Бернард Арно се стекна со личен удел во „Ришемон“ (Richemont), матичната компанија на „Картие“ (Cartier), според луѓе запознаени со инвестициите на францускиот милијардер.
Не е јасно точно колкав удел презел претседателот и извршен директор на ЛВМХ (LVMH / Moët Hennessy Louis Vuitton) во „Компани финансиер Ришемон“ (Cie Financiere Richemont). Едно лице го опиша уделот како „мал“ и дел од поширокото портфолио на инвестиции на семејството Арно во јавно тргувани компании.
Арно во моментов има намера да ги држи акциите само како инвестиција, изјави изворот, кој сакаше да остане анонимен поради доверливите информации.
Веста за уделот на Арно во „Ришемон“, кој е под контрола на јужноафриканскиот милијардер Јохан Руперт, беше откриена како дел од поширокиот профил на бизнисменот објавен во „Блумберг бизнисвик“ (Bloomberg Businessweek).
Акциите на „Ришемон“ скокнаа за 3,1 отсто во Цирих, иако паднаа за 2,4 отсто во последните 12 месеци. ЛВМХ во Париз се тргуваше за 0,7 отсто повеќе.
Претставник на Арно и ЛВМХ одби да коментира.
ЛВМХ, водечкиот светски конгломерат за луксузни стоки, е третата највредна европска компанија, со пазарна капитализација од околу 366 милијарди евра. Пазарната вредност на „Ришемон“ е 84,7 милијарди швајцарски франци.
Уделот на Арно во „Ришемон“ продолжува да отвора прашања за неговите намери во врска со инвестицијата. „Ришемон“ има силна одбрана од несакани преземања бидејќи неговиот претседател Руперт контролира 51 отсто од гласачките права и 10,2 отсто од вкупниот капитал. Во текот на изминатите неколку години, 74-годишниот Руперт нагласува дека сака групата да остане независна.
Заклучно со 31 март, немаше други значајни акционери во „Ришемон“ што поседуваат најмалку три отсто од гласачките права, објави швајцарската компанија во последниот годишен извештај.
Арно (75) ги опиша „Картие“ и „Ван Клиф енд Арпелс“ (Van Cleef & Arpels), кои се во сопственост на „Ришемон“, како „два големи бренда“ на годишната презентација на резултатите на ЛВМХ во јануари. Тој го пофали и раководството на Руперт со компанијата.
„Дозволете ми да завршам со 'Ришемон' и г. Руперт, кого го сметам за исклучителен лидер“, рече тогаш Арно. „Немам желба да ја нарушам неговата стратегија, разбирам дека тој сака да остане независен и мислам дека тоа е многу добро, и ако му треба поддршка за да ја одржи својата независност, јас ќе бидам таму“.
Bloomberg Mercury
Пред 14 години ЛВМХ инвестираше во француската луксузна куќа „Хермес“ (Hermès International). Компанијата на Арно користеше деривати на капитал за тајно да акумулира удел што на крајот достигна 23 проценти, шокирајќи го семејството Хермес. Во тоа време Арно го нарече овој потег „пријателски“. Компанијата се спротивстави и го отфрли ЛВМХ, кој се откажа од својот удел во производителот на чанти „биркин“.
ЛВМХ поседува брендови како „Лоу“ (Loewe), „Селин“ (Celine) и „Фенди“ (Fendi) во модната индустрија, како и синџирот на козметика „Сефора“ (Sephora) и брендовите за шампањ „Дом Перињон“ (Dom Perignon) и „Моет и Шандон“ (Moët & Chandon). Нивната последна голема аквизиција беше купувањето на „Тифани“ (Tiffany & Co) за 16 милијарди долари пред три години, што останува најголемата аквизиција во луксузната индустрија во целина.
ЛВМХ поседува и брендови за накит како што се „Булгари“ (Bulgari), „Фред“ (Fred), „Шуме“ (Chaumet) и „Репоси“ (Repossi), па спојувањето со „Ришемон“ би можело да привлече внимание поради антимонополските правила. Модните брендови „ЛВМХ Луј Витон“ (LVMH Louis Vuitton) и „Кристијан Диор котур“ (Christian Dior Couture) исто така имаат линии на накит.
Од 24 јуни богатството на Арно се проценува на околу 203 милијарди долари, што го става на третото место, зад Џеф Безос и Илон Маск, според индексот на милијардери на „Блумберг“.
.webp){kind=icon}
