.webp){kind=icon}
Тејлор Свифт (34), една од најпрофитабилните ѕвезди на денешницата, соборува рекорди со новиот албум, кој го објави на 19 април. Дури 1,6 милион копии се продадени во првите 24 часа, со што „The Tortured Poets Department“ има огромен потенцијал да стане едно од најпродаваните музички изданија воопшто откако компанијата „Нилсен“ ја следи продажбата на албуми од 1991 година. Единаесеттиот студиски проект на американската пејачка и авторка го има најдоброто деби во историјата на „Спотифај“ со 300 милиони стримувања во еден ден. На оваа музичка платформа Свифт собори уште еден рекорд, откако „Fortnight“, на која ѝ гостува раперот Пост Малоун, стана најстримувана песна во еден ден со повеќе од 25,2 милиони слушања.
Фантастични бројки бележи и црно-белиот спот за песната со над 20 милиони прегледи на „Јутјуб“ во првиот ден од објавувањето. Блогерката Сара Шапел, позната како Тејлор Свифт Стајл, го пофали модниот избор, особено впечатливата креација што личи на венчаница, а која пејачката ја носи во првиот дел од видеозаписот.
Овој екстравагантен балски фустан го потпишува Тони Матичевски, австралиски дизајнер со македонско потекло. За оваа важна соработка во неговата кариера тој се пофали на социјалните мрежи. „Какво вонсериско парче музика и можност да се биде дел од него“, напиша тој на Инстаграм.
Прочитај повеќе
Турнејата на Тејлор Свифт ги подобри прогнозите за БДП на Сингапур
БДП веројатно ќе се зголеми за 2,9 отсто во трите месеци кои завршуваат на 31 март, што е најбрзо темпо во шест квартали.
10.03.2024
Можеме ли да кажеме точно време со новиот тренд на носење часовник?
Истражуваме различни начини на кои може да се „носи времето“
10.02.2024
Апсолутна доминација на Тејлор Свифт на наградите „Греми“
Иако популарноста на настанот бледнее, тој сè уште е водечка телевизиска емисија за награди во САД.
05.02.2024
Како Тејлор Свифт стана милијардерка?
Таа се разви од наградувана кантри-пејачка до статус на една од најголемите поп-ѕвезди во светот.
13.11.2023
Тимот на Матичевски за „Фимејл“ (Femail) потврди дека Тејлор Свифт е првата жена што го облекла фустанот „Кадесценција“ (Candescence dress), кој се продава за 6.200 долари. Тие биле во преговори со стилистите на пејачката уште пред доделувањето на престижните музички награди „греми“ во февруари годинава, кога таа го најави новиот албум, а на црвениот килим носеше многу сличен фустан на Скјапарели.
Бисернобелиот фустан без прерамки на Матичевски, чиј дизајн тој самиот го нарече еуфоричен и романтичен, овозможува беспрекорна силуета со аголно деколте и со совршено истуткан материјал, драматично пресечен под колкот, напиша меѓу другото модниот магазин WWD („Воменс веар дејли“ - Women`s Wear Daily).
Тони Матичевски е роден е во Мелбурн во македонско семејство. Неговите родители мигрирале во Австралија во 1970-тите. Во една постара публикација на Обединетата македонска дијаспора откри дека како дете неполни две години живеел во Македонија и дека тоа бил еден од најдобрите периоди во неговиот живот. „Имам некоја имагинарна реалност во врска со годините поминати таму, па претпоставувам дека тоа чувство е вткаено во мојата работа“, изјави тој.
Сепак, за неговите колекции не црпи инспирација од овие простори.
„Во странство често среќавам уметници од Балканот, а општиот впечаток е дека таму има многу креативни, но и несфатени луѓе“, кажа Матичевски пред пет години во интервју за српското издание на „Ел“ (Elle).
Тој е еден од најпознатите австралиски дизајнери, а Тејлор Свифт не е првата голема ѕвезда со која соработувал. Негови креации носеле и Бијонсе, Пенелопе Круз, Џенифер Лопез, Флоренс Пју и Хајди Клум.
Со висок просек дипломирал моден дизајн на Кралскиот институт за технологија во Мелбурн. Во 2002 година ја освојува наградата „ѕвезда во подем“ на „Фешн груп интернешнл аворд“ (Fashion Group International Award). Како еден од најдобрите студенти во генерацијата добива понуда да работи во престижната модна куќа „Дона Каран“ во Њујорк, но ја одбива. Се сели во Париз, каде што две сезони работи за „Черути“, а по враќањето во Мелбурн конечно основа сопствен бренд, кој го опишува како „малку поинаква мода за жени“.
За кратко време станува познат по парчињата со деликатни асиметрични кроеви, а подоцна во неговите колекции вклучува и чевли и кожена галантерија, но и облека за деца.
