„Мета“ лансира очила под сопствен бренд по цена од 299 долари

„Мета“ (Meta Platforms Inc.), која помогна во популаризацијата на паметните очила преку партнерства со „Рејбан“ (Ray-Ban) и „Оукли“ (Oakley), сега за првпат се насочува кон понискиот ценовен сегмент со лансирање подостапни модели под сопствен бренд.

Технолошкиот гигант ги претстави очилата „мета адвентчурер“ (Meta Adventurer) и „фјури“ (Fury), секои по цена од 299 долари. Тоа е 80 долари помалку од втората генерација „рејбан мета вејфарер“ (Ray-Ban Meta Wayfarer), модел претставен минатата година. „Мета“ исто така го воведува моделот „старфајр“ (Starfire) од 399 долари во соработка со Кајли Џенер, со цел да се привлече помлада, модно ориентирана публика.

Иако „Мета“ ги дизајнираше очилата, ќе ги произведува нејзиниот партнер ЕЛ (EssilorLuxottica SA), матичната компанија на брендовите „Рејбан“ и „Оукли“. Логото на ЕЛ се појавува заедно со логото на „Мета“ на внатрешните страни на рамките и на пакувањето. Дизајните развиени во компанијата доаѓаат пред планираното деби на „Епл“ (Apple Inc.) на пазарот на паметни очила следната година. Слично како „Мета“, производителот на ајфони сам ги дизајнира своите идни очила.

„Старфајр“ новите паметни очила на „Мета“ во соработка со Кајли Џенер Mark Gurman/Bloomberg

Во интервју, раководителите на „Мета“ и ЕЛ навеле дека новиот пристап е одговор на желбата за „подостапна цена“.

„Ги разгледувавме заедно брендовите и се обидувавме да сфатиме што има смисла“, вели Алекс Химел, кој го води одделот на „Мета“ за уреди што се носат. „Не најдовме баш ниту еден, па тогаш рековме: Во ред, имате ’рејбан мета’ овде, ’оукли мета’ таму и ’мета’ на дното“.

Очилата „адвентчурер“ изгледаат слично на моделот „вејфарер“, со правоаголен дизајн и тенки рабови. Доаѓаат во стандардна и ХЛ големина. „Фјури“ изгледаат слично како моделот „адвентчурер“, но се подебели. Очилата на Кајли Џенер, пак, имаат тенка овална форма, во согласност со сè попопуларниот стил меѓу жените. „Мета“ нуди повеќе бои, вклучувајќи темна инспирирана од шарите на желка, црна и зелена, како и поларизирани и проѕирни леќи. Новата линија е исто така компатибилна со диоптриски леќи.

Хардверските и софтверските функции главно се во согласност со другите паметни очила на „Мета“ без екран. Еден исклучок е новата опција за приспособување на ширината меѓу перничињата за нос на три нивоа, со рачно отворање и затворање на носачот. „Мета“ неодамна го претстави Мјуз спарк (Muse Spark), својот нов модел на вештачка интелигенција, а таа функционалност доаѓа интегрирана во новите модели.

„Мета“ исто така навести дека разгледува верзија на очила без камера, фокусирана на аудиоискуство за телефонски повици, репродукција на медиумски содржини и интеракција со ВИ-алатки. Компанијата не сакаше да коментира кога таквите очила би можеле да бидат лансирани или како би биле брендирани, но наведува дека постојат корисници што главно ги користат микрофонот и аудиофункциите. Верзијата без камера би можела да ја намали цената и да овозможи нови дизајни поради потребата од помалку компоненти, наведува компанијата.

Новите паметни очила „фјури“ Mark Gurman/Bloomberg

„Колку е поголем пазарот толку повеќе можеме да си дозволиме нешто поинакво за повеќе луѓе“, вели Химел. Компанијата разгледувала алатки за препознавање лица за своите очила, иако таа функција не е во активен развој бидејќи се разгледуваат прашања поврзани со приватноста и општествените импликации, посочува Химел. Идеално, вели тој, очилата на „Мета“ би можеле да ги препознаваат луѓето што корисникот ги познава и кои сакаат да бидат идентификувани - како семејство, пријатели и соработници.

Химел исто така зборуваше за сè поширокиот пазар на паметни очила, нарекувајќи го „Епл“ „импресивно“.

„Мислам дека сè што прават треба да се сфати сериозно“, рече тој, додавајќи: „добри се во хардверот, добри се во дизајнот“. Но го критикуваше производителот на ајфони поради затворениот иОС-систем, поради што очилата на „Мета“ немаат целосна поврзаност со уредите ајфон како што би имале очилата на „Епл“. „Постојат низа области каде што нема да можеме да изградиме ист квалитет на корисничко искуство кога се поврзани со телефонот, и затоа мислам дека тие ја користат таа предност.“

Следниот чекор на „Мета“, како што наведува компанијата, е понатамошно проширување во повеќе стилови и брендови со партнерот, а долгорочно - влез во областа на очила за проширена реалност. Компанијата пред две години прикажа прототип за проширена реалност и би можела да претстави верзија за потрошувачи веќе следната година, според извештаите на „Блумберг њуз“.