text size
Ѕвездата на филмот „Роки“ (Rocky) Силвестер Сталоне ќе продаде 11 рачни часовници на аукција на „Сотби“ (Sotheby's) на 5 јуни, вклучувајќи го и исклучително реткиот „патек филип грендмастер чајм“ (Patek Philippe Grandmaster Chime), кој оригинално е продаден за околу 2,5 милиони долари.
Ова ќе биде првпат „грендмастер чајм“ да се најде на комерцијална аукција. На хуманитарната аукција „Онли воч“ (Only Watch) во 2019 година, челичниот модел беше продаден за 31 милион долари, поставувајќи рекорд.
Верзијата на Сталоне на овој двостран часовник, со 20 компликации - најмногу што „Патек“ има ставено во рачен часовник - е направена од бело злато. Има пет различни режими на звук, вечен календар и може да следи две временски зони. Часовникот е толку редок, дури и за толку славниот швајцарски производител на часовници, што доаѓа со сложена кутија за презентација која вклучува брошура и плакета, двете со името на Сталоне, оригиналниот сертификат, манжетни и ајпад (iPad) во кожна футрола од „Патек Филип“ (Patek Philippe). Часовникот е во пластичното куќиште, бидејќи актерот никогаш не го носел.
„Сотби“ го проценува „грендмастерот“ на Сталоне на 2,5 до 5 милиони долари, иако сигурно би можел да се продаде за повеќе. Часовникот им се придружува на другите барани часовници од „Патек Филип“, како и на часовници од „Одемар Пиге“ (Audemars Piguet), „Картие“ (Cartier), „Ролекс“ (Rolex) и „Пијаже“ (Piaget). Сет на часовници „Панераи“ (Panerai), меѓу кои е и оној што Сталоне го носеше во филмот „Платеници 2“ (The Expendables 2), ја заокружуваат колекцијата, која ќе се продава како дел од продажбата Sotheby's Important Watches во Њујорк.
Сталоне, кој сега има 77 години, вели дека го имал часовникот доволно долго и дека е време да продолжи понатаму. Тој е долгогодишен колекционер на часовници кој во еден момент имал околу 100 часовници. „Јас сум клиент и обожавател на 'Патек Филип' многу години“, изјави тој за „Блумберг“ (Bloomberg). „Кога ќе погледнам наназад на времето со „Патек“ и часовниците што ги собрав, се чувствувам горд, односно дека успеав“.
Според Сталоне, тој го купил „грендмастер чајм“ како колекционерски предмет без намера да го носи. Вели дека часовникот не било лесно да се добие; морал да му пристапи на највисокото раководство во компанијата за да му биде доделен. Тој го споредува овој часовник со Моне - уметничко дело - и вели дека му е тешко да се раздели од него.
„Кога имате одличен часовник кој расте во популарност“, вели тој, „тоа е јасен потсетник дека трудот се исплати“.
Во продажба се и два многу барани модели на „наутилус“. Оној од нерѓосувачкиот челик со референтен број 5711/13000A-001 од 2021 година, со зелен сончев бројчаник и дијаманти на бројчаникот, се проценува на 200.000 до 400.000 долари поради неговата екстремна реткост. Челичниот со син бројчаник и референтен број 5711/1A-001 се проценува на 50.000 до 100.000 долари. Линијата 5711 е повлечена од производство, што доведе до скок на вредноста на секундарниот пазар.
Сталоне, исто така, има долгогодишна врска со „Панераи“, производителот на масивни часовници за нуркање во сопственост на швајцарскиот луксузен гигант „Ришемон“ (Richemont). Откако актерот носеше еден во филмот „Daylight“ во 1994 година, компанијата доживеа пораст на популарноста. „Без Силвестер Сталоне, 'Панераи' не би бил тоа што е денес“, вели Џеф Хес, шеф на часовници на „Сотби“ за Америка. „Не сум сигурен дека воопшто би знаеле за Панераи“, додава тој.
Пријателот на Сталоне, Арнолд Шварценегер, тогаш почна да носи „Панераи“, а Сталоне носеше „панераи бронзо“ во „Платеници 2“; може да се види како го носи на плакатот. Хес вели дека бронзос добиле клучните членови на актерската екипа, која ги вклучува Џејсон Статам, Долф Лундгрен, Лиам Хемсворт, Чак Норис и Шварценегер.
„Отсекогаш мислев дека бронзениот луминор (PAM00382 Luminor) е неверојатен поради металот“, вели Сталоне. „Неговиот дизајн ме потсетува на јарболот на Титаник - го има тој индустриски момент. Знаев дека морам да го носам во филмот, бидејќи ќе ја пренесе пораката“.
Оној што го продава е означен со 000, „така што веројатно е првиот 'панераи' некогаш направен“, додава тој.
„Го користев овој часовник во секакви ситуации - под вода, над вода, во песок, во сцени со борби. Ми беше придружник за време на филмот и подолго од тоа. Тој ми даде толку многу задоволство. И сега, зошто некој друг да не ужива во тоа колку и јас“, истакнува актерот.
Другите часовници во групата вклучуваат „одемар пиге ројал оук турбиљон“ (Audemars Piguet Royal Oak Tourbillon), кој ја прославува својата 50-годишнина, со проценка од 100.000 до 200.000 долари и „ролекс деј-дејт“ (Rolex Day-Date) од розово залато за 25.000 до 50.000 долари.
Хес успеал да ја добие оваа продажба за „Сотби“ поради неговата долгогодишна врска со Сталоне. Кога Хес бил во ривалската аукциска куќа „Филипс“ (Phillips), тој работел со актерот во 2020 година за да продаде пет часовници, вклучувајќи го и оној „панераи“ од „Daylight“. Тој вели и дека врските со актерот датираат од неговото детство.
„Ако ги погледнете одјавните шпици на секој 'Роки' филм, ќе прочитате: 'Овој филм е посветен на траен спомен на Џејн Оливер'“, вели Хес. Оливер беше првата менаџерка на Сталоне во доцните 1970-ти, а исто така и братучетка на Хес. „Таа ми даде слика со автограм на која пишува „За Џефри од Слај“, вели тој, додавајќи: „Имам 47 години“.
Хес се поврзал со Сталоне во 2019 година и почнале да работат заедно. Знаел дека Сталоне има „грендмастер чајм“ и заедно го договориле вистинското време за продажба. „Се подготвувам за она што се надевам дека ќе биде рекорд за модерен часовник на не-добротворна аукција“, вели Хес. „Се разбира, ние целиме кон рекорд за часовник од 21 век“.
.webp){kind=icon}
