Познато е дека модните избори на Меланија Трамп многу говорат за нејзиното расположение. За својот прв момент на британско тло, американската прва дама се одлучи за долг капут од британскиот бренд „Барбери“ (Burberry) - класичен бежов капут со препознатлива тартанска подлога, во комбинација со црни очила и црни чизми за јавање „диор емпрант“ (Dior Empreinte).
За време на тридневната посета, таа со својот сопруг Доналд Трамп ќе биде на кралска вечера во Виндзор, каде што е предвидено со кралицата Камила да ги разгледа Куќата за кукли на кралицата Мери и Кралската библиотека, а подоцна ќе ѝ се придружи војвотката Кејт Мидлтон во Фрогмор.
Ова е нејзино прво официјално појавување на меѓународната сцена од април, кога беше на погребот на папата Франциск, а наедно и нејзино прво појавување како дел од државната посета за време на вториот мандат на американскиот претседател. За време на посетата на нејзиниот сопруг на Блискиот Исток во мај, каде што Саудиска Арабија, Катар и Обединетите Арапски Емирати го пречекаа со државни вечери, првата дама одлучи да не се појави.
Дали една ода за култниот британски моден бренд ќе биде доволна за да го „омекне“ делот од јавноста што е вознемирен од политиките на Доналд Трамп?
Фото: Chris Ratcliffe/Bloomberg
Пред Виндзор, првата станица на американскиот пар била куќата Винфилд во Лондон, резиденцијата на американскиот амбасадор во Обединетото Кралство. Зградата, која била завршена во 1938 година, ја купила Барбара Хатон, наследничката на американскиот Вулворт, а откако била оштетена за време на Втората светска војна, таа ѝ ја донирала на американската влада, со што во 1946 година станала резиденција на американскиот амбасадор во Велика Британија.
Винфилд хаус, резиденцијата на американскиот амбасадор, се протега на 12,5 хектари на северозападната страна од Риџентс Парк и содржи голема колекција на американска уметност. Приземјето содржи приемни и државни соби, додека источното крило се користи за сместување на персоналот на резиденцијата.
Фото: Chris Ratcliffe/Bloomberg
Сепак, ова не е првпат Меланија да се одлучи за „Барбери“ за време на официјалните посети. Уште во 2019 година, на претходното патување во Британија, таа се појави во црвено-сино-бела свилена блуза со машна, во духот на боите на американското знаме, но и со нота на почит кон принцезата Дајана.
Американскиот претседателски пар во Вестминстерската опатија за време на нивната претходна државна посета во 2019 година.
Фото: Luke MacGregor/Bloomberg
Какво значење има тоа за „Барбери“?
Додека овој моден избор ја интригира јавноста, „Барбери“ се наоѓа во клучен момент на трансформација. Како што е најавено, на крајот на месецот компанијата повторно ќе влезе во индексот FTSE 100, една година откако го изгуби статусот на член на лондонскиот елитен клуб на „блучипови“.
Вклучувањето на „Барбери“ во FTSE 100 би можело да поттикне дополнителна побарувачка за акциите од фондовите што го следат индексот, проширувајќи го пристапот на компанијата до инвеститорите.
Враќањето означува нов чекор во оживувањето на брендот под водство на извршниот директор Џошуа Шулман. Од неговото доаѓање во средината на 2024 година, акциите на „Барбери“ пораснаа за повеќе од 70 проценти, со што пазарната капитализација на компанијата достигна околу 4,6 милијарди фунти. Неговата стратегија е фокусирана на враќање на брендот кон неговото британско наследство и зајакнување на неговите препознатливи мантили, кои чинат околу 2.000 фунти, додека го намалува фокусот на чантите и експериментирањето со високата мода.
Како влијаат царините на Трамп?
