Францускиот конгломерат за луксузни добра „Керинг“ (Kering) ќе му додели бонус од 20 милиони евра на Лука де Мео, кога во септември ќе ја преземе функцијата главен извршен директор - позиција од која ќе се обиде да го оживее модниот гигант „Гучи“ (Gucci).
Компанијата соопшти дека великодушниот „пакет за добредојде“ е делумно во готовина, а делумно во акции на „Керинг“ и дека му ги надоместува на Де Мео долгорочните бенефиции што ги изгуби со заминувањето од „Рено“ (Renault), каде што претходно беше директор.
Во известувањето до акционерите се наведува дека покрај бонусот, Де Мео ќе има годишна бруто-плата од 2,2 милиона евра (сразмерно на датумот на започнување), со променлив дел од 1,21 милион евра, кој ќе зависи од исполнувањето клучни цели – вклучувајќи и дефинирање нова стратегија за групацијата.
Во 2026 година променливиот дел од заработката на Де Мео може да достигне и 300 отсто од основната плата, што би значело дополнителни 6,6 милиони евра, доколку се надминат целите.
Нема бесплатна вечера: Лука де Мео во моментов се соочува со најтешката задача во луксузната индустрија - спасување на „Гучи“
Фото: Betty Laura Zapata/Bloomberg
Враќање на сјајот на „Гучи“
Де Мео го очекува тежок предизвик: „Керинг“ се соочува со пад на продажбата, особено кај „Гучи“, кој е погоден од силното забавување на луксузниот пазар и губење на привлечноста кај помладата публика. Само неделава компанијата пријави нов пад на приходите на својот водечки бренд, заедно со најава за уште една креативна промена.
На чело на „Рено“, Де Мео доби признанија за трансформацијата на таа автомобилска компанија, враќајќи ја на патот на раст и профит. Инвеститорите сега се надеваат дека истата способност ќе ја пренесе и во светот на модата.
Од најавата за неговата номинација во средината на јуни, акциите на „Керинг“ пораснаа за повеќе од 25 отсто, иако сè уште се за над 20 отсто пониски во однос на лани.
Де Мео ќе заработува многу повеќе отколку во „Рено“, но дали ќе биде еднакво успешен?
Извор: Bloomberg
.webp){kind=icon}
