултатите покажуваат дека производителот на парфемот „шанел број 5“ (Chanel No. 5) во тој период покажал поголема отпорност од ЛВМХ, најголемиот светски луксузен конгломерат основан од Бернар Арно, но сепак заостанува зад растот на компанијата „Хермес“.

„Луј Витон“ од групацијата ЛВМХ, „Шанел“ и „Хермес“ денес го сочинуваат ексклузивното трио на врвни модни брендови чии годишни приходи, по постпандемискиот бум, достигнале околу 20 милијарди долари. Иако ЛВМХ не објавува поединечни резултати за своите околу 75 брендови, производителот на кожена галантерија „Луј Витон“ бил еден од клучните двигатели на растот.

Продавница на „Шанел“ во Палм Бич. Флорида Eva Marie Uzcategui/Bloomberg

Како и „Шанел“, и овие брендови се покажале како исклучително профитабилни за своите сопственици во последната деценија, според процените на „Блумберг“. Бернар Арно до крајот на минатата година преку своите инвестициски холдинзи - главно благодарение на уделот во ЛВМХ - примил околу 23 милијарди евра дивиденди, додека проширеното повеќегенерациско семејство зад „Хрмес“ инкасирало околу 7,2 милијарди евра.

Најновите резултати на „Шанел“ потврдуваат дека Вертхајмер примиле дивиденда од 5,7 милијарди долари за 2023 година, но не подигнале исплата за 2024 година, кога компанијата пријавила големи инвестиции во маркетинг и купување луксузни недвижности.

„'Шанел' секогаш одржувал многу доследна финансиска политика без нето долг на крајот од годината, во сите околности“, изјави претставник на компанијата, одбивајќи да коментира за тајмингот на исплатата на дивиденди.

Браќата исто така презеле чекори за диверзификација на своето богатство. МИ наведува дека инвестира во „широк спектар на класи на средства на јавни и приватни пазари“, покрај сопственоста во „Шанел“. Иако МП не објавува колкав капитал контролира, некои компании го наведуваат како учесник во трансакции или акционер, што укажува на вложувања во акции, недвижности, кредитни фондови и приватен капитал.

Со текот на годините, МП поддржал голем број стартапи, вклучувајќи ја компанијата за ментално здравје БХ (Brightside Health), дигиталната маркетинг група БГ (Brandtech Group), биотехнолошката компанија ЕН (Evolved by Nature), прехранбената компанија ХХ (Harmless Harvest) и здравствената платформа ТМ (Thirty Madison). Во 2024 година „Мус“ се приклучил на наследничката на „Лореал“ (L’Oréal) во инвестиција во луксузниот моден бренд „Роу“ (The Row).

Семејниот фонд е исто така наведен како сопственик на околу 8 отсто удел во француската компанија за дигитална забава „Нетгем“ (NetGem SA) и 5,7 отсто акции во производителот на производи за коса ОХ (Olaplex Holdings Inc), кој компанијата „Хенкел“(Henkel AG) се согласи да го купи претходно оваа година. Синот на Жерар Вертхајмер, Дејвид, поддржува инвестициски фонд фокусиран на лајфстајл компании.