Сепак, пазарните предизвици остануваат сериозни. Во првиот квартал од оваа фискална година „Барбери“ објави пад од шест проценти во приходите од малопродажба, на 433 милиони фунти. Компанијата исто така годинава објави дека ќе отпушти речиси 1.700 работници низ целиот свет, што е речиси една петтина од нејзината работна сила, а целта е да оствари дополнителни 60 милиони фунти заштеди во текот на следните две години.
Кога Трамп во април воведе дополнителни царини од 10 проценти, Адам Менсел, директор на Британската федерација за текстил и мода, предупреди дека САД се втор по големина извозен пазар на Велика Британија за мода и текстил и дека новиот американски царински режим нема да биде од корист за никого. „Тоа ќе доведе до намалување на извозот од Велика Британија и ќе влијае врз производителите на мода и текстил од Велика Британија во време кога тие веќе се соочуваат со невидени зголемувања на трошоците. Иако царината од 10 отсто за извозот од Велика Британија е пониска отколку 20 проценти за производите од ЕУ, таа се додава на постојните царини, со што некои луксузни британски ткаенини во САД се оданочени дури со 35 проценти.“ Истовремено, британските брендови што произведуваат во земји како Виетнам и Бангладеш и испорачуваат директно во САД се соочуваат со огромни зголемувања на трошоците.
„Барбери“ не објави процена за влијанието на царините врз неговото работење, но се очекува дека ќе биде значајно со оглед на тоа што САД сочинуваат околу една петтина од продажбата на брендот. За разлика од конкурентите, како што се „Хермес“ (Hermès) и „Луј Витон“ (Louis Vuitton), „Барбери“ има ограничена можност да ги компензира трошоците за царините со зголемување на цените, со оглед на моменталната кревка состојба на стратегијата на Шулман за „воздигнување“ на брендот.
Аналитичарите предупредуваат дека времето истекува. „Инвеститорите видоа неколку неуспешни плана за пресврт од ’Барбери‘. Овој изгледа како последна шанса“, изјави за „Блумберг“ Чарли Хагинс од „Велт клаб“.
Мода и геополитика
Засега, брендот смета на комбинација од нови кампањи со британски ѕвезди како што се Кејт Винслет и Џери Хол, како и глобална видливост преку појавувања на познати личности, како сега со Меланија Трамп.
Но, дали „Барбери“ може да го искористи и капитализира моментот кога модата и геополитиката повторно се вкрстуваат? Деновиве тоа ќе зависи многу повеќе од нејзиниот сопруг.
Во тој контекст, внимание се посветува и на личните врски што американскиот претседател ги има со Обединетото Кралство, вклучувајќи го и фактот дека неговата мајка, Мери Ан Меклауд Трамп, била Шкотланѓанка и зборувала гелски. Родена и израсната на островот Луис, на Западните Острови, таа на 18-годишна возраст се преселила во САД (во 1930 година). Таа го задржала својот мајчин акцент во текот на целиот свој живот (починала во 2000 година, на 88-годишна возраст), а Луис го посетувала толку често што многумина таму сè уште со радост се сеќаваат на неа, наведуваат британските медиуми.
Трамп на државен прием во Бакингемската палата со кралицата Елизабета II за време на неговиот прв мандат, во 2019 година. Годинашниот прием во зимската резиденција на кралското семејство, Виндзор, се смета за уште поголема чест.
Фото: Bloomberg
Многу се очекува и од кралот Чарлс III, кого Трамп го опишува како свој голем пријател. Се очекува кралските елементи да бидат клучни за успехот на посетата, ставајќи го кралот во улога на главен дипломат во време кога посетата на Трамп носи повеќеслојни политички, трговски и социјални предизвици, вклучувајќи протести од дел од британската јавност што изразува несогласување со политиките на американскиот претседател.
И покрај ефикасниот прв впечаток и враќањето на палтото на „Барбери“ на тронот, големото прашање е дали модните избори на Меланија за време на остатокот од посетата ќе бидат доволни за да ја „омекнат“ таа перцепција.
.webp){kind=icon}
