Зошто луксузните брендови и го сакаат и го мразат Црн петок

Единствениот пат кога во рубриката престиж користиме зборови како попуст, распродажба или евтино, веројатно е сега – затоа што луксузната индустрија влегува во Црн петок со кнедла во грлото. Додека масовните брендови намалуваат цени, куќите на висока мода и премиум производи гледаат на овој ден како на филмски заплет „љубов–не е љубов“: ветувачка прилика или потенцијална опасност за иднината.

За брендовите кои со децении, а некои и подолго, ја градат својата вредност врз реткоста, престижот и фактот дека врвниот квалитет на производите и понекогаш многубројните часови вложени во изработка ја оправдуваат високата цена, попустите се како да му дадете некому Ферари и да му кажете „само малку изгребете го“ за да биде поевтин (пардон, поповолен). Тоа е една од причините зошто никогаш нема да видите „Ролекс“, „Луј Витон“ и други врвни брендови да имаат распродажби или попусти. Луксузот не продава само производ – тој продава статус, дистанца од она што секој може да го поседува, чувството дека сте посебни и дека припаѓате на клубот „оние кои знаат“. Секоја распродажба би можела да го разводни тој наратив и долгорочно да ја ослабне цената, особено по периодот кога брендовите агресивно ги зголемуваа цените поради царините.

Блумберг

 

Сепак, пазарот ги диктира своите правила. Генерацијата зед и помладите, милениумците, купуваат повнимателно и се посвесни за вредноста. Затоа погодностите при купување стануваат тактичка алатка на која не се имуни ни најлуксузните брендови. Црниот петок така станува игра во која брендот се обидува да го задржи импулсот на купување, но да не го изгуби здивот на престижот. Целта: да се фати ФОМО (FOMO страв од пропуштање) што го создава Црн петок, но без црни банери, масовност и „снижувања за секого“. Наместо најниска цена, пораката е: најредок пристап.

Ние не намалуваме, ние бираме кого да наградиме

Некои од тактиките вклучуваат:

• Ексклузивни капсул колекции што траат само 24 часа
• Порано пристапување до нови модели за ВИП купувачи
• Приватни продажби со цени надвор од очите на јавноста
• Персонализирани понуди што не ја гледаат светлината на Инстаграм
• Продажни настани само со покана

 

Блумберг

Ова се само некои од начините како луксузните брендови танцуваат по тенка линија: премногу попусти и потенцијална штета за имиџот, премалку привлечни понуди и ризик конкуренцијата да ја украде публиката. Некои малопродажни партнери на големите луксузни брендови и онлајн портали како „Нет а портер“ и „Фарфеч“ имаат контролирани попусти, што е добра прилика за брендовите. Но, не очекувајте куќи како „Луј Витон“ да ја променат својата политика, бидејќи остануваат непопустливи – но со својот пристап порачуваат: „Ние не намалуваме, ние бираме кого да наградиме.“

Како да ја искористите амбивалентноста

Ако сепак сакате во сезоната на попусти да се израдувате со нешто луксузно, обрнете внимание на категоријата убавина и парфеми, бидејќи за големите брендови за убавина Црниот петок е прилика да ги растоварат резревите на парфеми кои можеби се сезонски или помалку продавани.

Попустите на парфеми можат да привлечат корисници кои претходно не купувале луксузни мириси, па брендовите тука гледаат шанса да ја прошират својата база на купувачи без целосна девалвација на својата премиум линија.

Покрај тоа, наместо агресивно намалување на цената, многу брендови нудат сетови за подарок, мини-верзии на мириси или специјални сетови, што дава поголемо чувство на вредност без директна деградација на брендот.

 

Блумберг

Исто така, малопродажни партнери како „Сефора“  и други често нудат 15–30 проценти попуст на парфеми – луксузните брендови го прифаќаат таквото канализирање на попустите за да останат релевантни, а притоа не мораат самите да ја намалуваат својата официјална цена.

Потоа, помали, нише или занаетчиски парфемски куќи, како „Килиан“ (Kilian) „Мезон Франсис“ (Maison Francis Kurkdjian) понекогаш имаат ограничени понуди за Црн петок: ексклузивни сетови, патни верзии или пакети.

„Диптик“ (Dyptique) со години е еден од победниците на Црниот петок со својата стратегија. Ако сте мислеле дека даваат попуст – ќе се разочарате.

Наместо тоа, тие осмислуваат начини да додадат вредност за своите купувачи – лимитирани свеќи со посебен дизајн и пакување, мини-сетови мириси и свеќи или специјални празнични украси. Добитната формула на оваа стратегија е двојна: брендот ја користи засилената внимателност и ФOMO ефектот на Црниот петок, а притоа не го нарушува својот престиж, додека купувачот добива чувство дека доживеал нешто посебно – а не само поевтина верзија на производот. Тоа е уметноста на капитализација на популарниот момент со зачувување на суштината на луксузот: ексклузивност, занает и емоционална вредност.

 

Депозитфото

Сè повеќе, кога зборуваме за луксуз, зборуваме за посебни искуства и тоа особено се однесува на патувањата. Црн петок, или како што некои го нарекуваат Црн ноември, го користат и туристичките агенции за да понудат егзотични патувања под поповолни услови.

Тоа се однесува и на платформите за резервации како Букинг, авионски карти, па ако сте во прилика или пак сонувате за некое ексклузивно патување, сега е добро време за резервација. Иако Црн петок генерално е добар момент за купување квалитетни технички уреди, подобро е некои работи да се доживеат во живо отколку да се гледаат на телевизор.