Чантите „биркин“ донесоа раст на приходите на „Хермес“

Продажбата на „Хермес“ (Hermès) расте бидејќи богатите клиенти во САД и во Европа трошат повеќе на познатите чанти „биркин“ (Birkin) и „кели“ (Kelly) на француската компанија.

Заработката во третиот квартал се зголеми за околу 16 отсто по постојан курс, објави во вторникот „Хермес интернешнл“. Аналитичарите предвидуваа добивка од 13 проценти. Растот во Јужна и Северна Америка ги надмина процените, додека перформансите во азиско-пацифичкиот регион и во Јапонија останаа непроменети.

Резултатите на „Хермес“ ги надминаа другите компании за луксузни стоки, имајќи предвид дека францускиот бренд имаше корист од еластичната побарувачка дури и кога растот во самата индустрија забави. Ограниченото производство на компанијата создаде заостанување во испораката на нејзините скапоцени чанти и поголема моќ на цените.

„Хермес“ е „во сопствена лига“, напиша во белешка аналитичарот на „Ситигруп“ (Citygroup), Томас Шове. Компанијата има корист од „големиот удел на лојална побогата демографија“, додаде тој.

Акциите поскапеа за околу 3,3 отсто на тргувањето во Париз во вторникот, а од почетокот на годината забележаа раст од околу 19 отсто. Пазарната вредност на „Хермес“ е 181 милијарда евра (193 милијарди долари), што е трипати повеќе од вредноста на „Керинг“ (Kering), компанија што е сопственик на брендот „Гучи“ (Gucci).

„Продажбата во Кина, Хонгконг, Тајван и во Макао беше „стабилна“ и може да се спореди со особено силниот квартал минатата година“, рече финансискиот директор на компанијата Ерик ду Халгуе. Засега компанијата не предвидува враќање на кинеските туристи во Европа, кои избираат да патуваат регионално.

„И покрај несигурното глобално опкружување, ние остануваме уверени“, рече финансискиот директор во однос на 2023 година.

„Хермес“ не забележа промена во трендовите на купување во почетокот на октомври, но останува внимателен во врска со потенцијалното влијание на неодамнешните геополитички настани врз туризмот, додаде тој. Франција премина на највисокото ниво на тревога за тероризам претходно месецов, по фаталниот напад на наставник.

„Растот во Америка беше особено поттикнат од продавницата на брендот на авенијата Медисон, која беше отворена пред една година“, рече тој.

„’Хермес’ малку ги зголеми цените на часовниците и на накитот во текот на годината, по вообичаените поскапувања што компанијата обично ги воведува на почетокот на годината“, рече извршниот директор.

Групацијата на луксузни брендови ЛВМХ (LVMH) - која ги вклучува и „Луј Витон“ (Louis Vuitton) и „Кристијан Диор“ (Christian Dior) - објави разочарувачки квартални продажби во почетокот на овој месец, откако се намали интересот за луксузен коњак и за чанти. „Керинг“ во вторник во Париз ги објавува податоците за продажбата.