Шпанскиот конгломерат за луксузна козметика и парфеми „Пуиг“ (Puig) планира да собере повеќе од 2,5 милијарди евра од најголемата иницијална јавна понуда во Шпанија во последната деценија. Компанијата во семејна сопственост планира да продаде 1,25 милијарда евра нови акции, како и уште поголем износ на постојни акции преку ИПО, се наведува во документот за зделка објавен на 8 април од „Ројтерс“. Портфолиото на „Пуиг“ ги вклучува брендовите „Рабан“, „Каролина Херера“, „Шарлот Тилбери“, „Жан Пол Готје“, „Нина Ричи“, „Драјс ван Нотен“, „Бајредо“, „Пенхалигон“, „Л'Артисан парфумер“, „Уриаге“, „Апивита“, Д-р Барбара Штурм“, „Кама ајурведа“ и „Лото дел сур“, како и лиценцирани производи за убавина од „Кристијан Лубутин“, „Бандерас“ и „Адолфо Домингез“ и многу други.
„Ние веруваме дека рамнотежата кон тоа да се биде семејна компанија, која исто така е предмет на одговорност на пазарот, ќе ни овозможи да бидеме поконкурентни на меѓународниот пазар за убавина во текот на следната фаза од развојот на компанијата“, рече претседателот и извршен директор Марк Пуиг.
Според неодамна објавените финансиски извештаи за 2023 година, „Пуиг“ забележал нето-приходи од 4.304 милиони евра, што е раст од 19 отсто во однос на претходната година. Од сите категории за убавина, според извештајот на компанијата, 72 отсто од нето-приходот во 2023 година биле од продажба на парфеми. Како клучна причина за тоа компанијата го наведува лансирањето на новиот бренд-идентитет на „Рабан“ (името е сменето по смртта на Пако Рабан), додека „Жан Пол Готје“ стана најбрзорастечки бренд во нивното портфолио.
„Пуиг“ продолжи да добива пазарен удел во оваа категорија, достигнувајќи 11 отсто во сегментот на селективна дистрибуција на парфеми низ целиот свет. Овој успех е поддржан од популарните производи на „Пуиг“, како што се парфемите „1 милион рабан“, „гуд грл“, „каролина херера“, како и успешните лансирања на „ле мајл еликсир“ на „Жан Пол Готје“ и „Готје Дивајн“. Позната по својата визија да користи нови технологии за дополнително зајакнување на учеството во оваа категорија, компанијата го трансформираше начинот на кој потрошувачите можат да ги искусат и пробаат мирисите со помош на технологијата „ер парфем“, за која „Блумберг Адрија“ пишуваше претходно.
Компанијата исто така постигна раст во својот моден сегмент. За тоа придонесоа настаните како што е првото шоу за колекција на „Каролина Херера“ одржано во Рио де Жанеиро, дебито на Харис Рид како креативен директор во „Нина Ричи“, како и сè попопуларниот бизнис-модел на гостински дизајнерски колекции за висока мода. Во овој случај, Готје соработувал со Хајдер Акерман и Жулиен Досен. Досен ја прослави својата 10-годишнина како креативен директор во „Рабан“, со успешната соработка со „Ејч енд ем“, континуираниот успех на неговите прет-а-порте (pret-a-porter) колекции. Машките и женските колекции на Дрис ван Нотен добија одлични критики, а тој беше награден за дизајнер на годината од ВВД во 2023 година, на церемонијата на која „Пуиг“ беше награден и за најуспешна голема компанија за убавина. Белгискиот дизајнер минатата година ја отвори својата прва продавница посветена исклучиво на козметика и додатоци во Париз, пред да го објави своето повлекување од модниот свет на 19 март годинава. Ван Нотен ја објасни својата одлука вака: „Сега сакам да се фокусирам на сите работи за кои никогаш немав време. Тажен сум, но во исто време среќен, да ви кажам дека ќе се пензионирам на крајот на јуни. Се подготвував за овој момент некое време и чувствувам дека е време да се направи простор за новата генерација на таленти да ја донесат својата визија во брендот“. Следната машка колекција пролет-лето 2025 година, која ќе биде претставена во јуни во Париз, ќе биде неговата последна во неговата сегашна улога. „Пуиг“ ги продава своите производи во повеќе од 150 земји и има канцеларии во 32.
.webp){kind=icon}
Во моментов нема коментари за веста. Биди прв да коментира...