Женева за гурмани: каде да јадете ако доаѓате за работа, а каде ако купувате „ролекс“

Многумина кога ќе помислат на Женева замислуваат чисти сини езера опкружени со планини покриени со снег, врвно чоколадо што се топи во устата и мноштво часовници ролекс. Она што ретко им паѓа на ум е живата гастрономска сцена. И навистина, кулинарнскиот пејзаж на градот долго време беше многу досаден.

Женева, мал град со околу 400.000 жители, сака да „удри над својата тежина“, со повеќе од просечен број приватни банки и меѓународни компании. Долгоочекуваната гастрономска сцена полека ги следи трендовите, со помош на постојан прилив на странски работници – повеќе од 40 проценти од населението не се Швајцарци. Ресторанските институции на градот (некои мои омилени од детството сè уште постојат) денес се соочуваат со конкуренција од интернационални ресторани и динамични попап-локации.

Со светските лидери собрани во малиот швајцарски град Давос за годишниот Светски економски форум, решивме да истакнеме еден од најголемите и најкосмополитски градови во оваа алпска земја. Градот е познат по тоа што ги чува своите тајни, па добрите локални ресторани долго време беа тешко достапни.

Затоа одбравме пет значајни места што нема да ги најдете на стандардните листи „каде да јадете во Женева“. Меѓу нив се: живописно француско бистро, каде што храната е уметност, шарен сириско-ерменски ресторан и мал суши-локал што ве води директно во Токио.

Ле Доријан, Плас Нев

Ле Доријан (Le Dorian) не е целосно нов на ресторанската сцена - постои уште од 1950-тите - но минатата година беше значително реновиран, претворајќи го старомодното место во простор полн со француски бистро-дух, со едноставна, но прекрасна храна од главниот готвач Флоријан ле Буек.

На менито за деловен ручек (42 швајцарски франци), кое се менува секојдневно, предјадењето може да биде освежувачки тартар од туна. На а ла карт менито за предјадења, опашките од говедо (20 франци) се сочни и нежни, со богат сос. Нарачувањето тестенини во француско бистро може да изгледа необично, но пробајте: телешките равиоли (39 франци) се прекрасни, полнети со нежно месо под остар крем-сос со пармезан и украсени со кисел кромид.

Врвот на оброкот е десертот. На менито за ручек, еклерите од овошје се кремасти и освежувачки. А ништо не го надминува милфејот (14 франци): едноставни, крцкави, путерести слоеви тесто со пенест крем во средината и домашен карамел-сладолед од страна. Понудени се и обемни вински листи, со акцент на Франција и Италија.

Плас Рене-Пајо 1; www.ledorian.ch

Равиоли со телешко во Le Dorian | Dina Esfandiary/Bloomberg

Ле Болоњ, Корнавен

Меѓу деловната и финансиската елита во Женева, Ле Болоњ (Le Bologne) е институција. Ресторанот е жив секој работен ден, за време на викендите е затворен, со опуштена атмосфера, која не ги оддава беспрекорната услуга и самоуверената кујна.

Менито е кратко и сезонско. Најпопуларните јадења ротираат, вклучувајќи плума од пата негра (51 франц), врвно парче свинско месо со освежувачки теријаки сос. Пред тоа пробајте кромески од патка (24 франци), елегантна крокета на пире од карфиол и јаболко – необично, но успешно. Уште едно популарно предјадење е ризото од целер со тартуфи и фоа гра (24 франци).

Подгответе се за традиционалните колички со француски десерти: тарт со лимон и меренга и пралине пари-брест (15 франци за колку и да собере чинијата). Винската карта е обемна, а персоналот е корисен при изборот на шишето.

Ру Некер 11; www.lebologne.com/accueil

Крокети со праз Le Bologne | Dina Esfandiary/Bloomberg

Ле Дим сум гурман, Пакис

Добрата вредност ретко ја поврзуваме со Женева, еден од десетте најскапи града во светот. Но понекогаш се наоѓа мала, непозната драгоценост. Дим сум гурман (Dim Sum Gourmand) го оправдува своето име, со мали кинески чинии  совршено подготвени.

Декорот на ресторанот е едноставен, речиси досаден. Но никој не доаѓа тука поради амбиентот, туку поради храната. Предјадења како крцкавите палачинки со млад кромид (9 франци) совршено одат со свинските ребра со сол и бибер (20 франци).

Полнетите тестенини се деликатни, сервирани врели, со квалитетен месен и зеленчуков фил: говедско и целер (11 франци), пилешко и пак чој (11 франци), свинско и кинеска зелка (12 франци) и традиционалниот шримп хар гав (11 франци). Свинските бао-печива на скара (9 франци) се меки, слатки и сочни. За десерт: разновидни мочи (12 франци).

Ру дy Приеуре 5; www.le-dim-sum-gourmand.ch

Нема погрешни полнети тестенини во Le Dim Sum Gourmand | Le Dim Sum Gourmand

Кадмус, Жонксион

Оброкот овде потсетува на појадок во северниот сириски град Алепо во мирен ден, кога светлите ресторански простори се полни со семејства, а масите покриени со ќебапи и шарени мезе-чинии.

Тука сириското мени е зачинето со ерменски влијанија. Салатите вклучуваат тостирана пита фатуш (15 франци), богата со лимон и свежи состојки. Други препораки: хумус со парчиња пржено месо (19 франци), кремасти шанклеш (14 франци), мали крцкави ролни од суџук (15 франци).

За главни јадења, скарата е сочна, но ѕвезда е ќебапот караз (28 франци), мала топка месо во сос од кисела цреша. Порциите се големи, понесете го остатокот дома. Ресторанот прима резервации, но тие не се потребни во текот на работната недела. Идеално е да се оди во група за да ја максимизирате мезе-нарачката.

Авенија де Сент-Клотилд 9; www.cadmusrestaurant.com/en/home

Не знаете што побрзо да изберете во ресторанот Cadmus | Cadmus

Нагоми, Пакис

Овој мал суши-бар е скриен на работ на женевскиот „црвен кварт“. Зад малите безимени врати се наоѓа едноставен простор бар во Г-облик. Ѕвезда е готвачот Масахико Нумабукуро, кој ја сече морската храна во креации што ве водат директно во Јапонија.

Започнете едноставно: мисо супа (5 франци), солена салата од морски алги (12 франци). Не прескокнувајте ја луксузната пржена фоа гра со понзу или јузу-лимон сос (29 франци). Суши: темаки со мрсна туна (16 франци), нигири со јагула (8 франци), хосомаки со чадна кожа од лосос (13 франци).

Можете да избирате по желба или да му го препуштите изборот на готвачот. „Искуството во суши-барот е приближно исто како да сте во јапонски локален ресторан“, наведува корисник на DINE на терминалот на „Блумберг“. Ако нема место во Нагоми, посетете го блискиот Нагоми Темпура, со фантастично пржени морски плодови и зеленчук.

Ру де Цирих 47; www.restaurant-nagomi.com

Селекција суши во ресторанот Nagomi| Dina Esfandiary/Bloomberg